Okɛ Miishɛɛ Tsui Asaa Ohe Kɛha Kaimɔ Lɛ
1. Kaimɔ be lɛ bafeɔ be ni sa kadimɔ waa kɛha mɛni feemɔ?
1 Kaimɔ lɛ ni abaafee Jufɔ, March 26 lɛ baaha wɔná hegbɛ ni nɔ bɛ kɛjie hiɛsɔɔ kpo yɛ gbɛ ni Nyɔŋmɔ tsɔɔ nɔ ehereɔ wɔyiwala lɛ he. (Yes. 61:10) Dani abaaye Kaimɔ lɛ po lɛ, miishɛɛ tsui baaye abua wɔ ni wɔsaa wɔhe jogbaŋŋ. Yɛ mɛɛ gbɛ nɔ?
2. Mɛni tsirɛɔ wɔ ni wɔtoɔ gbɛjianɔ kɛha Kaimɔ lɛ yeli?
2 Kaimɔ lɛ he Gbɛjianɔtoo: Nuŋtsɔ lɛ Gbɛkɛnaashi Niyenii lɛ ji nifeemɔ ko ni he hiaa waa, kɛlɛ ejeee gbijurɔyeli ko ni yɔɔ haŋtsĩi. Shi, ebiɔ ni ato gbɛjianɔ kɛtsɔ hiɛ bɔni afee ni hiɛ akakpa nibii ni he hiaa ni esa akɛ atsu he nii lɛ eko nɔ. (Abɛi 21:5) Esa akɛ ana be ni akɛbaafee lɛ kɛ he ni abaafee yɛ. Esa akɛ aná okadi nibii ni sa. Esa akɛ asaa he ni abaafee yɛ lɛ ni aha jɛmɛ afee falefale. Esa akɛ mɔ ni ahala ni baaha wiemɔ lɛ asaa ehe jogbaŋŋ, ní ato mɛi ni kɛ okadi nibii lɛ baatsɔɔ lɛ kɛ mɛi ni baakwɛ shitaramɔ nɔ lɛ ahe gbɛjianɔ jogbaŋŋ. Ŋwanejee ko bɛ he akɛ atsu nibii nɛɛ ateŋ babaoo he nii momo. Hiɛsɔɔ ni wɔyɔɔ kɛha yiwalaheremɔ hewalɛ ni kpɔmɔnɔ lɛ yɔɔ lɛ tsirɛɔ wɔ ní wɔsaa wɔhe jogbaŋŋ kɛha nifeemɔ krɔŋŋ nɛɛ.—1 Pet. 1:8, 9.
3. Mɛ gbɛ nɔ wɔbaanyɛ wɔsaa wɔtsui lɛ kɛha Nuŋtsɔ lɛ Gbɛkɛnaashi Niyenii lɛ?
3 Saamɔ Tsui Lɛ: Ehe miihia hu ni wɔsaa wɔtsui koni wɔnu nɔ fɛɛ nɔ ni kɔɔ Kaimɔ lɛ he lɛ shishi jogbaŋŋ. (Ezra 7:10) Enɛ hewɔ lɛ, esa akɛ wɔná be kɛsusu Kaimɔ lɛ he Biblia kanemɔ krɛdɛɛ lɛ he, koni no sɛɛ lɛ wɔjwɛŋ Yesu naagbee gbii yɛ shikpɔŋ lɛ nɔ lɛ hu he. Kɛ́ wɔjwɛŋ hekɛafɔleshaa su ni Yesu jie lɛ kpo lɛ nɔ lɛ, ebaawo wɔ hewalɛ ni wɔkase lɛ.—Gal. 2:20.
4. Te kpɔmɔnɔ lɛ he sɛɛnamɔi lɛ ateŋ nɔ ni haa omii shɛɔ ohe waa?
4 Dani abaaye Kaimɔ lɛ kɛ no sɛɛ fɛɛ lɛ, kɛ́ wɔjwɛŋ kpɔmɔnɔ lɛ he sɛɛ ní wɔnáa lɛ he lɛ, ebaaha wɔtsui ayi obɔ kɛ miishɛɛ. Be nɛɛ jeee be ni akɛfeɔ paati loo be ni akɛ tɛs mɛseji majeɔ mɛi kɛhaa amɛ mo. Moŋ lɛ, eji be ni akɛjwɛŋɔ nibii anɔ. Kristo gbele lɛ buɔ Yehowa bem akɛ jeŋ muu fɛɛ maŋtsɛ. Ehaa ayeɔ he kɛjɛɔ esha kɛ gbele mli. (1 Yoh. 2:2) Ehaa wekukpãa ni toiŋjɔlɛ yɔɔ mli bakãa mɔ kɛ Nyɔŋmɔ teŋ, ni ehaa anáa naanɔ wala. (Kol. 1:21, 22) Eyeɔ ebuaa wɔ ni wɔwajeɔ wɔfai shi ni wɔtswa akɛ wɔbaahi shi yɛ wɔhenɔ ni wɔjɔɔ wɔha Yehowa lɛ naa, ní wɔya nɔ wɔfĩ shi shiŋŋ akɛ Kristo kaselɔi. (Mat. 16:24) Eba akɛ beni osaa ohe koni oya Kaimɔ ni baa lɛ, obaaná miishɛɛ babaoo!