Ani Ole Nɔ ni Obaanyɛ Ohala?

Opireshɛn ni afeɔ ni akɛ lá tsuuu nii yɛ mli lɛ miiya nɔ yɛ helatsamɔhei babaoo yɛ jeŋ fɛɛ. Ani ole gbɛi srɔtoi ni atsɔɔ nɔ afeɔ opireshɛn ni akɛ lá tsuuu nii yɛ mli nɛɛ ahe nii babaoo? Ehe miihia ni ole, bɔni afee ni onyɛ odamɔ nɔ okpɛ oyiŋ yɛ helatsamɔ kɛ opireshɛnfeemɔ gbɛi ni obaasumɔ ni ohala lɛ he. Kwɛmɔ vidio ni ji No Blood—Medicine Meets the Challenge lɛ. No sɛɛ lɛ, okɛ sɔlemɔ asusu nibii ni okase lɛ he kɛtsɔ sanebimɔi ni nyiɛ sɛɛ nɛɛ anɔ.—Kadimɔ: Akɛni opireshɛnfeemɔ he mfonirii fioo komɛi yɛ vidio nɛɛ mli hewɔ lɛ, esa akɛ fɔlɔi akwɛ kɛji esa akɛ amɛbii bibii lɛ akwɛ vidio nɛɛ.

(1) Mɛni ji yiŋtoo titri hewɔ ni Yehowa Odasefoi kpoɔ lá ni agbalaa awoɔ mɔ mli lɛ? (2) Yɛ helatsamɔ mli lɛ, mɛni Yehowa Odasefoi shweɔ? (3) Mɛɛ hegbɛ titri helatsɛmɛi yɔɔ yɛ helatsamɔ mli? (4) Mɛni hewɔ nilee yɔɔ mli, ni eji mɔ gbɛnaa nii akɛ ehala nibii ni akɛyeɔ lá ni agbalaa awoɔ mɔ mli lɛ najiaŋ yɛ helatsamɔ mli lɛ? (5) Kɛji lá ho mɔ ko babaoo lɛ, mɛɛ nibii titrii enyɔ ni he hiaa waa datrɛfoi feɔ? (6) Mɛɛ otii ejwɛ akɛ nibii ni akɛyeɔ lá ni agbalaa awoɔ mɔ mli najiaŋ lɛ tsuɔ he nii? (7) Mɛɛ gbɛ nɔ datrɛfoi baanyɛ atsɔ ni (a) amɛkaha lá pii miiho mɔ ko, (b) amɛbaa walayibii tsuji ni yɔɔ mɔ ko mli lɛ yi, (d) amɛha gbɔmɔtso lɛ diɛŋtsɛ afee lá pii, kɛ (e) amɛbaa lá ni hoɔ mɔ lɛ yi? (8) Tsɔɔmɔ nifeemɔi enyɔ ni nyiɛ sɛɛ nɛɛ amli (a) hemodilution kɛ (b) cell salvage. (9) Mɛni esa akɛ ole yɛ nibii ni akɛyeɔ lá ni agbalaa awoɔ mɔ mli lɛ najiaŋ lɛ eko ni ooohala lɛ he? (10) Ani abaanyɛ afee opireshɛn ko ni efeemɔ wa ni akɛ lá tsuuu nii? (11) Mɛni datrɛfoi babaoo feɔ bianɛ ni ehi jogbaŋŋ?

Mɔ fɛɛ mɔ baadamɔ ehenilee ni Biblia lɛ etsɔse lɛ nɔ ekpɛ eyiŋ yɛ helatsamɔ gbɛi komɛi ni je kpo yɛ vidio lɛ mli lɛ ateŋ nɔ ni ebaakpɛlɛ nɔ lɛ he. Ani okpɛ oyiŋ yɛ nibii ni akɛyeɔ lá ni agbalaa awoɔ mɔ mli najiaŋ lɛ amli nɔ ni obaasumɔ ni akɛtsu nii aha bo kɛ obii lɛ he, ni ani oŋmala DPA wolo lɛ nɔ nii? Kɛha sane nɛɛ mlitsɔɔmɔ jogbaŋŋ lɛ, kwɛmɔ “Sanebimɔi ni Jɛ Kanelɔi Adɛŋ” ni yɔɔ June 15, 2004, kɛ October 15, 2000 Buu-Mɔɔ srɔtoi lɛ amli lɛ mli. No sɛɛ lɛ, okɛ nɔ ni aŋma ahɔ December 2006 Wɔ Maŋtsɛyeli Sɔɔmɔ lɛ mli ni yitso ji “Te Mibuɔ Nibii ni Anáa Kɛjɛɔ Nibii Titrii Ejwɛ ni Feɔ Lá kɛ Helatsamɔ Nifeemɔi ni akɛ Mi Diɛŋtsɛ Milá Baatsu Nii yɛ Mli lɛ Mihaa Tɛŋŋ?” lɛ atsu nii kɛhala helatsamɔ gbɛi ni bo diɛŋtsɛ obaasumɔ kɛ nɔ ni osumɔŋ. Naagbee lɛ, bɔɔ mɔdɛŋ akɛ obaaŋmala oyiŋkpɛɛ lɛ jogbaŋŋ owo DPA wolo lɛ nɔ. Esa akɛ oha ogbɔmɔtsoŋ hewalɛnamɔ najiaŋdamɔlɔi kɛ owekumɛi ni amɛjeee Odasefoi lɛ ale oyiŋkpɛɛ lɛ he saji fitsofitso.