Ani Osaa Obii lɛ Oto?
1. Mɛni hewɔ ehe hiaa ni asaa gbekɛbii ni yaa skul lɛ ato lɛ?
1 Eshwɛ fioo ni skul afi hee baaje shishi. Ekã shi faŋŋ akɛ obii lɛ kɛ naagbai kɛ nɔnyɛi heei baakpe. Amɛbaaná hegbɛi heei hu ‘kɛye anɔkwale lɛ he odase.’ (Yoh. 18:37) Ani osaa amɛ oto?
2. Mɛni esa akɛ obii lɛ ale bɔni afee ni amɛkɛsaa amɛhe amɛto?
2 Ani obii lɛ le nibii ni kɛ́ mɔ ko fee lɛ etsɔɔ akɛ ekɛ ehe miiwo maŋhedɔɔ nifeemɔi kɛ wɔŋjamɔ gbii juji amli, ni amɛnuɔ nɔ hewɔ ni esaaa akɛ amɛkɛ amɛhe woɔ mli lɛ shishi faŋŋ? Ani amɛsaa amɛhe amɛto amɛnɔ ni abaanyɛ akɛ amɛtiu yunivɛsiti wolokasemɔ, nuu kɛ yoo teŋ naanyobɔɔ, dãanumɔ, loo tsofai ni mla egu amɛ kɛ nitsumɔ lɛ sɛɛ? Ani amɛbaakɛɛ kɛkɛ akɛ amɛjamɔ lɛ ekpɛlɛɛɛ nifeemɔi nɛɛ anɔ, aloo amɛbaanyɛ amɛgbála nibii ni amɛheɔ amɛyeɔ lɛ amli?—1 Pet. 3:15.
3. Mɛɛ gbɛ nɔ fɔlɔi baanyɛ atsɔ amɛgbɛkɛ Weku Jamɔ lɛ nɔ amɛsaa amɛbii lɛ amɛto?
3 Okɛ Gbɛkɛ Weku Jamɔ lɛ Atsu Enɛ He Nii: Eji anɔkwale akɛ, okɛ obii lɛ baasusu saji ahe yɛ skul afi lɛ mli fɛɛ bɔ ni he baahia. Kɛ́ obɔ mɔdɛŋ waa okɛ amɛ susu naagbai ni amɛbaanyɛ amɛkɛkpe yɛ skul lɛ ahe dani amɛgbele gbɛ lɛ, ebaaha amɛfee ekãa. Mɛni hewɔ okɛ gbɛkɛ Weku Jamɔ lɛ ekome loo enyɔ tsuuu enɛ he nii? Obaanyɛ obi obii lɛ ni amɛtsɔɔ bo nɔ ni amɛnyaaa he kwraa kɛ́ ayaagbele skul gbɛ. Amrɔ nɛɛ ni obii lɛ ajwɛŋmɔŋ egbele fe tsutsu lɛ, nyɛbaanyɛ nyɛtĩ nibii komɛi ni nyɛsusu he momo yɛ afii ni eho lɛ amli lɛ amli. (Lala 119:95) Obaanyɛ ofee ohe skul tsɔɔlɔ, skulbii aŋaawolɔ, loo skulbii lɛ ateŋ mɔ kome, ni nyɛkɛfee shihilɛi ni amɛbaanyɛ amɛkɛkpe lɛ ahe nɔkwɛmɔnɔ. Tsɔɔmɔ obii lɛ bɔ ni amɛaafee amɛkɛ Biblia lɛ atsu nii kɛha saji ahetoo, kɛ bɔ ni amɛaafee amɛkɛ woji tamɔ Reasoning kɛ Young People Ask lɛ atsu nii. Fɔlɔ ko fee bɔ ni ebii lɛ baanyɛ amɛya amɛtsɔɔlɔi heei lɛ aŋɔɔ yɛ skul afi lɛ shishijee mli ní amɛha amɛle akɛ Yehowa Odasefoi ji amɛ lɛ he nɔkwɛmɔnii srɔtoi ni ekɛsaa ebii lɛ eto.—Kwɛmɔ December 15, 2010, Buu-Mɔɔ, baafa 3-5 lɛ mli.
4. Mɛni fɔlɔi ni hiɛ kã shi lɛ feɔ?
4 Kristofoi oblahii kɛ oblayei kɛ naagbai ni ‘jaraa’ ni miiya nɔ eewo wu miikpe yɛ naagbee gbii nɛɛ amli. (2 Tim. 3:1) Fɔlɔi ni hiɛ kã shi lɛ tsɔɔ hiɛ amɛsusuɔ naagbai ni ekolɛ amɛbii lɛ kɛbaakpe lɛ ahe, ni amɛsaa amɛbii lɛ amɛtoɔ. (Abɛi 22:3) Dani skul afi hee lɛ baaje shishi lɛ, feemɔ bɔ fɛɛ bɔ ni ooonyɛ kɛsaa obii lɛ oto.