Mɛni Okɛyeɔ Klɛŋklɛŋ Gbɛhe?
1 Jamɔŋ gbɛjianɔtoi babaoo maa he ni akɛwoɔ ejurɔfeemɔ nitsumɔi, tamɔ tsũi ni amamɔɔ kɛha wolokasemɔ loo kɛha tsofafeemɔ mli hiamɔ nii lɛ anɔ mi. Shi kɛlɛ, yɛ be mli ni Yehowa Odasefoi ahiɛ kpaaa ‘ejurɔfeemɔ kɛ nikee nɔ’ lɛ, amɛkɛ mumɔŋ yelikɛbuamɔ ni amɛkɛhaa mɛi lɛ yeɔ klɛŋklɛŋ gbɛhe.—Heb. 13:16.
2 Klɛŋklɛŋ Afii 100 lɛ Mli Nɔkwɛmɔnɔ Lɛ: Yesu tsu nitsumɔi kpakpai babaoo yɛ eshikpɔŋ lɛ nɔ sɔɔmɔ nitsumɔ lɛ mli, shi enitsumɔ titri ji ni eye anɔkwale lɛ he odase. (Luka 4:43; Yoh. 18:37; Bɔf. 10:38) Efã esɛɛnyiɛlɔi lɛ akɛ: ‘No hewɔ lɛ nyɛyaa ni nyɛyafea jeŋmaji fɛɛ mikaselɔi, ni nyɛtsɔɔ amɛ nii.’ (Mat. 28:19, 20) Ni etsɔɔ mli akɛ mɛi ni heɔ enɔ yeɔ lɛ baatsu nitsumɔ ni eje shishi lɛ yɛ gbɛ ni da nɔ. (Yoh. 14:12) Yesu kɛ shiɛmɔ nitsumɔ lɛ ye klɛŋklɛŋ gbɛhe ejaakɛ eyeɔ ebuaa mɛi koni amɛkase yiwalaheremɔ gbɛ lɛ he nii.—Yoh. 17:3.
3 Bɔfo Paulo bu eshiɛmɔ nitsumɔ lɛ akɛ eji ‘hiamɔ nii,’ taomɔ nii ko ni enyɛŋ eku ehiɛ efɔ̃ nɔ. (1 Kor. 9:16, 17) Eesumɔ akɛ esha afɔle fɛɛ afɔle, eto etsui shi yɛ kaai fɛɛ mli, loo ni ekɛ jaramɔ shihilɛi fɛɛ ni sa lɛ akpe bɔni afee ni egbe esɔɔmɔ nitsumɔ lɛ naa. (Bɔf. 20:22-24) Bɔfo Petro kɛ ehefatalɔi lɛ jie mumɔ ni tamɔ nakai nɔŋŋ kpo. Yɛ tsuŋwoo kɛ yii fɛɛ sɛɛ lɛ, “amɛfɔ̃ɔɔ nitsɔɔmɔ kɛ Yesu Kristo shiɛmɔ.”—Bɔf. 5:40-42.
4 Ni wɔ hu? Ani wɔkɛ Maŋtsɛyeli sanekpakpa jajemɔ lɛ kɛ kaselɔi afeemɔ nitsumɔ lɛ yeɔ klɛŋklɛŋ gbɛhe? Taakɛ Yesu ji lɛ, ani wɔsusuɔ mɛi ni “etɔ amɛ ni amɛfee yuyaa tamɔ tooi ni bɛ kwɛlɔ lɛ” ahe yɛ anɔkwayeli mli? (Mat. 9:36) Nibii ni yaa nɔ yɛ je lɛŋ amrɔ nɛɛ kɛ Biblia gbalɛ feɔ lɛ faŋŋ akɛ etsɛŋ ni nibii agbɛjianɔtoo fɔŋ nɛɛ baaba naagbee! Ní wɔɔha bɔ ni shiɛmɔ nitsumɔ lɛ he hiaa ha lɛ ahi wɔjwɛŋmɔ mli lɛ baatsirɛ wɔ ni wɔya nɔ wɔshiɛ kɛ ekãa.
5 Pɛimɔ Oshihilɛ Mli Okwɛ: Akɛni bei pii lɛ aŋkroaŋkroi ashihilɛi tsakeɔ hewɔ lɛ, eji nɔ ni hi akɛ yɛ be kɛ bei amli lɛ wɔɔsusu he kɛji wɔbaanyɛ wɔfee tsakemɔi yɛ wɔshihilɛ mli bɔni afee ni wɔna gbɛfaŋnɔ babaoo yɛ shiɛmɔ nitsumɔ lɛ mli. Nyɛmi yoo ko ni no mli lɛ eji gbɛgbalɔ yɛ afi 1950 afii lɛ amli, afi 1960 afii lɛ amli, kɛ afi 1970 afii lɛ amli lɛ na akɛ ehe miihia ni ekpa gbɛgbamɔ nitsumɔ lɛ yɛ hela hewɔ. Kɛlɛ, yɛ be ni sa mli lɛ ená gbɔmɔtsoŋ hewalɛ saŋŋ. Nyɛsɛɛ nɛɛ, esaa epɛi eshihilɛ mli, ni ena akɛ ebaanyɛ ni ekɛ ehe awo gbɛgbamɔ nitsumɔ lɛ mli ekoŋŋ. Kwɛ miishɛɛ ni ená yɛ be mli ni eye afii 90 ni etee Gbɛgbamɔ Sɔɔmɔ Skul lɛ! Ni bo hu? Ani eshwɛ fioo ni obaaba nitsumɔ mli hejɔɔmɔ loo ni obaagbe skul naa? Ani tsakemɔ ni baaba oshihilɛ mli lɛ baaŋmɛ bo gbɛ ni okɛ ohe awo gbɛgbamɔ nitsumɔ lɛ mli?
6 Beni Yesu na akɛ Marta ‘miigbá ehe naa tuutu yɛ sɔɔmɔ pii hewɔ’ lɛ, ekɛ mlihilɛ wo lɛ ŋaa akɛ ebaaná jɔɔmɔi babaoo kɛ́ efee nii yɛ gbɛ ni yɔɔ mlɛo nɔ. (Luka 10:40-42) Ani obaanyɛ oha oshihilɛ afee nɔ ni yɔɔ mlɛo? Ani ehe miihia diɛŋtsɛ ni wu kɛ ŋa fɛɛ atsu nyɔŋgbele nitsumɔ? Kɛji afee tsakemɔi yɛ shihilɛ lɛ mli lɛ, ani mɔ kome nyɔmɔwoo baanyɛ akwɛ weku lɛ? Mɛi pii ená tsakemɔi ni amɛfee yɛ amɛshihilɛi amli bɔni afee ni amɛná gbɛfaŋnɔ babaoo yɛ sɔɔmɔ nitsumɔ lɛ mli lɛ he sɛɛ yɛ mumɔŋ.
7 Eba akɛ wɔ fɛɛ wɔɔnyiɛ nɔkwɛmɔnɔ ni Yesu kɛ bɔfoi lɛ fee amɛfɔ̃ shi lɛ sɛɛ! Wɔbaanyɛ wɔná nɔmimaa akɛ Yehowa baajɔɔ mɔdɛŋ ni wɔbɔɔ yɛ anɔkwayeli mli koni wɔná gbɛfaŋnɔ babaoo yɛ nitsumɔ ni he hiaa ni ji Maŋtsɛyeli lɛ he sanekpakpa lɛ shiɛmɔ lɛ mli lɛ nɔ.—Luka 9:57-62.