Jehovah’s Witnesses—Faith in Action, Part 1: Out of Darkness
Yɛ Biblia lɛ mli lɛ, akɛ la toɔ anɔkwale he, ni akɛ duŋ toɔ amale he. (Lala 43:3; Yes. 5:20) Satan kɛ duŋ ba je lɛŋ beni elaka Hawa lɛ, ni fiofio lɛ Satan ha duŋ nɛɛ gbɛ eshwã jeŋ fɛɛ. (Kpoj. 12:9) Vidio ni ji Jehovah’s Witnesses—Faith in Action, Part 1: Out of Darkness lɛ tsɔɔ bɔ ni fee ni mumɔŋ la kpɛ kɛjɛ duŋ mli. (Yes. 60:1, 2) Kɛ́ okwɛ vidio lɛ otã lɛ, kwɛmɔ akɛ obaanyɛ oha saji nɛɛ ahetoo lo?
(1) Mɛɛ gbɛ nɔ duŋ kpii wo yɛ Yesu bɔfoi lɛ agbele sɛɛ? (2) Yɛ afi 1100 afii lɛ shishijee gbɛ lɛ, mɛɛ nibii ha mɛi yɔse akɛ sɔlemɔi lɛ egba afã? (3) Namɛi ji Henry Grew kɛ George Storrs? (4) Mɛɛ nibii ní tee nɔ yɛ Charles Russell shihilɛ mli ná enɔ hewalɛ waa? (5) Mɛɛ gbɛ nɔ Nyɛminuu Russell, epapa, kɛ mɛi fioo komɛi tsɔ amɛkase Biblia lɛ, ni te amɛmu saji anaa amɛha tɛŋŋ yɛ Ŋmalɛ naa? (6) Mɛni hewɔ Nyɛminuu Russell Biblia kasemɔ kuu lɛ kɛ Nelson Barbour kuu lɛ yafee ekome lɛ, shi mɛni ha Nyɛminuu Russell tse ehe kɛjɛ amɛhe lɛ? (7) Mɛni ba yɛ July 1879 ni ha mumɔŋ la hee bɔi kpɛmɔ? (8) No sɛɛ lɛ, mɛni Biblia Kaselɔi ní yi miifa lɛ fee kɛgbɛ sane kpakpa lɛ amɛshwã? (9) Afii babaoo dani afi 1914 baashɛ lɛ, mɛni Biblia Kaselɔi lɛ kpa gbɛ akɛ ebaaba yɛ afi 1914? (10) Beni Nyɛminuu Russell gbo sɛɛ lɛ, mɛɛ jaramɔ shihilɛi Biblia Kaselɔi lɛ kɛkpe? (11) Beni ajie Nyɛminuu Rutherford kɛ enanemɛi lɛ kɛjɛ tsuŋwoo mli lɛ, mɛni Biblia Kaselɔi lɛ fee? (12) Mɛɛ gbɛ nɔ vidio nɛɛ eha hiɛsɔɔ ni oyɔɔ kɛha Yehowa asafo lɛ mli ekwɔ waa? (13) Mɛɛ gbɛ nɔ vidio nɛɛ ewaje ofai shi ní otswa akɛ obaaya nɔ okɛ hiɛdɔɔ ashiɛ, ekɔɔɔ he eko gbɛtsiinii ni okɛaakpe lɛ? (14) Te wɔɔfee tɛŋŋ wɔkɛ vidio nɛɛ aye abua wɔwekumɛi, wɔ-Biblia mli nikaselɔi, kɛ mɛi krokomɛi?
Enɛ ji jwetri ni jara wa waa ní mra be mli Biblia Kaselɔi lɛ shi amɛha wɔ! Amɛkɛ ekãa kɛ hiɛdɔɔ ye la lɛ he odase yɛ jeŋ ni mli ewo duŋ mli. Nyɛhaa wɔkasea amɛnɔkwɛmɔnɔ lɛ, ní wɔya nɔ ‘wɔnyiɛ tamɔ la bii.’—Efe. 5:8.