Bɔ ni Akɛ Sanekpakpa ni Jɛ Nyɔŋmɔ Ŋɔɔ!
Wolo lɛ Baatsu Nii Aha Wolo Hee ni Baaye Abua Wɔ Kɛfee Sɛɛkuu-kɛsaramɔi ní Wɔnyɛ Wɔje Biblia Mli Nikasemɔi Hu Ashishi
1. Mɛɛ wolo hee ko ni ajie lɛ kpo yɛ “Ohiɛ Akã Otsui He!” Kpokpaa Wulu nɔ Kpee lɛ shishi lɛ baaye abua wɔ kɛfee sɛɛkuu-kɛsaramɔi ní wɔnyɛ wɔje Biblia mli nikasemɔi hu ashishi?
1 Beni wɔtee “Ohiɛ Akã Otsui He!” Kpokpaa Wulu nɔ Kpee lɛ, wɔná miishɛɛ waa beni wɔnine shɛ wolo hee ni baaye abua wɔ kɛfee sɛɛkuu-kɛsaramɔi ní wɔnyɛ wɔje Biblia mli nikasemɔi hu ashishi lɛ nɔ. Sanekpakpa ni Jɛ Nyɔŋmɔ Ŋɔɔ! wolo lɛ tamɔ wolo ni eyeɔ najiaŋ ni ji Taoɔ wolo bibioo lɛ ejaakɛ nikasemɔi ni yɔɔ mli lɛ yɛ kukuji. Wolo bibioo nɛɛ baaye abua wɔ waa ni wɔnyɛ wɔfee Biblia mli nikasemɔi yɛ shinai anaa. Kɛlɛ, yɛ be mli ni Taoɔ wolo lɛ wieɔ nibii ni ataoɔ kɛjɛɔ Kristofoi adɛŋ, ní baanyɛ afee nɔ ni wa kɛha nikaselɔi hei akɛ amɛaakpɛlɛ nɔ lɛ he lɛ, wolo hee nɛɛ gbalaa jwɛŋmɔ kɛyaa sanekpakpa ni yɔɔ Biblia lɛ mli lɛ nɔ.—Bɔf. 15:35.
2. Mɛni hewɔ afee Sanekpakpa wolo bibioo lɛ?
2 Mɛni hewɔ afee wolo nɛɛ? Nyɛmimɛi ni yɔɔ je lɛŋ fɛɛ lɛ miibi ni aha amɛ wolo ko ni kasemɔ yɛ mlɛo ni baagbala mɛi kɛba anɔkwale lɛ he, ní anyɛ akɛ amɛ akase Biblia lɛ Tsɔɔ wolo lɛ, ni ji wolo titri ni wɔkɛ mɛi feɔ Biblia mli nikasemɔ yɛ mli lɛ. Bei pii lɛ, mɛi ni woji wuji akasemɔ woɔ amɛhe gbeyei lɛ sumɔɔ ni amɛkase Biblia lɛ kɛtsɔ wolo bibioo ko ni akɛ amɛ aaakase lɛ nɔ. Kɛfata he lɛ, ewaaa kwraa akɛ aaatsɔɔ woji bibii ashishi kɛya wiemɔi babaoo amli.
3. Mɛɛ gbɛ nɔ wolo bibioo nɛɛ yɔɔ srɔto yɛ woji krokomɛi ni wɔkɛ mɛi kaseɔ lɛ ahe?
3 Bɔ ni Afee Lɛ Aha: Aŋmala wɔwoji ni wɔkɛ mɛi kaseɔ lɛ babaoo bɔ ni kɛ́ mɛi lɛ kane lɛ amɛbaanu anɔkwale lɛ shishi ní ehe ehiaaa ni aye abua amɛ. Wolo nɛɛ yɛ srɔto. Aŋma ni akɛfee Biblia mli nikasemɔ, shi esa akɛ mɔ ko aye abua. No hewɔ lɛ, kɛ́ okɛ miiha mɔ ko lɛ, ehi jogbaŋŋ akɛ okɛ mɔ lɛ baasusu kuku kome loo enyɔ he. Kukuji lɛ asɛɛ kɛlɛɛɛ, no hewɔ lɛ abaanyɛ akɛ mɛi akase yɛ amɛshinai anaa loo yɛ amɛnitsumɔhei. Eyɛ mli akɛ ehi akɛ aaaje nikasemɔ lɛ shishi kɛjɛ nikasemɔ ni ji 1 lɛ nɔ moŋ, shi wɔbaanyɛ wɔje nikasemɔ lɛ shishi yɛ wolo lɛ mli he fɛɛ he.
