Ye Obua Mɛi Koni Amɛbo Nyɔŋmɔ Toi
1. Mɛɛ woji bibii ajie amɛ kpo yɛ ‘Nyɔŋmɔ Maŋtsɛyeli Lɛ Aba!’ Kpokpaa Wulu Nɔ Kpee lɛ shishi, ni mɛni haa amɛbafeɔ dɛŋdadei ni sa waa lɛ?
1 Ajie woji bibii enyɔ ni ji Bo Nyɔŋmɔ Toi koni Ohi Shi Kɛya Naanɔ kɛ ekroko ni ekɛ nitsɔɔmɔ yɔɔ mlɛo, ni ji Bo Nyɔŋmɔ Toi lɛ akpo yɛ ‘Nyɔŋmɔ Maŋtsɛyeli Lɛ Aba!’ Kpokpaa Wulu Nɔ Kpee ni afee nyɛsɛɛ afi lɛ shishi. Akɛni woji nɛɛ amli niŋmai lɛ faaa hewɔ lɛ, abaanyɛ atsɔɔ shishi oya yɛ gbɛ ni waaa kwraa nɔ. Anɔkwa, beni ajieɔ Bo Nyɔŋmɔ Toi Koni Ohi Shi Kɛya Naanɔ wolo bibioo lɛ kpo yɛ Blɔfo wiemɔ mli lɛ, no mli lɛ akpɛlɛ nɔ akɛ atsɔɔ shishi kɛya wiemɔi 431 mli.
2. Namɛi baaná woji bibii nɛɛ ahe sɛɛ?
2 Namɛi tuuntu baaná woji bibii nɛɛ ahe sɛɛ? Susumɔ shihilɛi nɛɛ ni akɛfɔɔ kpee yɛ je lɛŋ hei babaoo lɛ ahe okwɛ:
• Shiɛlɔ ko ni kɛ mɔ ko miikase nii be klɛŋklɛŋ kwraa ni eyanina lɛ, loo yɛ sɛɛkuu-kɛsaramɔ mli lɛ, yɔse akɛ mɔ lɛ leee nikanemɔ loo enikanemɔ ehiii.
• Shiɛlɔ ko ni miishiɛ eetsɔɔ mɛi komɛi ni wieɔ wiemɔ ko ni atsɔɔ asafo lɛ woji fioo ko pɛ shishi kɛtee mli, loo atsɔko eko kwraa shishi kɛyako mli. Loo mɛi kpotoo ni yɔɔ shikpɔŋkuku lɛ mli lɛ nyɛɛɛ amɛkane wiemɔi ni amɛnyɛɔ amɛwieɔ lɛ.
• Shiɛlɔ ko kɛ mumuii awiemɔ shiɛɔ ehaa mumuii yɛ eshikpɔŋkuku lɛ mli.
• Fɔlɔ ko miisumɔ ni etsɔɔ ebi fioo ko ni bɔiko nikanemɔ lɛ anɔkwale lɛ.
3. Te ato Bo Nyɔŋmɔ Toi wolo lɛ mli nibii lɛ naa aha tɛŋŋ?
3 Bɔ ni Ato Woji Bibii Nɛɛ Mli Nibii lɛ Anaa Aha: Bo Nyɔŋmɔ Toi wolo lɛ mli niŋmai lɛ faaa kwraa, aŋma sane kuku kɛ Ŋmalɛ ni atsɛ yisɛɛ ni tsɔɔ saji otii lɛ amli lɛ yɛ wolo lɛ baafã fɛɛ baafã shishigbɛ. Mɛni hewɔ? Ŋɔɔ lɛ akɛ mɔ ko kɛ wolo ko ni aŋma yɛ wiemɔ ni onyɛɛɛ okane lɛ mli lɛ ha bo, ekolɛ onako emli niŋmaa lɛ eko po dã. Kɛ́ ekolɛ mfonirii ni atɛŋ yɛ wolo lɛ mli lɛ yɛ fɛo jogbaŋŋ po lɛ, ani obaanya wolo lɛ he? Mɛi babaoo nyaŋ wolo ni tamɔ nɛkɛ he. Nakai nɔŋŋ mɛi ni nyɛɛɛ nii akane lɛ nyaaa woji ni niŋmai babaoo yɔɔ mli lɛ ahe. Enɛ hewɔ lɛ, aje gbɛ atɛŋ mfonirii fɛfɛji yɛ wolo lɛ baafã fɛɛ baafã nɔ, ni afee okadi ko ni baaye abua sanegbaa lɛ, ni ebaaha ole akɛ kɛ́ ojɛ mfoniri nɛɛ nɔ lɛ, ooya ekroko lɛ nɔ.
