Afee Wɔwoji Tɛtrɛbii lɛ Bɔ ni Mɛi Pii Baanya He
1. Mɛɛ gbɛ nɔ tsulɔ anɔkwafo kɛ nilelɔ kuu lɛ kaseɔ bɔfo Paulo?
1 Taakɛ bɔ ni bɔfo Paulo tsake gbɛ ni etsɔ nɔ eshiɛ lɛ mli bɔni afee ni enine ashɛ “mɛi fɛɛ” nɔ lɛ, nakai nɔŋŋ tsulɔ anɔkwafo kɛ nilelɔ kuu lɛ kɛ wɔwoji tɛtrɛbii lɛ tsuɔ ni bɔni afee ni amɛnine ashɛ gbɔmɛi ni jɛ shihilɛi srɔtoi amli ni hiɛ hemɔkɛyelii srɔtoi hu lɛ anɔ. (1 Kor. 9:22, 23) Bɔni afee ni wɔkɛ Buu-Mɔɔ kɛ Awake! lɛ atsu nii jogbaŋŋ lɛ, esa akɛ wɔha mɛi ahewɔ ni aŋmala woji nɛɛ ahi wɔjwɛŋmɔŋ.
2. Namɛi aŋmaa Awake! lɛ ahaa?
2 Awake!: Mɛi ahewɔ ni aŋmaa wolo nɛɛ tamɔ “Ateenebii” ni bɔfo Paulo kɛgba sane lɛ nɔŋŋ. (Bɔf. 17:22) Nakai hii lɛ leee Kristojamɔ he nɔ ko kwraa, ni nɔ ko fioo pɛ amɛle yɛ Ŋmalɛi lɛ ahe. Nakai nɔŋŋ hu mɛi ahewɔ ni aŋmaa Awake! lɛ yɛ Biblia lɛ he nilee fioo ko loo amɛbɛ eko kwraa. Ekolɛ amɛleee Kristofoi atsɔɔmɔi lɛ, ni amɛheee nyɔŋmɔjamɔ amɛyeee, loo amɛleee akɛ Biblia lɛ he yɛ sɛɛnamɔ waa. Yiŋtoo titri kome hewɔ ni aŋmaa Awake! lɛ ji, ni akɛkɔne mɛi ni kaneɔ lɛ ayiŋ akɛ anɔkwa Nyɔŋmɔ ko yɛ. Yiŋtoo kroko hu hewɔ ni aŋmaa wolo tɛtrɛɛ nɛɛ ji, ni eha aná hemɔkɛyeli yɛ Biblia lɛ mli, ni mɔ ni kaneɔ lɛ ana akɛ esoro Yehowa Odasefoi yɛ jamɔi krokomɛi ahe.
3. Namɛi tuuntu aŋmaa Buu-Mɔɔ srɔtoi enyɔ lɛ eko fɛɛ eko ahaa?
3 Buu-Mɔɔ: Mɛi tuuntu ahewɔ ni aŋmaa maŋbii anɔ̃ lɛ ji mɛi ni yɔɔ bulɛ fioo kɛha Nyɔŋmɔ kɛ Ŋmalɛ lɛ. Amɛyɛ Biblia lɛ he nilee fioo shi amɛnuuu emli tsɔɔmɔi lɛ ashishi jogbaŋŋ. Mɛi nɛɛ tamɔ mɛi ni Paulo wie amɛhe akɛ ‘mɛi ni sheɔ Nyɔŋmɔ gbeyei’ lɛ nɔŋŋ. (Bɔf. 13:14-16) Aŋmaa Buu-Mɔɔ ni ji nikasemɔ nɔ̃ lɛ ahaa Yehowa Odasefoi titri. Paulo ŋɔ lɛ akɛ mɛi ni eŋmala ewoji lɛ eyaha amɛ lɛ le Ŋmalɛ lɛ ni amɛyɛ anɔkwale lɛ he nilee ni ja. (1 Kor. 1:1, 2) Nakai nɔŋŋ hu aŋmalaa saji ni yɔɔ nikasemɔ nɔ̃ lɛ mli lɛ ahaa mɛi ni baa asafoŋ kpeei, ní amɛle Odasefoi lɛ ahemɔkɛyeli kɛ wiemɔi krɛdɛi komɛi ni amɛkɛtsuɔ nii lɛ.
4. Mɛni hewɔ esa akɛ wɔle woji tɛtrɛbii ni wɔkɛtsuɔ nii yɛ shiɛmɔ nitsumɔ lɛ mli lɛ eko fɛɛ eko mli sane lɛ?
4 Eyɛ mli akɛ bei pii lɛ wɔkɛ woji tɛtrɛbii lɛ haa enyɔnyɔɔnyɔ moŋ, shi wɔfɔɔ ekome pɛ he wiemɔ yɛ wɔshiɛmɔ wiemɔ lɛ mli. Enɛ hewɔ lɛ, kɛfee oti ni ma ohiɛ akɛ obaale eko fɛɛ eko mli sane. No baaha onyɛ owie amɛmli saji ní mɛi ní okɛhaa lɛ baanya he lɛ ahe jogbaŋŋ.