Nyɔŋmɔ Wiemɔ ni Ekɛha Wɔ Kɛtsɔ Yeremia Nɔ
1. Mɛɛ wolo ajie lɛ kpo yɛ afi 2010 kpokpaa wulu nɔ kpee lɛ shishi, ni te wɔkɛbaatsu nii wɔha tɛŋŋ?
1 Beni ajie wolo hee ni ji Nyɔŋmɔ Wiemɔ ni Ekɛha Wɔ Kɛtsɔ Yeremia Nɔ lɛ kpo yɛ afi 2010 “Hii Yehowa Masɛi Daa!” Kpokpaa Wulu nɔ Kpee lɛ shishi lɛ, wɔná miishɛɛ waa! Wolo nɛɛ wieɔ Biblia mli woji ni ji Yeremia kɛ Yeremia Yaafo lɛ amli nibii ní baanyɛ aye abua wɔ yɛ wɔdaa gbi shihilɛ mli lɛ ahe. (Rom. 15:4) Akɛ wolo nɛɛ baatsu nii kɛfee Asafoŋ Biblia Nikasemɔ, kɛjɛ November 5, 2012 otsi lɛ nɔ kɛyaa.
2. Mɛni hewɔ kɛ́ wɔkase Biblia mli woji ni ji Yeremia kɛ Yeremia Yaafo lɛ, wɔbaaná he sɛɛ lɛ?
2 Ehe yɛ Sɛɛnamɔ Kɛha Wɔ Ŋmɛnɛ: Yeremia, mɔ ni akɛ mumɔ tsirɛ lɛ ní eŋma Biblia mli wolo nɛɛ, sɔmɔ akɛ gbalɔ yɛ Yuda yɛ be ní jaraa waa mli. Shishijee lɛ, enu he akɛ enyɛŋ etsu nitsumɔ ni akɛwo edɛŋ lɛ. (Yer. 1:6) Agbɛnɛ hu, mɛi komɛi ni ele, kɛ ekolɛ ewekumɛi ni yɔɔ Anatot, ni ji emaŋ lɛ wa lɛ yi. (Yer. 11:21, 22) Ebɛ naakpɛɛ mɔ akɛ, Yeremia nijiaŋ je wui bei komɛi. (Yer. 20:14) Beni wɔtsuɔ nitsumɔ ni akɛwo wɔdɛŋ akɛ ‘wɔfee jeŋmaji fɛɛ kaselɔi’ lɛ, bei pii lɛ wɔkɛ naagbai kpeɔ, ni wɔnijiaŋ jeɔ wui tamɔ Yeremia. (Mat. 28:19) Kɛ́ wɔkase ewoji lɛ, ebaaye ebua wɔ koni wɔkɛ ekãa kɛ hiɛdɔɔ atsu wɔsɔɔmɔ nitsumɔ lɛ.
3. Te wɔkɛ Yeremia wolo lɛ mli nibii komɛi baatsu nii wɔha tɛŋŋ?
3 Emli Nibii: Akpa ŋmalɛi titrii ni esa akɛ akane beni akaseɔ wolo lɛ afã. Yɛ daa otsi nikasemɔ lɛ naagbee lɛ, obaana sanebimɔ kome loo enyɔ ni adiki mli ní maa saji otii ni yɔɔ nikasemɔ lɛ mli lɛ anɔ mi. Esa akɛ abi toibolɔi lɛ saji nɛɛ kɛtĩ nikasemɔ lɛ mli. Mfonirii fɛfɛji yɛ wolo lɛ mli fɛɛ, ni ekã shi faŋŋ akɛ asafoŋbii lɛ baasumɔ ni amɛwie he.
4. Te wɔɔfee tɛŋŋ wɔná Yeremia wolo lɛ kasemɔ he sɛɛ kɛmɔ shi?
4 Saamɔ ohe kɛtsɔ hiɛ bɔni afee ni oná he sɛɛ kɛmɔ shi. Kwɛmɔ akɛ obaana otii ní obaanyɛ okɛtsu nii yɛ shiɛmɔ nitsumɔ lɛ kɛ oshihilɛ mli lo. Okɛ ohe awo sajiahetoohamɔ lɛ mli kɛmɔ shi. Yɛ Yehowa yelikɛbuamɔ naa lɛ, Yeremia nyɛ etsu nitsumɔ ni akɛwo edɛŋ lɛ kɛ miishɛɛ, ni etsui nyɔ emli. (Yer. 15:16) Eba akɛ, wolo hee nɛɛ kasemɔ baaye abua wɔ koni wɔnyɛ wɔtsu wɔsɔɔmɔ nitsumɔ lɛ yɛ gbɛ ni tamɔ nakai nɔŋŋ nɔ.