4. Te ato Bo Nyɔŋmɔ Toi Koni Ohi Shi Kɛya Naanɔ wolo lɛ mli nibii lɛ anaa aha tɛŋŋ?
4 Mfoniri ni yɔɔ Bo Nyɔŋmɔ Toi wolo lɛ mli lɛ nɔŋŋ ji nɔ ni yɔɔ Bo Nyɔŋmɔ Toi Koni Ohi Shi Kɛya Naanɔ wolo lɛ hu mli. Ato wolo nɛɛ he gbɛjianɔ koni akɛ mɛi ni leee nikanemɔ tsɔ loo mɛi ni miikase nikanemɔ lɛ akase. Kɛfata he lɛ, shiɛlɔ lɛ baanyɛ ehiɛ Bo Nyɔŋmɔ Toi Koni Ohi Shi Kɛya Naanɔ wolo lɛ eko, ni ekwɛ mli beni ekɛ mɔ ko miikase Bo Nyɔŋmɔ Toi wolo lɛ. Nikasemɔ lɛ eko fɛɛ eko heɔ baafãi enyɔ, ni ehaa sane ni abi yɛ baafã ni yɔɔ abɛku ŋwɛigbɛ lɛ hetoo. Nɔ ni fata mfonirii lɛ ahe ji saji ni aŋmala kɛmiitsɔɔ nibii amli kɛ ŋmalɛi ni atsɛ yisɛɛ. Kɛmiiya wolo lɛ baafai lɛ babaoo ashishigbɛ lɛ, afee akrabatsa ko ni akɛ otii krokomɛi kɛ Ŋmalɛi komɛi ewo mli koni adamɔ nikaselɔ lɛ nyɛmɔ nɔ akɛ lɛ asusu he.
5. Mɛɛ be wɔbaanyɛ wɔkɛ woji bibii nɛɛ aha, ni mɛɛ gbɛ nɔ wɔbaatsɔ wɔkɛha?
5 Bɔ ni Akɛbaatsu Nii Aha: Obaanyɛ okɛ woji nɛɛ eko fɛɛ eko aha yɛ shĩa kɛ shĩa nitsumɔ lɛ mli be fɛɛ be ni obaana akɛ ehe miihia ni ofee nakai, obaanyɛ okɛha po kɛ́ atsɔko akɛ akɛha yɛ nyɔɔŋ lɛ nɔ. (Kwɛmɔ akrabatsa ni ji “Gbɛ Nɔ ni Abaanyɛ Atsɔ Akɛha” lɛ.) Obaanyɛ okɛtsu nii be ni ofeɔ sɛɛkuu-kɛsaramɔ lɛ; kɛɛmɔ mɔ ni yɔɔ wiemɔ lɛ he miishɛɛ lɛ akɛ oyɛ nɔ ko ni okɛbaatsɔɔ lɛ, no sɛɛ lɛ okɛ wolo bibioo lɛ aha lɛ.
6. Mɛɛ gbɛ nɔ wɔɔtsɔ wɔkɛ woji bibii nɛɛ afee Biblia mli nikasemɔ?
6 Akɛni sanebimɔi ni akala bɛ Bo Nyɔŋmɔ Toi wolo lɛ mli hewɔ lɛ, nikasemɔ lɛ efeŋ sanebimɔ kɛ hetoo taakɛ obaafee kɛ́ okɛ mɔ ko miikase Biblia lɛ Tsɔɔ wolo lɛ. Yɛ he fɛɛ he lɛ, mɛi sumɔɔ ni agba amɛ saji. No hewɔ lɛ, okɛ mfonirii ni yɔɔ wolo lɛ mli lɛ atsu nii kɛgba Biblia lɛ mli saji ni ajɛ mumɔŋ aŋmala lɛ otsɔɔ. Tsɔɔmɔ nɔ ni mfoniri lɛ wieɔ he lɛ mli. Okɛ miishɛɛ awie he. Ha nikaselɔ lɛ atsɔɔ esusumɔ yɛ mfoniri lɛ he. Kanemɔ ŋmalɛi ni yɔɔ baafã lɛ shishigbɛ lɛ, ni okɛlɛ asusu nɔ ni amɛtsɔɔ lɛ he. Bi lɛ saji ni baaha ekɛ ehe awo nikasemɔ lɛ mli, ni okwɛ akɛ enu lɛ nikasemɔ lɛ shishi. Kɛ́ ehiɛ Bo Nyɔŋmɔ Toi Koni Ohi Shi Kɛya Naanɔ wolo lɛ, beni nyɛsusuɔ mfonirii lɛ ahe lɛ, okɛlɛ akane saji kɛ ŋmalɛi ni kɔɔ mfonirii lɛ eko fɛɛ eko he lɛ.
