Sanebimɔ He

◼ Ani esa akɛ Yehowa Odasefoi aya helatsamɔhei loo hei ni akwɛɔ mɛi ni egbɔlɔ yɛ ni jamɔ gbɛjianɔtoo ko ji mɛi ni kudɔɔ?

Jamɔ gbɛjianɔtoi babaoo yɛ ni helatsamɔhei kɛ hei ni akwɛɔ mɛi ni egbɔlɔ yɛ ni kwɛɔ helatsɛmɛi kɛ mɛi ni yeɔ helai ni sɛɛ tsɛɔ lɛ yɛ amɛkudɔmɔ shishi. Bei pii lɛ, afeee nɛkɛ hei nɛɛ kɛ yiŋtoo lɛ akɛ akɛbaaha Babilon Kpeteŋkpele lɛ nibii aya hiɛ. (Kpoj. 18:2, 4) Ekolɛ jamɔ gbɛjianɔtoo ko ji mɛi ni je shishi akɛ jarayeli nitsumɔ ko ni amɛbaatsɔ nɔ amɛná shika. Ŋmɛnɛ lɛ, helatsamɔhei komɛi yɛ ni jamɔ ko gbɛi kã amɛnɔ kɛkɛ, shi ekomɛi hu yɛ ni jamɔ mli hiɛnyiɛlɔi titrii ji mɛi ni tsuɔ nii yɛ jɛmɛ.

Kɛ́ ehe bahia ni Yehowa Odasefonyo ko aya helatsamɔhe loo he ko ni akwɛɔ mɛi ni egbɔlɔ yɛ lɛ, esa akɛ lɛ diɛŋtsɛ ekpɛ eyiŋ kɛji akɛ ebaaya he ko ni kɛ apasa jamɔ gbɛjianɔtoo ko yɛ tsakpãa. Ekolɛ mɔ ko henilee baaŋmɛ lɛ gbɛ ni eya he ko tamɔ nakai, shi ekolɛ mɔ ko hu henilee eŋmɛŋ lɛ gbɛ. (1 Tim. 1:5) Shihilɛi komɛi yɛ ni ekolɛ ebaaná mɔ ko yiŋkpɛɛ nɔ hewalɛ, ni ehi akɛ asusu enɛɛmɛi ahe.

Ákɛ nɔkwɛmɔnɔ lɛ, ekolɛ helatsamɔhe loo he ko ni akwɛɔ mɛi ni edara yɛ ni bɛŋkɛ wɔ lɛ pɛ ji nɔ ni jamɔ gbɛjianɔtoo ko kudɔɔ. Aloo kɛ́ helatsamɔhe kroko bɛŋkɛ po lɛ, ale nɔ ni jamɔ ko gbɛi kã nɔ lɛ akɛ amɛkwɛɔ mɛi jogbaŋŋ. Helatsamɔhe ni jamɔ ko gbɛi kã nɔ lɛ baanyɛ afee helatsamɔhe pɛ ni yɔɔ tsɔji ni akɛtsáa hela pɔtɛ̃ɛ ko, loo ebaanyɛ efee helatsamɔhe pɛ ni datrɛfonyo ni kwɛɔ bo lɛ baanyɛ akwɛ mɛi yɛ jɛmɛ. Agbɛnɛ hu, bei komɛi lɛ, helatsamɔhei ni kɛ jamɔ ko yɔɔ tsakpãa lɛ baakpɛlɛ susumɔ ni ohiɛ yɛ lá he akɛ Kristofonyo lɛ nɔ, yɛ be mli ni helatsamɔhe ni jeee amralo lɛ kwɛɔ nɔ, loo maŋ helatsamɔhe lɛ efeŋ nakai. No hewɔ lɛ, enɛɛmɛi ji otii komɛi ni obaanyɛ osusu he beni okpɛɔ oyiŋ yɛ helatsamɔhe ni obaaya lɛ he.

Kɛ́ okpɛ oyiŋ akɛ obaaya helatsamɔhe loo he ko ni akwɛɔ mɛi ni edara yɛ ní kɛ jamɔ gbɛjianɔtoo ko yɔɔ tsakpãa lɛ, obaanyɛ obu lɛ akɛ nyɔmɔ ni oowo yɛ nɔ ko ni atsu aha bo lɛ he. Obaanyɛ obu lɛ akɛ jamɔ gbɛjianɔtoo lɛ miitsu jarayeli nitsumɔ ko, ni kɛ́ oyahe nɔ ko kɛjɛ amɛdɛŋ lɛ, no etsɔɔɔ akɛ oofi amɛsɛɛ, loo oofi apasa jamɔ sɛɛ. Eji nyɔmɔ ni oowo yɛ nitsumɔ ni atsu aha bo loo nɔ ni ohé lɛ he.

Eji anɔkwale akɛ, ákɛ Kristofonyo lɛ, yɛ shihilɛi ni tamɔ nɛkɛ mli lɛ, esa akɛ okwɛ akɛ okɛ ohe woŋ apasa jamɔ nifeemɔ ko kwraa mli. Kɛfata he lɛ, okɛ jamɔ mli gbɛi tamɔ “Father” loo “Sister,” akatsɛ mɛi ni tsuɔ nii yɛ helatsamɔhe lɛ. (Mat. 23:9) Esa akɛ okwɛ jogbaŋŋ ni nɔ ni baaya nɔ lɛ afee jarayeli nifeemɔ ni oohe nɔ ko loo aahɔ̃ɔ nɔ ko aaha bo kɛkɛ.

Kɛ́ abaahé bo afɔ̃ helatsamɔhe lɛ, esa akɛ oha ale akɛ Yehowa Odasefonyo ji bo, ni obaasumɔ ni osafoŋ onukpai lɛ abasara bo. Enɛ baaha onine anyɛ ashɛ mumɔŋ yelikɛbuamɔ nɔ beni oyɔɔ helatsamɔhe lɛ.—1 Tes. 5:14.

Esa akɛ nyɛmimɛi hii kɛ yei ni edara yɛ afii amli ní yɔɔ he ko ni akwɛɔ mɛi ni edara yɛ, ní jamɔ gbɛjianɔtoo ko kudɔɔ lɛ awekumɛi ni ji heyelilɔi, esafoŋ onukpai, kɛ mɛi krokomɛi ni yɔɔ asafo lɛ mli lɛ atsu amɛmumɔŋ hiamɔnii ahe nii. Hiɛshikamɔ ni akɛaatsu sane nɛɛ he nii lɛ baawo nyɛmimɛi ni edara nɛɛ hewalɛ, ni ehaŋ akɛ amɛ afata jamɔ gbijurɔyelii, loo jamɔ nifeemɔi krokomɛi ni yaa nɔ yɛ nɛkɛ hei nɛɛ ahe.

Yɛ nibii ni awie he kɛtsɔ hiɛ nɛɛ hewɔ lɛ, esa akɛ mɔ fɛɛ mɔ akwɛ bɔ ni shihilɛ lɛ ji, ni edamɔ nɔ ekpɛ lɛ diɛŋtsɛ eyiŋ yɛ helatsamɔhe loo he ko ni akwɛɔ mɛi ni edara yɛ ni ebaasumɔ ní eya lɛ he.—Gal. 6:5.