“Okɛ Wolo Tɛtrɛɛ Momo ko loo Woji Bibii lɛ Eko Fɛɛ Eko ni Mɔ lɛ Baanya he lɛ Aha”
Yɛ nyɔji amli ni wɔhaa Biblia Tsɔɔ wolo lɛ, ni wɔbɔɔ mɔdɛŋ akɛ wɔbaaje Biblia mli nikasemɔ shishi yɛ gbi klɛŋklɛŋ kwraa ni wɔtee mɔ ko ŋɔɔ lɛ, awoɔ wɔ hewalɛ akɛ kɛ́ mɔ lɛ yɛ wolo lɛ eko ni ekpɛlɛɛɛ ni akɛ lɛ kaseɔ nii lɛ, no lɛ ‘wɔkɛ wolo tɛtrɛɛ momo ko loo woji bibii lɛ eko fɛɛ eko ni mɔ lɛ baanya he lɛ aha’ lɛ. Mɛni hewɔ?
Saji srɔtoi ni sa jogbaŋŋ yɛ woji bibii kɛ woji tɛtrɛbii lɛ amli. Ekolɛ sane ko ni yɔɔ woji nɛɛ ateŋ eko mli lɛ baaná shĩatsɛ lɛ nɔ hewalɛ. No hewɔ lɛ, kɛ́ ooto nibii kɛmiiwo oshiɛmɔyaa baagi lɛ mli lɛ okɛ woji bibii kɛ woji tɛtrɛbii memeji srɔtoi hu afata he. Kɛ́ obɛ woji tɛtrɛbii memeji lɛ eko lɛ, ekolɛ obaanyɛ obi eko yɛ he ni ayaŋɔɔ woji tɛtrɛbii yɛ nyɛsafo lɛ mli lɛ. Kɛkɛ lɛ, kɛ́ shĩatsɛ lɛ yɛ Biblia Tsɔɔ wolo lɛ eko momo ni ekpɛlɛɛɛ ni akɛ lɛ kaseɔ Biblia lɛ, obaanyɛ okɛ woji tɛtrɛbii loo woji bibii lɛ ekomɛi atsɔɔ lɛ ni oha eŋɔ emli nɔ ni esumɔɔ. No sɛɛ lɛ, okɛ lɛ ato be ni obaaku osɛɛ oyasara lɛ koni oyawaje miishɛɛ ni eyɔɔ yɛ wiemɔ lɛ he lɛ. Ekolɛ no baagbele gbɛ kɛha Biblia mli nikasemɔ.