Dɛŋdadei ni Tsɔɔ Mɔ Nii, ní Kanyaa Mɔ, ní Woɔ Mɔ Hewalɛ
1 Amɛtsɔɔ mɛi Biblia lɛ kɛ Yehowa Odasefoi ahe nii waa diɛŋtsɛ. Amɛkanya mɛi babaoo koni amɛdamɔ shi shiŋŋ amɛha anɔkwale lɛ. Amɛwo Nyɔŋmɔ webii ni amɛjɔɔ amɛhe nɔ amɛha lɛ lɛ ahemɔkɛyeli kɛ hiɛsɔɔ ni amɛyɔɔ lɛ mli hewalɛ. Mɛɛ nibii ahe awieɔ lɛ? No ji vidioi ni Yehowa gbɛjianɔtoo lɛ feɔ lɛ. Ani okwɛ ekomekomei nyɔŋma lɛ fɛɛ? Ni nyɛsɛɛ nɛɛ hu? Ani okɛtsuɔ nii yɛ osɔɔmɔ nitsumɔ lɛ mli? Te obaanyɛ ofee tɛŋŋ oná dɛŋdadei ni yɔɔ naakpɛɛ nɛɛ he sɛɛ babaoo?
2 July 1, 1999 Buu-Mɔɔ mli sane ni ji “Nyɛkasea Nyɔŋmɔ Wiemɔ lɛ Daa ákɛ Weku” lɛ kɛ ŋaawoo ha akɛ “nyɛshi[a] nyɛ nikasemɔ be lɛ eko ní nyɛkɛkwɛ[a] Asafo lɛ vidioi srɔtoi ni tsɔɔ mɔ nii lɛ eko . . . ní no sɛɛ lɛ nyɛsusu he.” Yɛ nakai ŋaawoo kpakpa lɛ kɛ gbeekpamɔ naa lɛ, abaasusu vidioi srɔtoi lɛ eko fɛɛ eko he yɛ Sɔɔmɔ Kpee lɛ shishi yɛ nyɔŋ fɛɛ nyɔŋ nɔ. Wɔmiiwo mɔ fɛɛ mɔ ni yɔɔ asafo lɛ mli lɛ hewalɛ koni ekwɛ vidio lɛ yɛ shia dani be ni akɛbaasusu he yɛ Sɔɔmɔ Kpee lɛ shishi lɛ ashɛ.
3 Wɔkɛ klɛŋklɛŋ vidio ni wɔfee lɛ baaje shishi nyɔŋ nɛɛ nɔ, ni no ji Jehovah’s Witnesses—The Organization Behind the Name (Yehowa Odasefoi—Gbɛjianɔtoo ni Yɔɔ Gbɛi lɛ Sɛɛ). Kwɛmɔ vidio lɛ, ni ofee klalo akɛ obaaha sanebimɔi ni obaanu nɛɛ ahetoo:
◼ Mɛni ji nɔ ni ale jogbaŋŋ yɛ Yehowa Odasefoi ahe?
◼ Nɔ fɛɛ nɔ ni atsuɔ yɛ Betel lɛ kɔɔ mɛɛ ŋmalɛ he?
◼ Mɛɛ Biblia mli nifeemɔ ko ona akɛ aafee he nɔkwɛmɔnɔ, ní ashá, ni atɛŋ koni akɛwo woji lɛ amli?
◼ Mɛni ji nɔ ni onyaa he waa yɛ bɔ ni afeɔ wɔwoji lɛ ahaa lɛ he?
◼ Woji komekomei enyiɛ Asafo lɛ kala kɛjɛ afi 1920 kɛyashi afi 1990?
◼ Nyɔŋmɔ webii lɛ ateŋ namɛi titri ji mɛi ni esa akɛ amɛhe asa kɛha Betel sɔɔmɔ?—Abɛi 20:29.
◼ Yɛ mɛɛ gbɛ̀i anɔ Betel weku lɛ feɔ nɔkwɛmɔnɔ ni nɔ bɛ kɛhaa Yehowa Odasefoi fɛɛ?
◼ Mɛni ji nɔ ni onyaa he waa yɛ nitsumɔ ni atsuɔ yɛ Betel koni aha mɛi babaoo nine ashɛ sanekpakpa lɛ nɔ bɔ ni aaanyɛ lɛ mli?
◼ Nɛgbɛ anáa shika yɛ ni akɛfiɔ nitsumɔ lɛ sɛɛ?
◼ Mɛɛ nitsumɔ wɔ fɛɛ wɔbaanyɛ wɔkɛ ekãa afĩ sɛɛ, ni kɛ mɛɛ mumɔ?—Yoh. 4:35; Bɔf. 1:8.
◼ Te onuɔ gbɛjianɔtoo ni yɔɔ wɔgbɛi lɛ sɛɛ lɛ he ohaa tɛŋŋ?
◼ Mɛɛ gbɛ nɔ obaanyɛ otsɔ okɛ vidio nɛɛ atsu nii yɛ sɔɔmɔ nitsumɔ lɛ mli?
Wɔbaasusu vidio ni ji The Bible—Accurate History, Reliable Prophecy (Biblia Lɛ—Yinɔsane ni Ja, Gbalɛ ni Anyɛɔ Akɛ He Fɔ̃ɔ Nɔ) lɛ he yɛ December mli.