Ha Onitsɔɔmɔ Afee nɔ ni Tsɔɔ Mɔ Yiŋ
1. Mɛni Nyɔŋmɔ Wiemɔ lɛ ni akɛaatsu nii jogbaŋŋ yɛ shiɛmɔ nitsumɔ lɛ mli lɛ biɔ ni afee?
1 Shiɛlɔi ni he esa, tamɔ bɔfo Paulo ji lɛ, le akɛ ‘anɔkwale wiemɔ lɛ ní abaatsɔɔ lɛ pɛpɛɛpɛ’ lɛ biɔ babaoo fe wiemɔi ayisɛɛ pɛ kɛkɛ ni aaatsɛ kɛjɛ Ŋmalɛ Krɔŋkrɔŋ lɛ mli. (2 Tim. 2:15) Kɛ́ wɔkɛ Nyɔŋmɔ Wiemɔ lɛ miitsu nii lɛ, mɛɛ gbɛ nɔ wɔbaatsɔ ‘wɔtsɔ mɛi ayiŋ’ yɛ wɔnitsɔɔmɔ lɛ mli?—Bɔf. 28:23.
2. Te wɔɔfee tɛŋŋ wɔha mɛi aná hiɛsɔɔ babaoo kɛha Nyɔŋmɔ Wiemɔ lɛ?
2 Ha Nyɔŋmɔ Wiemɔ lɛ Awie: Klɛŋklɛŋ lɛ, gbalamɔ jwɛŋmɔ kɛya Biblia lɛ nɔ yɛ gbɛ ni baaha toibolɔi lɛ aná bulɛ kɛha nilee ni jɛ Nyɔŋmɔ ŋɔɔ ni yɔɔ mli lɛ nɔ. Hekɛnɔfɔ̃ɔ ni wɔyɔɔ yɛ Nyɔŋmɔ Wiemɔ lɛ mli lɛ baanyɛ akanya wɔtoibolɔ lɛ koni ebo toi jogbaŋŋ beni wɔkaneɔ ŋmalɛ ko lɛ. (Heb. 4:12) Wɔbaanyɛ wɔkɛɛ nɔ ko tamɔ: “Mina akɛ sɛɛnamɔ yɛ he akɛ male Nyɔŋmɔ susumɔ yɛ sane nɛɛ he. Kadimɔ nɔ ni e-Wiemɔ lɛ kɛɔ.” Be fɛɛ be ni shihilɛ lɛ baaŋmɛ gbɛ lɛ, ha Nyɔŋmɔ Wiemɔ lɛ awie, kɛtsɔ sane lɛ ni obaakane kɛjɛ mli tɛ̃ɛ lɛ nɔ.
3. Kɛ́ wɔkane ŋmalɛ ko wɔgbe naa lɛ, mɛni wɔbaanyɛ wɔfee kɛye wɔbua wɔtoibolɔ lɛ koni enu shishi?
3 Nɔ ni ji enyɔ lɛ, gbálamɔ ŋmalɛ ni okɛtsu nii lɛ mli. Ewa kɛha mɛi babaoo akɛ amɛaanu ŋmalɛ ko ni klɛŋklɛŋ kwraa ni amɛnuɔ ni akaneɔ lɛ shishi. Bei pii lɛ, ehe baahia ni wɔtsɔɔ bɔ ni ŋmalɛ lɛ kɔɔ sane ni asusuɔ he lɛ he lɛ mli. (Luka 24:26, 27) Ha otii ni yɔɔ mli lɛ afee faŋŋ. Ekolɛ sane ko ni obaabi lɛ baanyɛ atsɔɔ kɛji mɔ lɛ enu oti ni yɔɔ ŋmalɛ lɛ mli lɛ shishi.—Abɛi 20:5; Bɔf. 8:30.
4. Mɛni ji naagbee oti ni he hiaa bɔni afee ni wɔnyɛ wɔtsɔ mɛi ayiŋ kɛ́ wɔmiitsɔɔ nii?
4 Nyɛsusua Ŋmalɛi lɛ Ahe: Nɔ ni ji etɛ lɛ, bɔɔ mɔdɛŋ ni oha enu shishi jogbaŋŋ ní oshɛ etsui he. Ye obua shiatsɛ lɛ koni ena bɔ ni ŋmalɛ ni nyɛkane lɛ kɔɔ lɛ diɛŋtsɛ ehe. Ŋmalɛi lɛ ahe ni wɔɔsusu lɛ baanyɛ atsɔ mɔ ko yiŋ koni etsake esusumɔ. (Bɔf. 17:2-4; 19:8) Ákɛ nɔkwɛmɔnɔ lɛ, kɛ́ wɔkane Lala 83:19 sɛɛ lɛ, wɔbaanyɛ wɔsusu bɔ ni mɔ ko gbɛi ni wɔbaale lɛ baanyɛ aha naanyobɔɔ ko abakã wɔ kɛ mɔ lɛ teŋ lɛ he. No sɛɛ lɛ, obaanyɛ obi akɛ, “Osusuɔ akɛ kɛ́ ole Nyɔŋmɔ gbɛi lɛ ebaaha shishinumɔ aba osɔlemɔi ahe?” Ŋmalɛi lɛ ni wɔkɛaato shiatsɛ lɛ shihilɛ he yɛ nɛkɛ gbɛ nɔ lɛ haa anaa sɛɛnamɔ ni yɔɔ ŋmalɛ lɛ he. Nitsɔɔmɔ ni jɛ Nyɔŋmɔ Wiemɔ lɛ mli ni tsɔɔ mɔ yiŋ nɛkɛ lɛ gbalaa mɛi ni tsui ja lɛ koni amɛbajá Yehowa, ni ji anɔkwa Nyɔŋmɔ kɛ Nyɔŋmɔ hiɛkalɔ lɛ.—Yer. 10:10.