4. Mɛɛ gbɛ nɔ wolo bibioo lɛ yeɔ ebuaa wɔ ni wɔtsɔɔ nii tɛ̃ɛ kɛjɛɔ Biblia lɛ mli?
4 Yɛ wɔwoji lɛ babaoo amli lɛ, abaanyɛ ana hetoi kɛha sanebimɔi lɛ yɛ kukuji lɛ amli. Shi, yɛ wolo nɛɛ mli lɛ, Biblia lɛ mli titri ji he ni abaana hetoi lɛ yɛ. Mɛi babaoo sumɔɔ ni amɛkase nii kɛjɛ Biblia lɛ mli fe ni amɛaakase kɛjɛ wɔwoji lɛ amli. No hewɔ lɛ, aŋmalako ŋmalɛi ni atsɛ yisɛɛ lɛ eko kwraa mli wiemɔi lɛ fɛɛ yɛ wolo lɛ mli. Esa akɛ akane kɛjɛ Biblia lɛ diɛŋtsɛ mli. Enɛ yeɔ ebuaa nikaselɔi lɛ ni amɛnaa akɛ nɔ ni amɛkaseɔ lɛ jɛ Nyɔŋmɔ ŋɔɔ.—Yes. 54:13.
5. Mɛni hewɔ ehe hiaa ni nɔkwɛlɔ lɛ asaa ehe jogbaŋŋ kɛha nikasemɔ fɛɛ nikasemɔ lɛ?
5 Wolo lɛ gbalaaa ŋmalɛi ni atsɛ yisɛɛ lɛ fɛɛ mli. Mɛni hewɔ? Afee lɛ nakai koni ewo nikaselɔ lɛ hewalɛ ni ebi saji koni eha tsɔɔlɔ lɛ kɛ enitsɔɔmɔ hesai lɛ atsu nii. No hewɔ lɛ, ehe miihia koni asaa he jogbaŋŋ kɛha nikasemɔ fɛɛ nikasemɔ. Ŋaawoo: Kaawie fe nine. Wɔyɛ he miishɛɛ akɛ wɔbaagbala Ŋmalɛ lɛ mli. Shi bei pii lɛ, nikaselɔ lɛ nuɔ sane lɛ shishi waa kɛ́ wɔha lɛ diɛŋtsɛ egbala nɔ ni esusuɔ akɛ ŋmalɛ lɛ tsɔɔ lɛ mli. Kɛ́ wɔkɛ sanebimɔi tsu nii jogbaŋŋ lɛ, wɔbaanyɛ wɔye wɔbua lɛ ni enu ŋmalɛi lɛ fɛɛ shishi.—Bɔf. 17:2.
6. Mɛɛ gbɛ nɔ wɔbaanyɛ wɔkɛ wolo bibioo lɛ atsu nii (a) yɛ hei ni mɛi ayiŋ feɔ amɛ enyɔɔnyɔ yɛ Nyɔŋmɔ kɛ Biblia lɛ he? (b) kɛ́ wɔmiishiɛ yɛ shĩa kɛ shĩa? (d) kɛtsɔ gbɛ ni yɔɔ tɛ̃ɛ nɔ kɛje Biblia mli nikasemɔi ashishi? (e) kɛ́ wɔmiifee sɛɛkuu-kɛsaramɔi?
