“Ogbɛ́i lɛ he Atse”
1. Mɛni ji kpokpaa nɔ kpee kɛha afi 2012 sɔɔmɔ afi lɛ saneyitso, ni mɛni nɔ saneyitso lɛ damɔ?
1 Kwɛ bɔ ni eji hegbɛ kpele akɛ Jeŋ Muu Fɛɛ Nɔyelɔ, ni ji Yehowa lɛ, gbɛ́i kã wɔnɔ! Nyɔŋmɔ diɛŋtsɛ ji mɔ ni kɛ egbɛ́i lɛ fɔ̃ wɔnɔ, ni titri lɛ kɛjɛ afi 1931 lɛ akɛ gbɛ́i ni ji Yehowa Odasefoi ni haa esoroɔ wɔ lɛ tsɛ́ɔ wɔ. (Yes. 43:10) Yesu, ni ji Nyɔŋmɔ Bi koome lɛ yɛ bulɛ ni nɔ bɛ kɛha e-Tsɛ gbɛ́i lɛ, ni ekɛ gbɛ́i nɛɛ ye klɛŋklɛŋ gbɛhe yɛ sɔlemɔ he nɔkwɛmɔnɔ lɛ mli. (Mat 6:9) Wɔkpokpaa nɔ kpee kɛha afi 2012 sɔɔmɔ afi lɛ saneyitso lɛ damɔ Yesu wiemɔi nɛɛ anɔ. Saneyitso lɛ ji, “Ogbɛ́i lɛ he Atse.”
2. Mɛɛ saji wɔbaanu yɛ kpokpaa nɔ kpee lɛ shishi?
2 Nɔ ni Wɔbaanu: Hɔɔ lɛ, wiemɔ ni ji “Nyɛhaa Alea Nyɔŋmɔ Gbɛ́i lɛ Ákɛ Be Fɛɛ Sɔɔlɔi” lɛ baatsɔɔ nɔ hewɔ ni be-fɛɛ sɔɔmɔ nitsumɔ lɛ ji shihilɛ gbɛ ko ni haa mɔ tsui nyɔɔ emli lɛ. Agbɛnɛ hu, wɔbaanu wiemɔ ni ahaa kɛtsaraa nɔ ni yitso ji “Kwɛmɔ Jogbaŋŋ ni Okɛ Ahorabɔɔ Akaba Yehowa Gbɛ́i lɛ Nɔ” lɛ, ni ebaaye ebua wɔ koni wɔkaha nibii ejwɛ komɛi ni baanyɛ atsɔ wɔ tsɔnei lɛ adu wɔ. Abaaha sanebimɔi ni ji, Mɛni baaye abua wɔ ni wɔkɛ hiɛdɔɔ ashiɛ kɛ́ etamɔ nɔ ni miishɛɛ fioo ko mɛi yɔɔ yɛ wiemɔ lɛ he? kɛ, Mɛni baaye abua koni wɔtsu sɔɔmɔ nitsumɔ lɛ yɛ gbɛ ni mɔɔ shi nɔ? lɛ ahetoo yɛ wiemɔ ni ji “Nɔ Hewɔ ni Esa akɛ Atse Nyɔŋmɔ Gbɛi lɛ He” lɛ mli. Hɔgbaa lɛ, wɔbaanu wiemɔ ni ahaa kɛtsaraa nɔ ni hiɛ fãi ejwɛ, ni ebaatsɔɔ bɔ ni wɔɔfee wɔkɛ wɔsusumɔi, wiemɔ, yiŋkpɛi, kɛ jeŋba atse Nyɔŋmɔ gbɛ́i lɛ he. Mɛi hei titri ahiɛ baasɔ maŋ shiɛmɔ ni ji “Yehowa Baatse E-Gbɛ́i Kpele lɛ he Yɛ Harmagedon” lɛ.
3. Mɛɛ hegbɛ wɔyɔɔ, ni mɛɛ gbɛ nɔ kpokpaa nɔ kpee lɛ baaye abua wɔ?
3 Etsɛŋ ni Yehowa baatse egbɛ́i lɛ he. (Ezek. 36:23) Shi dani nakai be lɛ aaashɛ lɛ, wɔyɛ hegbɛ kpele akɛ wɔbaahi shi yɛ nɔ ni Yehowa gbɛ́i krɔŋkrɔŋ lɛ damɔ shi kɛha lɛ naa. Wɔyɛ nɔmimaa akɛ kpokpaa nɔ kpee nɛɛ baaye abua wɔteŋ mɔ fɛɛ mɔ koni wɔnyɛ wɔtsu sɔ̃ ni tsii ni kã wɔnɔ akɛ mɛi ni Nyɔŋmɔ gbɛ́i lɛ kã wɔnɔ lɛ he nii.