Ehe Miihia ni Kristofoi Shiɛlɔi Asɔle
1. Mɛni he hiaa bɔni afee ni wɔnyɛ wɔgbe wɔsɔɔmɔ nitsumɔ lɛ naa?
1 Wɔnyɛŋ wɔtsu sɔɔmɔ nitsumɔ lɛ wɔgbe naa yɛ wɔ diɛŋtsɛ wɔhewalɛ naa. Yehowa haa wɔ nyɛmɔ ní wɔkɛtsu nitsumɔ lɛ. (Fil. 4:13, Ga Biblia hee) Ehaa ebɔfoi lɛ yeɔ amɛbuaa wɔ kɛtaoɔ mɛi ni hiɛ gwantɛŋ su lɛ. (Kpoj. 14:6, 7) Yehowa ji mɔ ni haa anɔkwale wui ni wɔduɔ ni wɔshwieɔ nɔ nu lɛ shwereɔ. (1 Kor. 3:6, 9) Belɛ, ehe miihia jogbaŋŋ ni Kristofoi shiɛlɔi abɛŋkɛ wɔŋwɛi Tsɛ lɛ yɛ sɔlemɔ mli!
2. Mɛni ji nibii komɛi ni wɔbaanyɛ wɔsɔle yɛ he?
2 Kɛha Wɔ Diɛŋtsɛ Wɔhe: Be fɛɛ be ni wɔbaaya shiɛmɔ lɛ, esa akɛ wɔsɔle. (Efe. 6:18) Mɛni ji nibii komɛi ni wɔbaanyɛ wɔsɔle yɛ he? Wɔbaanyɛ ni wɔsɔle koni wɔná ekãa kɛ mɛi ni yɔɔ wɔshikpɔŋkuku lɛ mli lɛ ahe jwɛŋmɔ kpakpa. (Bɔf. 4:29) Wɔbaanyɛ wɔbi Yehowa ni etsɔɔ wɔ gbɛ kɛya mɛi ni hiɛ tsui kpakpa ni wɔbaanyɛ wɔkɛ amɛ akase Biblia lɛ aŋɔɔ. Kɛ́ shĩatsɛ lɛ bi wɔ sane ko lɛ, wɔbaanyɛ wɔsɔle kuku yɛ wɔyitsoŋ kɛbi Yehowa ni eye ebua wɔ koni wɔnyɛ wɔha lɛ hetoo ni sa. (Neh. 2:4) Wɔbaanyɛ wɔsɔle hu kɛbi nilee koni wɔnyɛ wɔkɛ wɔsɔɔmɔ nitsumɔ lɛ aye klɛŋklɛŋ gbɛhe. (Yak. 1:5) Kɛfata he lɛ, Yehowa nyaa he waa kɛji wɔda lɛ shi yɛ hegbɛ ni wɔná akɛ esɔɔlɔi lɛ he.—Kol. 3:15.
3. Kɛ́ wɔsɔle wɔha mɛi krokomɛi lɛ, mɛɛ gbɛ nɔ ehaa shiɛmɔ nitsumɔ lɛ shwereɔ?
3 Kɛha Mɛi Krokomɛi: Esa akɛ ‘wɔsɔle wɔha wɔhe,’ ni kɛ ebaahi lɛ, wɔtsi wɔnyɛmimɛi Kristofoi lɛ agbɛ́i atã po yɛ wɔsɔlemɔi amli. (Yak. 5:16; Bɔf. 12:5) Ani hela haaa onyɛ otsu babaoo yɛ shiɛmɔ nitsumɔ lɛ mli? Kɛ́ nakai ni lɛ, sɔlemɔ oha onyɛmimɛi Kristofoi ni yɔɔ gbɔmɔtsoŋ hewalɛ lɛ. Kaasusu kɔkɔɔkɔ akɛ osɔlemɔi lɛ nyɛŋ nɔ ko atsu aha onyɛmimɛi Kristofoi lɛ! Ehi hu akɛ wɔɔsɔle wɔha nɔyelɔi lɛ ni amɛkate shi amɛwo wɔshiɛmɔ nitsumɔ lɛ, bɔni afee ni wɔnyɛmimɛi lɛ ‘ahi shi kpoo yɛ hejɔlɛ mli.’—1 Tim. 2:1, 2.
4. Mɛni hewɔ esa akɛ wɔhiɛ sɔlemɔ mli daa lɛ?
4 Sanekpakpa lɛ ni aaashiɛ atsɔɔ je nɛŋ fɛɛ lɛ ji nitsumɔ kpele diɛŋtsɛ. Kɛ́ ‘wɔhiɛ sɔlemɔ mli daa’ lɛ, Yehowa baaye ebua wɔ ni wɔtsu nitsumɔ lɛ wɔgbe naa.—Rom. 12:12.