6 Taakɛ eji yɛ woji krokomɛi ni wɔkɛ mɛi kaseɔ lɛ agbɛfaŋ lɛ, abaanyɛ akɛ wolo bibioo nɛɛ aha be fɛɛ be, ekɔɔɔ he eko wolo ni akɛhaa yɛ nyɔɔŋ lɛ mli. Mɛi babaoo baasumɔ ni amɛkɛ gbɛ ni yɔɔ tɛ̃ɛ lɛ atsu nii kɛje Biblia mli nikasemɔi ashishi yɛ shinai anaa. Kɛfata he lɛ, taakɛ atsĩ tã yɛ kpokpaa wulu nɔ kpee lɛ shishi lɛ, kɛ́ wɔkɛtsu nii beni wɔku wɔsɛɛ wɔtee mɛi ni jie miishɛɛ kpo lɛ aŋɔɔ lɛ, “ebaaha sɛɛkuu-kɛsaramɔ lɛ afee nɔ ni yɔɔ miishɛɛ diɛŋtsɛ!”—Kwɛmɔ akrabatsai ni yɔɔ baafa 5-7 lɛ.
7. Mɛɛ gbɛ nɔ obaanyɛ okɛ wolo bibioo lɛ afee Biblia mli nikasemɔ?
7 Bɔ ni Wɔbaafee Nikasemɔ lɛ Wɔha: Wɔbaanyɛ wɔkane sanebimɔi ni ato naa ni adiki mli lɛ kɛje sanegbaa lɛ shishi. No sɛɛ lɛ, kanemɔ kuku lɛ kɛ ŋmalɛ(i) ni akpa amɛ afã lɛ. Tsɔ ŋaa gbɛ nɔ okɛ sanebimɔi atsu nii kɛye obua shiatsɛ lɛ ni enu nɔ ni ŋmalɛ lɛ tsɔɔ lɛ shishi. No sɛɛ lɛ, dani obaaya fã ni nyiɛ sɛɛ lɛ nɔ lɛ, bi shiatsɛ lɛ ni eha sanebimɔ ni adiki mli lɛ hetoo, koni okɛná nɔmimaa akɛ enu shishi. Kɛ́ obɔi mɔ ko ŋɔɔ yaa klɛŋklɛŋ kwraa lɛ, ebaahi waa akɛ okɛ lɛ baasusu sanebimɔi ni adiki mli lɛ ateŋ ekome pɛ he. Sɛɛ mli lɛ, wɔbaanyɛ wɔkɛ be ni fa akase nii lɛ kɛsusu nikasemɔ muu fɛɛ he.
8. Te esa akɛ wɔkpa ŋmalɛi ni wɔbaakane lɛ ahiɛ wɔha tɛŋŋ, ni mɛni hewɔ?
8 Ŋmalɛi ni atsɛ ni aŋma “kanemɔ” yɛ amɛhiɛ lɛ ji ŋmalɛi ni haa saji ni adiki mli lɛ ahetoo tɛ̃ɛ. Kɛ́ wɔmiitsɛ ŋmalɛ ko koni akane lɛ, esaaa akɛ wɔkɛ wiemɔi tamɔ, “Bɔfo Paulo ŋma akɛ” loo, “Kadimɔ nɔ ni Yeremia gba” lɛ kpaa hiɛ. Mɔ ni wɔshiɛɔ wɔhaa lɛ lɛ baanyɛ asusu akɛ wɔmiikane adesai awiemɔi komɛi kɛkɛ. Ehi jogbaŋŋ akɛ wɔɔkɛɛ akɛ, “Nyɔŋmɔ Wiemɔ lɛ kɛɔ akɛ” loo “Kadimɔ nɔ ni Biblia lɛ gba.”