7. Te wɔɔfee tɛŋŋ wɔye wɔbua wɔ-Biblia nikaselɔ koni eya ehiɛ?
7 Ye Obua Nikaselɔ lɛ Koni Eya Ehiɛ: Eeenyɛ eba akɛ nyɛnikasemɔ lɛ baaha nikaselɔ lɛ aná shwelɛ akɛ ebaakase bɔ ni akaneɔ nii, bɔni afee ni lɛ diɛŋtsɛ enyɛ ekane nii koni ená Yehowa he nilee. (Mat. 5:3; Yoh. 17:3) No hewɔ lɛ, kɛ́ Bo Nyɔŋmɔ Toi wolo lɛ ji nɔ ni okɛ mɔ lɛ kaseɔ lɛ, beni be shwieɔ mli lɛ, obaanyɛ otsɔɔ nikaselɔ lɛ bɔ ni akaneɔ nii koni nyɛtsake nikasemɔ lɛ kɛya Bo Nyɔŋmɔ Toi Koni Ohi Shi Kɛya Naanɔ wolo lɛ mli. Ekɔɔɔ he eko wolo bibii lɛ ateŋ nɔ ni nyɛkaseɔ lɛ, anyɛŋ abaptisi nikaselɔ lɛ kɛ́ egbe wolo lɛ kasemɔ naa. Esa akɛ okɛlɛ atsa nikasemɔ lɛ nɔ yɛ Biblia lɛ Tsɔɔ wolo lɛ mli loo wolo kroko ni sa ni baaha enu Biblia mli anɔkwalei lɛ ashishi jogbaŋŋ diɛŋtsɛ.
8. Mɛni hewɔ eŋɔɔ onaa waa akɛ oná woji hei ni okɛbaatsu nii yɛ shiɛmɔ nitsumɔ mli lɛ?
8 Kɛ́ mɛi baahi shi kɛya naanɔ lɛ, no lɛ ehe miihia ni amɛbo jeŋ muu fɛɛ Maŋtsɛ lɛ toi. (Yes. 55:3) Ni nɔ ni Yehowa sumɔɔ ji akɛ “gbɔmɛi fɛɛ,” ni mɛi ni leee nikanemɔ fata he lɛ akase bɔ ni aboɔ lɛ toi. (1 Tim. 2:3, 4) Eŋɔɔ wɔnaa waa akɛ wɔná woji hei nɛɛ ni wɔbaanyɛ wɔkɛtsɔɔ mɛi bɔ ni amɛbaafee amɛbo Nyɔŋmɔ toi!
[Akrabatsa ni yɔɔ baafa 3]
Gbɛ Nɔ ni Abaanyɛ Atsɔ Akɛha
Okɛ wolo lɛ baafa 2 kɛ 3 lɛ atsɔɔ mɔ lɛ, ni obi lɛ akɛ: “Ani obaasumɔ ni ohi jeŋ ko ni tamɔ nɛkɛ mli? [Ŋmɛɛ gbɛ ni eha hetoo.] Ŋmalɛi lɛ woɔ shi [loo wolo krɔŋkrɔŋ nɛɛ woɔ shi] akɛ etsɛŋ ni Nyɔŋmɔ baafee shikpɔŋ lɛ fɛfɛo, he ko ni toiŋjɔlɛ yɔɔ ni ohia loo hela bɛ jɛmɛ. Kadimɔ nɔ ni esa akɛ wɔfee koni wɔnyɛ wɔhi jɛi. [Kanemɔ Yesaia 55:3, ni atsɛ yisɛɛ yɛ wolo lɛ baafa 3 lɛ ŋwɛigbɛ lɛ.] Ŋmalɛ nɛɛ kɛɔ wɔ akɛ ‘wɔba’ Nyɔŋmɔ ŋɔɔ ni ‘wɔbo lɛ toi.’ Shi te wɔɔfee tɛŋŋ wɔbo Nyɔŋmɔ toi?” Gbelemɔ kɛya baafa 4 kɛ 5 lɛ, ni okɛ mɔ lɛ asusu hetoo lɛ he. Kɛ́ ebɛ deka lɛ, shi wolo bibioo lɛ oha lɛ, ni okɛlɛ ato gbɛjianɔ koni oku osɛɛ okɛlɛ ayasusu hetoo lɛ he.