“Nyɛfea Enɛ”—Abaaye Kaimɔ lɛ April 5
1. Mɛni hewɔ Kaimɔ lɛ yeli he hiaa waa lɛ?
1 “Nyɛfea enɛ ni nyɛŋɔkai mi.” (Luka 22:19) Yesu wie enɛ kɛfã esɛɛnyiɛlɔi lɛ koni amɛye efɔleshãa gbele lɛ he gbi jurɔ kɛkai lɛ. Yɛ nɔ ni kpɔmɔnɔ lɛ etsu hewɔ lɛ, daa afi Kaimɔ gbi lɛ ji gbi ni he hiaa fe fɛɛ kɛha Kristofoi. Te wɔɔfee tɛŋŋ wɔtsɔɔ akɛ wɔhiɛ sɔɔ nɔ ni Yehowa efee lɛ be mli ni afi nɛɛ Kaimɔ lɛ ni abaaye yɛ April 5 lɛ bɛŋkɛɔ lɛ?—Kol. 3:15.
2. Te wɔɔfee tɛŋŋ wɔtsɔ nikasemɔ kɛ niianɔjwɛŋmɔ nɔ wɔtsɔɔ akɛ wɔhiɛ sɔɔ Kaimɔ lɛ?
2 Saamɔ Ohe: Bei pii lɛ, wɔsaa wɔhe kɛhaa nibii ni wɔsusuɔ akɛ amɛhe miihia waa lɛ. Wɔbaanyɛ wɔsaa wɔtsui kɛha Kaimɔ lɛ kɛtsɔ nibii ni tee nɔ yɛ naagbee gbii ni Yesu kɛhi shikpɔŋ lɛ nɔ lɛ ni wɔɔfee ekome akɛ weku kɛkase ni wɔjwɛŋ nɔ lɛ nɔ. (Ezra 7:10) Obaana enɛ he ŋmalɛi fioo komɛi yɛ kalanda lɛ kɛ Ŋmalɛi lɛ Amli ni Wɔɔkwɛ Daa wolo lɛ mli, shi atsɔɔ ŋmalɛi babaoo ni kɔɔ enɛ he lɛ kɛ Gbɔmɔ ni Fe Mɔ Fɛɛ Mɔ wolo lɛ mli yitsei ni wieɔ ŋmalɛi nɛɛ ahe lɛ yɛ February 1, 2011, Blɔfo Buu-Mɔɔ baafa 23-24 lɛ mli.
3. Mɛɛ gbɛ nɔ wɔɔtsɔ wɔtsu babaoo yɛ shiɛmɔ nitsumɔ lɛ mli kɛtsɔɔ akɛ wɔhiɛ sɔɔ Kaimɔ lɛ waa?
3 Shiɛmɔ: Wɔbaanyɛ wɔtsɔɔ hu akɛ wɔhiɛ sɔɔ Kaimɔ lɛ kɛtsɔ be babaoo ni wɔkɛaatsu shiɛmɔ nitsumɔ lɛ nɔ. (Luka 6:45) Kɛjɛ Hɔɔ, March 17 kɛyaa lɛ, wɔbaafã ta yɛ jeŋ fɛɛ kɛfɔ̃ mɛi nine kɛba Kaimɔ lɛ. Ani obaanyɛ oto obe he gbɛjianɔ jogbaŋŋ koni onyɛ okɛ be babaoo atsu shiɛmɔ nitsumɔ lɛ, ekolɛ ni okɛ ohe awo gbɛgbalɔi awamɔ nitsumɔ lɛ mli? Mɛni hewɔ nyɛsusuuu enɛ he akɛ weku yɛ gbɛkɛ Weku Jamɔ ni nyɛbaafee kɛnyiɛ sɛɛ lɛ mli?
4. Kɛ́ wɔtee Kaimɔ lɛ, mɛɛ sɛɛ wɔnáa?
4 Kɛ́ wɔtee Kaimɔ lɛ daa afi lɛ, wɔnáa he sɛɛ jogbaŋŋ diɛŋtsɛ! Be mli ni wɔjwɛŋɔ mlihilɛ mli ni Yehowa jɛ ekɛ e-Bi koome lɛ ha akɛ kpɔmɔnɔ lɛ nɔ lɛ, no haa wɔnáa miishɛɛ waa, ni suɔmɔ ni wɔyɔɔ kɛha Nyɔŋmɔ lɛ hu mli waa. (Yoh. 3:16; 1 Yoh. 4:9, 10) Enɛ nyɛɔ wɔnɔ koni wɔkahi shi dɔŋŋ kɛmiiha wɔhe. (2 Kor. 5:14, 15) Kɛfata he lɛ, etsirɛɔ wɔ koni wɔjie Yehowa yi yɛ faŋŋ. (Lala 102:20-22) Hɛɛ, Yehowa tsuji ni hiɛ sɔɔ nii lɛ kɛ miishɛɛ miimɛ April 5, ni ji Kaimɔ gbi lɛ koni ‘wɔjaje Nuŋtsɔ lɛ gbele lɛ wɔtsɔɔ.’—1 Kor. 11:26.