‘Afee Nɔ ni Nyɔŋmɔ Sumɔɔ’
1. Mɛni ji gbi kome kpee krɛdɛɛ kɛha afi 2012 sɔɔmɔ afi lɛ saneyitso, ni mɛni hewɔ esa akɛ wɔsusu saneyitso nɛɛ he lɛ?
1 Yehowa suɔmɔ naa hewɔ abɔ wɔ. (Kpoj. 4:11) No hewɔ lɛ, kɛ́ wɔtaooo nɔ ni Nyɔŋmɔ sumɔɔ ni wɔtsu he nii lɛ, wɔnyɛŋ wɔtsu yiŋtoo hewɔ ni abɔ wɔ lɛ he nii. Enɛ feemɔ bɛ mlɛo, titri lɛ akɛni ebiɔ ni wɔwuu wɔshi su ni yɔɔ wɔmli ni haa wɔtsuɔ ‘nii ni heloo lɛ kɛ jwɛŋmɔ lɛ sumɔɔ’ loo wɔtsuɔ “jeŋmajiaŋbii atsui naa nii” lɛ hewɔ. (Efe. 2:3; 1 Pet. 4:3; 2 Pet. 2:10) Kɛ́ Nyɔŋmɔ yeee ebuaaa wɔ lɛ, ewaaa kwraa akɛ ‘Abonsam baadũ wɔ ní wɔfee esuɔmɔnaa nii.’ (2 Tim. 2:26) Wɔgbi kome kpee krɛdɛɛ kɛha afi 2012 sɔɔmɔ afi lɛ baaye abua wɔteŋ mɔ fɛɛ mɔ koni wɔnifeemɔ kɛ sɔlemɔ he nɔkwɛmɔnɔ lɛ mli nibimɔi titri etɛ lɛ ateŋ ekome ni ji “afee nɔ ni osumɔɔ” lɛ akpã gbee.—Mat. 6:9, 10.
2. Mɛɛ sanebimɔi abaaha hetoo yɛ kpee lɛ shishi?
2 Sanebimɔi ni Abaaha Hetoo: Kɛ́ otee kpee lɛ bo wiemɔi ni abaaha yɛ shishi lɛ atoi, no okwɛ akɛ obaaná sanebimɔi nɛɛ ahetoo lo: Yɛ Nyɔŋmɔ Wiemɔ lɛ ni wɔɔnu lɛ sɛɛ lɛ, mɛni hu he hiaa? Te wɔɔfee tɛŋŋ wɔya nɔ wɔyoo nii ni ji Nyɔŋmɔ suɔmɔnaa nii kɛha wɔ? Mɛni hewɔ esa akɛ wɔná he miishɛɛ akɛ wɔɔye wɔbua gbɔmɛi srɔtoi fɛɛ? Te ooofee tɛŋŋ oná shihilɛ kpakpa ni haa mɔ tsui nyɔɔ emli? Gbekɛbii, oblahii kɛ oblayei, mɛni esa akɛ nyɛha Yehowa ayɔse yɛ nyɛhe? Kɛ́ wɔfee Nyɔŋmɔ suɔmɔnaa nii lɛ mɛɛ jɔɔmɔi wɔbaaná? Mɛni hewɔ esaaa akɛ wɔshashaoɔ shi akɛ wɔɔtswatswaa wɔhe wɔma shi ni wɔwowoo wɔhe hewalɛ lɛ?
3. Te wɔɔfee tɛŋŋ wɔná gbi kome kpee krɛdɛɛ nɛɛ he sɛɛ jogbaŋŋ?
3 Tswaa ofai shi akɛ obaaya kpee nɛɛ ni obo wiemɔi ni abaaha lɛ atoi jogbaŋŋ. Betel najiaŋdamɔlɔ ko loo nɔkwɛlɔ gbɛfalɔ ko baaba kpee lɛ shishi akɛ wielɔ ni eba nyɛ saramɔ. Kaashashao shi akɛ okɛ lɛ kɛ eŋa (kɛ́ ebote gbalashihilɛ mli) baagba sane dani aje kpee lɛ shishi loo beni akpa kpee lɛ. Kɛ́ oku osɛɛ otee shĩa lɛ, kaafee ohe mɔ ni “nuɔ ni ehiɛ kpaa nɔ,” moŋ lɛ okɛ oweku lɛ afee ekome ni nyɛsusu kpee lɛ he ekoŋŋ ni nyɛtao bɔ ni nyɛaafee nyɛnii koni ekɛ Nyɔŋmɔ suɔmɔnaa nii akpã gbee jogbaŋŋ fe tsutsu lɛ.—Yak. 1:25.
4. Mɛni hewɔ ehe hiaa ni wɔkɛ Nyɔŋmɔ suɔmɔnaa nii aye klɛŋklɛŋ gbɛhe yɛ wɔshihilɛ mli lɛ?
4 Etsɛŋ abaakpata mɛi ni tiuɔ amɛ diɛŋtsɛ amɛsuɔmɔnaa nii asɛɛ ni amɛkpoɔ akɛ amɛbaafee Yehowa suɔmɔnaa nii lɛ ahiɛ. (1 Yoh. 2:17) Belɛ wɔmiida shi akɛ Yehowa eto kpee ni sa jogbaŋŋ nɛɛ he gbɛjianɔ koni ekɛye ebua wɔ ni wɔkɛ Nyɔŋmɔ suɔmɔnaa nii aye klɛŋklɛŋ gbɛhe yɛ wɔshihilɛ mli!