Nɔ ni He Hiaa Wɔ Fe Fɛɛ
1. Mɛɛ gbɛ nɔ Yesu tsɔɔ akɛ sɔɔmɔ nitsumɔ lɛ ji nɔ ni he hiaa lɛ fe fɛɛ?
1 Yesu bu sɔɔmɔ nitsumɔ lɛ akɛ nɔ ni he hiaa lɛ fe fɛɛ. Ekɛ enyɛmɔ fɛɛ tsu, enyiɛ kilomitai ohai abɔ kɛkpa Palestina fɛɛ ni eshiɛ eha mɛi babaoo. Eha eshihilɛ fee mlɛo bɔni afee ni enyɛ ekɛ be babaoo atsu sɔɔmɔ nitsumɔ lɛ, ni ekɛ ejwɛŋmɔ ama nɔ. (Mat. 8:20) Beni asafoi lɛ bɔ mɔdɛŋ ni amɛtsĩ enaa koni etsa amɛhelai lɛ eha amɛ lɛ, ekɛɛ akɛ: “Esa akɛ miyajajeɔ Nyɔŋmɔ maŋtsɛyeli lɛ he sanekpakpa lɛ mitsɔɔ maji krokomɛi hu, ejaakɛ no hewɔ atsu mi.”—Luka 4:43.
2. Mɛni hewɔ Yesu bu sɔɔmɔ nitsumɔ lɛ akɛ nɔ ni he hiaa lɛ fe fɛɛ lɛ?
2 Mɛni hewɔ Yesu bu sɔɔmɔ nitsumɔ lɛ akɛ nɔ ni he hiaa lɛ fe fɛɛ lɛ? Nɔ ni kã etsui nɔ titri ji Yehowa gbɛ́i lɛ hetsemɔ. (Mat. 6:9) Esumɔ eŋwɛi Tsɛ lɛ, ni no hewɔ lɛ esumɔ akɛ efee E-suɔmɔnaa nii ni eye E-kitai lɛ fɛɛ nɔ. (Yoh. 14:31) Kɛfata he lɛ, esusu gbɔmɛi ahe jogbaŋŋ ni esumɔ akɛ eye ebua amɛ.—Mat. 9:36, 37.
3. Te wɔɔfee tɛŋŋ wɔtsɔɔ akɛ sɔɔmɔ nitsumɔ lɛ ji nɔ ni he hiaa wɔ fe fɛɛ lɛ?
3 Kasemɔ Yesu: Ebɛ mlɛo akɛ wɔɔha sɔɔmɔ nitsumɔ lɛ afee nɔ ni he hiaa wɔ fe fɛɛ taakɛ Yesu fee lɛ, ejaakɛ nibii ni yɔɔ je lɛŋ lɛ heɔ wɔbe waa, ni amɛgbalaa wɔjwɛŋmɔ kɛjɛɔ sɔɔmɔ nitsumɔ lɛ nɔ. (Mat. 24:37-39; Luka 21:34) No hewɔ lɛ, esa akɛ wɔyoo nii ni he hiaa titri lɛ, ni wɔto wɔbe he gbɛjianɔ koni wɔnyɛ wɔsaa wɔhe kɛha shiɛmɔ nitsumɔ lɛ ni wɔkɛ wɔhe awo mli daa. (Fil. 1:10) Wɔbɔɔ mɔdɛŋ koni wɔha wɔshihilɛ afee mlɛo ni agbɛnɛ hu, wɔkɛ je lɛ akatsu nii kɛmɔ shi.—1 Kor. 7:31.
4. Mɛni hewɔ esa akɛ wɔkɛ nɔ ni he hiaa diɛŋtsɛ lɛ aye klɛŋklɛŋ gbɛhe lɛ?
4 Gbɔmɔ ni le nii lɛ kɛ nɔ ni he hiaa lɛ fe fɛɛ lɛ yeɔ klɛŋklɛŋ gbɛhe kɛji ena akɛ be ni eyɔɔ lɛ faaa. Ákɛ nɔkwɛmɔnɔ lɛ, kɛ́ ená ele akɛ ahum ko ni naa wa miiba abatswa lɛ, ekɛ ebe kɛ enyɛmɔ baato gbɛjianɔ koni ekɛbu eweku lɛ he, ni agbɛnɛ hu ebɔ ekutsoŋbii lɛ kɔkɔ. Ebaatsi nibii ni he ehiaaa tsɔ lɛ efɔ̃ afã dã. Be ni eshwɛ ni Harmagedon ahum lɛ baatswa lɛ faaa dɔŋŋ. (Zef. 1:14-16; 1 Kor. 7:29) Bɔni afee ni wɔhere wɔ diɛŋtsɛ kɛ mɛi ni boɔ wɔ toi lɛ ayiwala lɛ, esa akɛ wɔhiɛ ahi wɔhe nɔ kɛ wɔnitsɔɔmɔ lɛ nɔ yɛ asafo lɛ mli kɛ hei krokomɛi hu. (1 Tim. 4:16) Hɛɛ, kɛ́ abaabaa wɔyi lɛ, edamɔ sɔɔmɔ nitsumɔ lɛ ni wɔkɛaaye klɛŋklɛŋ gbɛhe lɛ nɔ!