Ani Manyɛ Mashiɛ?
1. Mɛni hewɔ esaaa akɛ wɔnuɔ he akɛ wɔnyɛŋ wɔshiɛ lɛ?
1 Kɛ́ óbi ohe sane ni tamɔ nɛkɛ pɛŋ lɛ, ná tsui! Jeee skulyaa loo hesaa krɛdɛɛ ko ni wɔyɔɔ lɛ haa wɔhe saa akɛ shiɛlɔi. Awie mra be mli kaselɔi lɛ ekomɛi ahe akɛ ‘amɛjeee woloŋlelɔi kɛ nilelɔi.’ Shi fɛɛ sɛɛ lɛ, amɛji sanekpakpa shiɛlɔi ni he esa jogbaŋŋ ejaakɛ amɛtswa amɛfai shi akɛ amɛbaanyiɛ Yesu nɔkwɛmɔnɔ lɛ sɛɛ.—Bɔf. 4:13; 1 Pet. 2:21.
2. Mɛni ji gbɛ̀i ni Yesu tsɔ nɔ etsɔɔ nii lɛ ekomɛi?
2 Gbɛ Nɔ ni Yesu Tsɔ Etsɔɔ Nii: Enitsɔɔmɔ lɛ yɛ mlɛo, ni amɛshishinumɔ waaa. Sanebimɔi, nɔkwɛmɔnii, kɛ hiɛkpamɔ wiemɔi ni yɔɔ mlɛo ni ekɛtsu nii lɛ ha etoibolɔi lɛ bo lɛ toi. (Mat. 6:26) Ená mɛi ahe anɔkwa miishɛɛ. (Mat. 14:14) Kɛfata he lɛ, akɛni Yesu le akɛ Yehowa kɛ nitsumɔ ewo dɛŋ, ni éwo lɛ hewalɛ koni enyɛ etsu hewɔ lɛ, ekɛ ekãa wie akɛ mɔ ni yɔɔ hegbɛ.—Luka 4:18.
3. Mɛɛ gbɛ Yehowa yeɔ ebuaa wɔ koni wɔnyɛ wɔtsu wɔshiɛmɔ nitsumɔ lɛ?
3 Yehowa Yeɔ Ebuaa Wɔ: Wɔ-Tsɔɔlɔ Kpeteŋkpele lɛ tsɔɔ e-Wiemɔ lɛ kɛ esafo lɛ nɔ ekɛ tsɔsemɔ ni baaye abua wɔ koni wɔshiɛ sanekpakpa lɛ yɛ omanyeyeli mli lɛ haa wɔ. (Yes. 54:13) Akɛni Yehowa ha aŋma gbɛ nɔ ni Yesu tsɔ etsɔɔ nii lɛ afɔ̃ shi hewɔ lɛ, wɔnyɛɔ wɔkaseɔ gbɛ̀i nɛɛ ni wɔkɛtsuɔ nii. Yehowa haa wɔ emumɔ krɔŋkrɔŋ lɛ, ni etsɔɔ asafoŋ kpeei anɔ etsɔseɔ wɔ. (Yoh. 14:26) Kɛfata he lɛ, ehaa wɔ shiɛlɔi ni yɔɔ niiashikpamɔ ni baanyɛ aye abua wɔ koni wɔhe asa jogbaŋŋ yɛ shiɛmɔ nitsumɔ lɛ mli.
4. Mɛni hewɔ wɔyɔɔ yiŋtoo ni wɔɔdamɔ nɔ wɔnu he akɛ wɔbaanyɛ wɔshiɛ sanekpakpa lɛ wɔha mɛi krokomɛi lɛ?
4 Wɔyɛ yiŋtoo kpakpa ni wɔɔdamɔ nɔ wɔnu he akɛ wɔbaanyɛ wɔshiɛ, ejaakɛ “wɔsalɛ lɛ Nyɔŋmɔ mli ejɛ.” (2 Kor. 3:5) Beni wɔkɛ wɔhe fɔ̃ɔ Yehowa nɔ, ni wɔjɛɔ anɔkwayeli mli wɔkɛ nibii ni ejɛɔ suɔmɔ mli ekɛhaa wɔ lɛ tsuɔ nii lɛ, wɔbaafee mɛi ni ‘asaa amɛ pɛpɛɛpɛ aha nitsumɔ kpakpa fɛɛ nitsumɔ kpakpa.’—2 Tim. 3:17.