Feemɔ Yelikɛbualɔ Kpakpa yɛ Shinaa lɛ Naa
1. Kɛ́ mɔ ko fata wɔhe kɛtsu nii yɛ shiɛmɔ nitsumɔ lɛ mli lɛ, mɛɛ sɛɛnamɔi jɛɔ mli kɛbaa?
1 Be ko lɛ, Yesu tsu kaselɔi 70 akɛ amɛyashiɛ, ni “etsu amɛ enyɔnyɔ.” (Luka 10:1) Ekã shi faŋŋ akɛ gbɛjianɔtoo nɛɛ ha kaselɔi lɛ ye ebua amɛhe, ni amɛwowoo amɛhe hewalɛ beni amɛshiɛɔ lɛ. Kɛ́ wɔfata shiɛlɔ ko he kɛtee shiɛmɔ lɛ, mɛɛ yelikɛbuamɔ wɔbaanyɛ wɔkɛha?
2. Kɛ́ mɔ ni fata wɔhe lɛ kɛ eshiɛmɔ wiemɔ lɛ miiha lɛ, mɛɛ gbɛ nɔ wɔɔtsɔ wɔbo lɛ toi, ni mɛni hewɔ?
2 Kɛtsɔ Sane Toiboo Nɔ: Bó mɔ ni fata ohe lɛ toi jogbaŋŋ beni ekɛ eshiɛmɔ wiemɔ lɛ haa lɛ. (Yak. 1:19) Kɛ́ aakane ŋmalɛ ko lɛ, gbelemɔ o-Biblia lɛ ni onyiɛ sɛɛ. Kɛ́ mɔ ni fata ohe lɛ loo shiatsɛ lɛ miiwie lɛ, kwɛmɔ ehiɛ. Kɛ́ obo sanegbaa lɛ toi jogbaŋŋ lɛ, ebaanyɛ ewo shiatsɛ lɛ hu hewalɛ ni efee nakai nɔŋŋ.
3. Mɛɛ be ekolɛ mɔ ni wɔfata ehe lɛ baasumɔ akɛ wɔ hu wɔwie?
3 Kɛtsɔ Le ni Ooole Be ni Esa Akɛ Owie lɛ Nɔ: Kɛ́ wɔkɛ mɔ ko nyiɛ ni ekɛ eshiɛmɔ wiemɔ miiha lɛ, wɔjieɔ bulɛ kpo wɔtsɔɔ lɛ kɛ́ wɔŋmɛ lɛ gbɛ ni ewie. (Rom. 12:10) Esaaa akɛ wɔfolɔɔ esane lɛ mli. Kɛ́ ehiɛ kpá nɔ ni etaoɔ ewie lɛ nɔ lɛ, loo shiatsɛ lɛ ekpɛlɛɛɛ sane ko nɔ loo ebi sane ko ni mɔ ni fata wɔhe lɛ bi yelikɛbuamɔ lɛ, wɔbɔɔ mɔdɛŋ akɛ wɔbaawie sane ni kɔɔ nɔ ni ewieɔ he lɛ nɔŋŋ he moŋ fe ni wɔɔwie sane kroko he. (Abɛi 16:23; Jaj. 3:1, 7) Kɛ́ wɔmiiwie lɛ, esa akɛ nɔ ni wɔwieɔ lɛ afĩ odase ni ayeɔ lɛ sɛɛ.—1 Kor. 14:8.
4. Mɛni baaha miishɛɛ kɛ omanye ni wɔyeɔ yɛ shiɛmɔ nitsumɔ lɛ mli aya hiɛ?
4 Beni kaselɔi 70 ni atsu amɛ enyɔɔnyɔ lɛ gbe shiɛmɔ lɛ naa lɛ, ‘amɛku amɛsɛɛ amɛba kɛ miishɛɛ.’ (Luka 10:17) Wɔ hu wɔbaaná miishɛɛ, ni wɔbaaye omanye yɛ shiɛmɔ nitsumɔ lɛ mli kɛ́ wɔbo sane toi ni wɔyɔse be ni esa akɛ wɔwie kɛ́ wɔmiiye wɔmiibua mɛi ni wɔkɛ amɛshiɛɔ yɛ shinaa lɛ naa lɛ.