9. Ani esa akɛ akane ŋmalɛi ni atsɛ lɛ fɛɛ beni afeɔ nikasemɔ lɛ?
9 Ani esa akɛ wɔkane ŋmalɛi ni atsɛ lɛ fɛɛ loo nɔ ni aŋma akɛ “kanemɔ” lɛ pɛ? Shihilɛ lɛ baatsɔɔ. Atsɛ ŋmalɛi ni yɔɔ jɛmɛ lɛ fɛɛ yɛ yiŋtoi komɛi ahewɔ. Saji ni yɔɔ eko fɛɛ eko mli lɛ ahe susumɔ he miihia waa. Shi yɛ shihilɛi komɛi amli lɛ, kɛ́ nikaselɔ lɛ be faaa, ebɛ he miishɛɛ tsɔ, loo enyɛɛɛ ekane nii jogbaŋŋ lɛ, no lɛ ebaabi ni wɔkane ŋmalɛi ni aŋma akɛ “kanemɔ” lɛ pɛ.
10. Mɛɛ be wɔbaanyɛ wɔtsake nikasemɔ lɛ kɛya Biblia Tsɔɔ wolo lɛ mli?
10 Be ni Esa akɛ Atsake Kɛya Biblia Tsɔɔ Wolo lɛ Mli: Kɛ́ wɔkɛ mɔ ko kase nii kɛshɛ he ko ni wɔna akɛ nikasemɔ lɛ miiya nɔ jogbaŋŋ lɛ, wɔbaanyɛ wɔtsake kɛya Biblia Tsɔɔ wolo lɛ mli loo wɔyanɔ yɛ Sanekpakpa wolo bibioo lɛ mli kɛyashi wɔbaagbe naa. Shiɛlɔi baanyɛ amɛkɛ hiɛshikamɔ atsu nii kɛna be ni esa akɛ amɛkɛfee tsakemɔ lɛ. Kɛ́ wɔtsake kɛtee Biblia Tsɔɔ wolo lɛ mli lɛ, ani etsɔɔ doo akɛ wɔje shishi kɛjɛ klɛŋklɛŋ yitso lɛ nɔ? Mla ko bɛ enɛ he. Esoro mɔ fɛɛ mɔ. Kɛlɛ, nikaselɔi lɛ babaoo baaná he sɛɛ akɛ amɛbaakase sane kometoo lɛ nɔŋŋ jogbaŋŋ shii abɔ yɛ Biblia Tsɔɔ wolo lɛ mli.
11. Mɛni hewɔ esa akɛ wɔkɛ wolo hee nɛɛ atsu nii jogbaŋŋ lɛ?
11 Yɛ jeŋ ni ewa akɛ aaanu sanekpakpa ko yɛ mli nɛɛ mli lɛ, wɔná hegbɛ ni nɔ bɛ akɛ wɔɔjaje sane ni hi fe fɛɛ—akɛ Nyɔŋmɔ Maŋtsɛyeli lɛ miiye nɔ ni akɛ etsɛŋ ni ekɛ jeŋ hee ni jalɛ hiɔ mli lɛ baaba! (Mat. 24:14; 2 Pet. 3:13) Wɔyɛ nɔmimaa akɛ mɛi babaoo ni nuɔ sane nɛɛ baakpɛlɛ sane ni ajɛ mumɔŋ aŋma nɛɛ nɔ: “Kwɛ bɔ ni sanekpakpa jajelɔ ní shiɛɔ hejɔlɛ lɛ, sanekpakpa jajelɔ ní shiɛɔ yiwalaheremɔ lɛ naji yɔɔ fɛo yɛ gɔji lɛ anɔ, mɔ ni kɛɔ Zion akɛ: O-Nyɔŋmɔ lɛ yeɔ maŋtsɛ lɛ!” (Yes. 52:7) Nyɛhaa wɔkɛ wolo hee nɛɛ atsua nii ní wɔkɛ sanekpakpa ni jɛ Nyɔŋmɔ ŋɔɔ lɛ aha mɛi ni yɔɔ wɔshikpɔŋkuku lɛ mli ni kumai yeɔ amɛ lɛ!
