Jehovah’s Witnesses—Organized to Share the Good News
Ato Yehowa Odasefoi ahe gbɛjianɔ ni amɛkɛ afii 100 kɛ sɛɛ eshiɛ sanekpakpa lɛ. Wɔjajeɔ shɛɛ sane nɛɛ yɛ wiemɔi ohai abɔ mli yɛ maji ni fa fe 230 anɔ, ni enɛ ji shiɛmɔ nitsumɔ ko ni atsu yɛ gbɛ ni da fe fɛɛ nɔ yɛ adesai ayinɔsane mli. (Mat. 24:14) Mɛni hewɔ nitsumɔ nɛɛ he hiaa lɛ? Mɛɛ gbɛ nɔ atsɔɔ atsuɔ enɛ yɛ je lɛŋ fɛɛ? Vidio ni ji Jehovah’s Witnesses—Organized to Share the Good News lɛ haa sanebimɔi nɛɛ ahetoo, ni efeɔ enɛ kɛtsɔ bɔ ni egbalaa nitsumɔi fɛɛ ni Yehowa Odasefoi tsuɔ yɛ je lɛŋ fɛɛ lɛ amli fitsofitso lɛ nɔ. Kɛ́ okwɛ vidio lɛ ogbe naa lɛ, susumɔ sanebimɔi ni nyiɛ sɛɛ nɛɛ ahe:
Mɛɛ gbɛ nɔ vidio nɛɛ eha ohiɛ esɔ Yehowa asafo lɛ jogbaŋŋ yɛ (1) gbɛjianɔ ni Yehowa asafo lɛ eto koni ashiɛ sanekpakpa lɛ he? (2 Tim. 4:2) (2) Betel wekui ni yɔɔ je lɛŋ fɛɛ lɛ he? (3) tsɔsemɔ ni ekɛhaa maŋsɛɛ sanekpakpa shiɛlɔi kɛ nɔkwɛlɔi lɛ he? (2 Tim. 2:2) (4) bɔ ni ehe hiaa ni wɔsusu Biblia mli ŋmalɛ ko he daa gbi, ni daa otsi lɛ wɔsaa wɔhe kɛha asafoŋ kpeei lɛ he? (Bɔf. 17:11) (5) sɛɛnamɔi ni yɔɔ Kristofoi akpeeiyaa he? (Heb. 10:24, 25) (6) jɔɔmɔi ni wɔnine baashɛ nɔ kɛ́ aha shikpɔŋ lɛ tsɔ Paradeiso ekoŋŋ lɛ he? (Yes. 11:9) (7) hegbɛ ni oná akɛ ootsu nikpamɔ nitsumɔ ni miiya nɔ lɛ eko lɛ he?—Yoh. 4:35.
Vidio nɛɛ yeɔ ebuaa mɛi ni yɔɔ wiemɔ lɛ he miishɛɛ lɛ jogbaŋŋ ni amɛleɔ nitsumɔ ni Yehowa Odasefoi tsuɔ yɛ je lɛŋ fɛɛ lɛ he sane. (8) Mɛɛ be ebaahi jogbaŋŋ akɛ wɔjie vidio lɛ wɔtsɔɔ wɔ-Biblia mli nikaselɔi, wɔwekumɛi, kɛ mɛi krokomɛi? (9) Be mli ni ojie vidio nɛɛ otsɔɔ mɛi lɛ, mɛɛ hewalɛ kpakpa ená yɛ amɛnɔ?
Be mli ni wɔjwɛŋɔ nibii ni Yehowa feɔ lɛ nɔ lɛ, no tsirɛɔ wɔ ni wɔkɛ lalatsɛ lɛ kpãa gbee akɛ: “Yehowa, mi-Nyɔŋmɔ, onaakpɛɛ nii ni otsuɔ kɛ ojwɛŋmɔi ni ojwɛŋɔ yɛ wɔhe lɛ fa naakpa. Nɔ ko bɛ ni aaanyɛ aŋɔto ohe!” (Lala 40:5) Eba akɛ wɔkɛ vidio nɛɛ baatsu nii jogbaŋŋ kɛye wɔbua mɛi krokomɛi koni amɛhiɛ asɔ Yehowa kɛ esafo lɛ!