Wɔji Odasefoi Be Fɛɛ Be
1. Mɛni wɔbaanyɛ wɔkase kɛjɛ bɔ ni Yesu ye yoo ko odase yɛ nubu lɛ he lɛ mli?
1 Yesu kɛ ŋmɛlɛtswai babaoo enyiɛ. Etɔlɛ, ni kumai hu miiye lɛ. Beni ekaselɔi lɛ etee amɛyaahe niyenii lɛ, eta nubu ko ni yɔɔ Samaria maŋ lɛ sɛɛ lɛ he. Jeee shiɛmɔ hewɔ Yesu yɔɔ Samaria; eeefo mli kɛmiiya Galilea koni eyatsa eshiɛmɔ nitsumɔ lɛ nɔ yɛ jɛmɛ. Shi eŋɔ hegbɛ lɛ kɛye yoo ko ni eba nu yɛɛ lɛ odase. (Yoh. 4:5-14) Mɛni hewɔ? Yesu kã he eji Yehowa ‘odasefonyo anɔkwafo kɛ anɔkwayelɔ.’ (Kpoj. 3:14) Yehowa Odasefoi ni wɔji be fɛɛ be lɛ haa wɔkaseɔ Yesu.—1 Pet. 2:21.
2. Te wɔɔfee tɛŋŋ wɔsaa wɔhe kɛye trukaa odase?
2 Saamɔ Ohe Oto: Wɔbaanyɛ wɔsaa wɔhe kɛye trukaa odase kɛtsɔ asafo lɛ woji ni wɔɔhiɛ yɛ wɔhe be fɛɛ be lɛ nɔ. Shiɛlɔi pii hiɛɔ dɛhiɛmɔ woji yɛ amɛhe ni amɛkɛhaa mɛi ni táa shwapoi anaa, mɛi ni tsuɔ nii yɛ pɛtro hɔɔmɔhei, kɛ mɛi krokomɛi ni amɛkɛkpeɔ yɛ gbi lɛ mli lɛ. (Jaj. 11:6) Nyɛmi yoo ko ni fɔɔ gbɛfãa lɛ bɔɔ mɔdɛŋ akɛ ebaahiɛ Biblia bibioo kɛ Biblia lɛ Tsɔɔ wolo lɛ eko yɛ ebaagi lɛ mli, ni ebɔɔ mɔdɛŋ akɛ ekɛ mɛi ni tara emasɛi lɛ aje sanegbaa shishi.
3. Mɛɛ gbɛ nɔ wɔbaanyɛ wɔtsɔ wɔye odase?
3 Jeee Sanegbaa Shishi: Kɛ́ wɔmiiye trukaa odase lɛ, ehe ehiaaa ni wɔkɛ Ŋmalɛ mli sane ko aje sanegbaa lɛ shishi. Yesu ejieee ehe shi etsɔɔ yoo lɛ yɛ nu bu lɛ he akɛ lɛ ji Mesia lɛ kɛjeee sanegbaa lɛ shishi. Ebi lɛ nu pɛ kɛkɛ, ni ekɛtee emiishɛɛ shi. (Yoh. 4:7-9) Nyɛmi yoo ko yɔse akɛ gbɛ ni tamɔ nakai ni ekɛtsu nii beni abi lɛ kɛji enáa gbijurɔyeli he miishɛɛ lɛ ye bua lɛ ni eje sanegbaa shishi. Nɔ najiaŋ ni eeeha hetoo akɛ ekɛ ehe wooo gbijurɔyeli lɛ mli akɛni eji Yehowa Odasefonyo hewɔ lɛ, ekɛɛ akɛ, “Mi diɛŋtsɛ mikpɛ miyiŋ akɛ miyeŋ gbijurɔ lɛ.” Bei pii lɛ, mɔ ni biɔ sane lɛ biɔ nɔ̃ hewɔ, ni enɛ haa nyɛmi yoo lɛ nyɛɔ eyeɔ lɛ odase.
4. Mɛni hewɔ Mateo 28:18-20 lɛ kanyaa bo lɛ?
4 Eyɛ mli akɛ Yesu gbe eshikpɔŋ lɛ nɔ nitsumɔ ni ekɛ ekãa tsu lɛ naa moŋ, shi eyaa nɔ esusuɔ shiɛmɔ nitsumɔ ni atsuɔ ŋmɛnɛ tamɔ bɔ ni etsu lɛ he. (Mat. 28:18-20) No hewɔ lɛ, taakɛ wɔ-Nɔkwɛmɔnɔ Yesu fee lɛ, wɔji Odasefoi ni efee klalo akɛ wɔbaajaje wɔhemɔkɛyeli lɛ be fɛɛ be.—Heb. 10:23.