[Akrabatsa ni yɔɔ baafa 5]
Hei ni Mɛi Ayiŋ Feɔ Amɛ Enyɔɔnyɔ Yɛ Nyɔŋmɔ kɛ Biblia lɛ He:
● Yɛ hei komɛi lɛ, shiɛlɔi naa akɛ mɛi sumɔɔɔ ni akɛ amɛgbaa sane yɛ “Nyɔŋmɔ” kɛ “Biblia” lɛ he. Kɛ́ eba lɛ nakai lɛ, esa akɛ aha sane ni abaagba kɛje shishi lɛ akɔ nibii ni kɔɔ mɔ fɛɛ mɔ he, tamɔ bɔ ni ehe hiaa ni aná nɔyeli kpakpa, he ni abaaná yelikɛbuamɔ yɛ aha wekui kɛ bɔ ni wɔ wɔsɛɛ be baaji aha. Kɛlɛ abaanyɛ akɛ Sanekpakpa wolo bibioo lɛ abɔi nitsumɔ be mli ni wɔkɛ mɔ lɛ egba sane shii abɔ ní wɔha ele nɔ hewɔ ni wɔle akɛ Nyɔŋmɔ yɛ, kɛ nɔ hewɔ ni wɔbaanyɛ wɔkɛ wɔhe afɔ̃ Biblia lɛ nɔ lɛ.
[Akrabatsa ni yɔɔ baafa 6]
Kɛ́ Wɔmiishiɛ yɛ Shĩa kɛ Shĩa:
● “Miba oŋɔɔ ni maha ole bɔ ni ewaaa kwraa akɛ obaanyɛ ole nɔ ni Nyɔŋmɔ eto eyiŋ akɛ ebaafee eha adesai wɔsɛɛ. Ani osusu he pɛŋ kɛji Nyɔŋmɔ baaha wɔye wɔhe kɛjɛ amanehului ahe? [Ŋmɛɛ gbɛ ni eha hetoo.] Wolo bibioo nɛɛ tsɔɔ Biblia lɛ mli he ni obaanyɛ oná hetoo kɛha nakai sanebimɔ lɛ yɛ. [Okɛ wolo lɛ aha lɛ, ni okane klɛŋklɛŋ kuku ni yɔɔ nikasemɔ ni ji 1 lɛ mli lɛ, ni okane Yeremia 29:11 lɛ hu.] Yɛ nɔ ni wɔkane nɛɛ naa lɛ, ani oona akɛ nilee yɛ mli akɛ Nyɔŋmɔ miisumɔ ni ehi eha wɔ wɔsɛɛ? [Ŋmɛɛ gbɛ ni eha hetoo.] Kɛ́ oosumɔ lɛ, wolo nɛɛ baanyɛ atsɔ onɔ. Be kroko lɛ, wɔbaanyɛ wɔsusu kuku ni nyiɛ sɛɛ lɛ he kɛtao hetoo ni Biblia lɛ kɛhaa sanebimɔ nɛɛ, ‘Mɛɛ gbɛ nɔ Nyɔŋmɔ baatsɔ eha adesai aye amɛhe kɛjɛ amanehului ahe?’” Kɛ́ ona akɛ shiatsɛ lɛ yɛ bei pii kɛha bo yɛ oklɛŋklɛŋ saramɔ lɛ mli lɛ, obaanyɛ okane kuku enyɔ lɛ kɛ ŋmalɛi etɛ ni yɔɔ mli lɛ koni nyɛsusu he. Too gbɛjianɔ ni oku osɛɛ ni okɛ lɛ ayasusu sanebimɔ ni nyiɛ sɛɛ ni yɔɔ nakai nikasemɔ lɛ mli lɛ he.
