Sanebimɔ He

◼ Ani esa akɛ asafoi loo aŋkroaŋkroi kɛ logo (okadii) ni Yehowa Odasefoi anitsumɔhei ni mla kpɛlɛɔ nɔ lɛ kɛtsuɔ nii lɛ atsu nii?

Logo ji gbɛi, okadi, loo sama ko ni akɛyɔseɔ nitsumɔhe ko yɛ gbɛ ni waaa nɔ. Buu Mɔɔ okadi lɛ damɔ shi kɛha Watch Tower Bible and Tract Society of Pennsylvania kɛ nitsumɔhei krokomɛi ni yɔɔ ekwɛmɔ shishi lɛ. Christian Congregation of Jehovah’s Witnesses lɛ kɛ Biblia ni agbele mli tsuɔ nii yɛ e-letterhead lɛ nɔ. Gbɛjianɔtoi krokomɛi ni Yehowa Odasefoi lɛ kɛtsuɔ nii lɛ yɛ okadii srɔtoi.

Esaaa akɛ asafoi loo aŋkroaŋkroi kɛ asafo lɛ nitsumɔhei ni mla kpɛlɛɔ nɔ lɛ okadii loo ehenɔ komɛi tsuɔ nii yɛ Maŋtsɛyeli Asai, okadii ni tsɔɔ he ni Maŋtsɛyeli Asai yɔɔ, letterhead, kɛ amɛ diɛŋtsɛ amɛnibii krokomɛi anɔ. Kɛ́ akɛ asafo lɛ okadii lɛ tsu nii yɛ nɛkɛ gbɛ nɔ lɛ, ebaanyɛ efutu maŋ onukpai, shiɛlɔi, kɛ mɛi krokomɛi ayiŋ yɛ srɔtofeemɔ ni yɔɔ mɛi ni kɛtsuɔ nii lɛ kɛ asafo lɛ mla naa gbɛjianɔtoi lɛ teŋ. Nakai nɔŋŋ hu ebaaha mɛi asusu akɛ woji ni aŋmalaa lɛ jɛ jeŋ muu fɛɛ nitsumɔhe yitso lɛ loo nitsumɔhe nine ko.

Esaaa ákɛ akɛ Buu Mɔɔ okadi lɛ loo ehenɔi lɛ tsuɔ nii yɛ Maŋtsɛyeli Asai ni abaamamɔ wɔsɛɛ lɛ he, kɛ́ Maŋtsɛyeli Asa lɛ ji Buu Mɔɔ nitsumɔhe ko nɔ̃ po. Abiii ni asafoi ni yɔɔ Maŋtsɛyeli Asai ni amamɔ momo, ní okadii loo nitɛŋmɔi nɛɛ ekomɛi yɔɔ he lɛ afee tsakemɔi amrɔ nɔŋŋ, akɛni enɛ baabi ni afee tsakemɔi wuji ni baahe be babaoo, ni eha afite shika pii lɛ hewɔ. Shi kɛ́ tsakemɔ fioo ko pɛ abaafee, ni ebiii nitsumɔ babaoo lɛ, no lɛ abaanyɛ afee. Kɛ́ jeee nakai lɛ, abaanyɛ afee kɛ́ be ni ato ni akɛbaasaa Asa lɛ he nibii lɛ shɛ.