Shiɛmɔ Oha “Mɛi Fɛɛ”
1. Mɛɛ gbɛ nɔ shiɛlɔi ni he ekpɔ lɛ tamɔ ŋaa nitsulɔi ni he esa?
1 Ŋaa nitsulɔ ni he esa lɛ yɛ dɛŋdadei babaoo, ni ele be kɛ bɔ ni esa akɛ ekɛ eko fɛɛ eko atsu nii. Wɔ hu wɔyɛ dɛŋdadei srɔtoi ni yeɔ amɛbuaa wɔ koni wɔnyɛ wɔtsu wɔshiɛmɔ nitsumɔ lɛ. Ákɛ nɔkwɛmɔnɔ lɛ, afee woji bibii ni wieɔ saji srɔtoi ahe koni akɛye abua wɔ ni wɔshiɛ wɔha “mɛi fɛɛ.” (1 Kor. 9:22) Atsĩ woji bibii nɛɛ ekomɛi atã yɛ wolo ni fata Wɔ Maŋtsɛyeli Sɔɔmɔ nɛɛ he lɛ mli, ni atsɔɔ mɛi ni aŋmala woji bibii lɛ aha, kɛ bɔ ni abaafee akɛha.
2. Mɛɛ bei amli wɔbaanyɛ wɔkɛ woji bibii lɛ aha yɛ shiɛmɔ nitsumɔ lɛ mli?
2 Be ni Wɔbaanyɛ Wɔkɛ Woji Bibii Atsu Nii: Ŋaa nitsulɔ kɛ dɛŋdade ko tsuɔ nii kɛji ehe miihia ni efee nakai. Nakai nɔŋŋ wɔ hu wɔbaanyɛ wɔkɛ wolo bibioo ko aha mɔ ko kɛji wɔna akɛ ehe baaba sɛɛnamɔ kɛha lɛ, shi jeee yɛ nyɔji ni atsɔɔ akɛ wɔkɛ nakai woji lɛ aha lɛ pɛ mli. Ákɛ nɔkwɛmɔnɔ lɛ, kɛ́ wolo ni akɛhaa lɛ ji Biblia lɛ Tsɔɔ wolo lɛ, ni wɔmiishiɛ yɛ hei ni mɛi ni yɔɔ jɛmɛ lɛ jeee Kristofoi ni amɛnyaaa Biblia lɛ he tsɔ lɛ, ebaahi akɛ wɔkɛ wolo bibioo ko ni sa baaha, koni no sɛɛ kɛ́ mɔ lɛ ná wiemɔ lɛ he miishɛɛ lɛ, wɔkɛ Biblia lɛ Tsɔɔ wolo lɛ aha lɛ.
3. Mɛni hewɔ esa akɛ wɔle dɛŋdadei ní wɔkɛshiɛɔ lɛ kɛnitsumɔ jogbaŋŋ lɛ?
3 Ŋmalɛ lɛ jieɔ mɛi ni bɔɔ mɔdɛŋ yɛ amɛnitsumɔ mli lɛ ayi. (Abɛi 22:29) Ekã shi faŋŋ akɛ, ŋmɛnɛ lɛ, nitsumɔ ko bɛ ni he hiaa fe “sanekpakpa lɛ he nitsumɔ ni yɔɔ krɔŋkrɔŋ lɛ.” (Rom. 15:16, NW) Bɔni afee ni wɔfee ‘nitsulɔi ni hiɛ gbooo’ lɛ, esa akɛ wɔbɔ mɔdɛŋ wɔle wɔdɛŋdadei lɛ kɛnitsumɔ jogbaŋŋ.—2 Tim. 2:15.