● “Mɛi babaoo sumɔɔ ni amɛsɔle, titri lɛ kɛ́ amɛná naagbai. Ani bo hu osɔleɔ bei komɛi? [Ŋmɛɛ gbɛ ni eha hetoo.] Ani osusuɔ akɛ Nyɔŋmɔ boɔ sɔlemɔi fɛɛ atoi, aloo eeenyɛ ebalɛ akɛ ekomɛi esaaa ehiɛ? [Ŋmɛɛ gbɛ ni eha hetoo.] Mihiɛ wolo bibioo ko yɛ biɛ ni tsɔɔ bɔ ni Biblia lɛ haa nakai sanebimɔi lɛ ahetoo. [Okɛ wolo lɛ eko aha lɛ, ni okɛ lɛ afee ekome kɛsusu klɛŋklɛŋ kuku ni yɔɔ nikasemɔ ni ji 12 lɛ kɛ ŋmalɛi ni aŋma akɛ “kanemɔ” lɛ ahe.] Ani ebɛ naakpɛɛ akɛ Nyɔŋmɔ miisumɔ ni ebo wɔ toi? Shi kɛ́ wɔbaaná sɔlemɔ he sɛɛ kɛmɔ shi lɛ, esa akɛ wɔle Nyɔŋmɔ jogbaŋŋ. [Gbelemɔ kɛya nikasemɔ ni ji 2 lɛ ni okɛ saneyitsei bibii lɛ atsɔɔ lɛ.] Kɛ́ oosumɔ lɛ, manyɛ mashi wolo bibioo nɛɛ maha bo koni be kroko lɛ wɔkane hetoi ni Biblia lɛ kɛhaa sanebimɔi ni he hiaa waa nɛɛ.”
● “Miba oŋɔɔ ejaakɛ mɛi miisusu bɔ ni nibii yaa nɔ ehaa yɛ je lɛ mli lɛ he. Ani osusuɔ akɛ nibii baahi gbi ko? [Ŋmɛɛ gbɛ ni eha hetoo.] Mɛi babaoo anaa kpɛɔ amɛhe kɛ́ amɛná amɛle akɛ sanekpakpa ni baanyɛ aha wɔná hiɛnɔkamɔ yɛ Biblia lɛ mli. Naa sanebimɔi komɛi ni Biblia lɛ haa hetoo.” Okɛ wolo lɛ eko aha lɛ, ni oha etsɔɔ sanebimɔi ni yɔɔ wolo lɛ sɛɛgbɛ lɛ ateŋ nɔ ni enyaa he waa. No sɛɛ lɛ gbelemɔ kɛya nikasemɔ ni ebaahala lɛ, ni otsɔɔ lɛ bɔ ni wɔkaseɔ lɛ wɔhaa. Too gbɛjianɔ ni oku osɛɛ okɛ lɛ ayasusu sanebimɔ ni nyiɛ sɛɛ ni yɔɔ nakai nikasemɔ lɛ mli lɛ he.
[Akrabatsa ni yɔɔ baafa 7]
Kaa Gbɛ ni Yɔɔ Tɛ̃ɛ lɛ Okwɛ:
● “Mitsɔ biɛ ni maha ole gbɛjianɔtoo hee ko ni akɛkaseɔ Biblia lɛ. Wolo bibioo nɛɛ hiɛ nikasemɔi 15 ni tsɔɔ hei ni obaanyɛ oná sanebimɔi ni he hiaa lɛ ahetoi yɛ o-Biblia lɛ mli. [Okɛ wolo lɛ hiɛ kɛ esɛɛ atsɔɔ lɛ.] Ani obɔ mɔdɛŋ akɛ obaanu Biblia lɛ shishi pɛŋ? [Ŋmɛɛ gbɛ ni eha hetoo.] Ha matsɔɔ bo bɔ ni nikasemɔi lɛ waaa kwraa ha. [Okɛ lɛ asusu klɛŋklɛŋ kuku ni yɔɔ sanebimɔ ni ji 3 yɛ nikasemɔ ni ji 3 lɛ mli lɛ he, ní okane Kpojiemɔ 21:4, 5 lɛ. Kɛ́ ebaahi lɛ okɛ lɛ asusu kuku ni nyiɛ sɛɛ lɛ kɛ ŋmalɛi ni akadi akɛ “kanemɔ” lɛ ahe.] Kɛ́ oosumɔ lɛ manyɛ mashi wolo nɛɛ maha bo. Wɔmiiwo bo hewalɛ ni kɛ́ hooo lɛ oka gbɛjianɔtoo ni akɛkaseɔ Biblia lɛ okwɛ shi kome. Kɛ́ oosumɔ lɛ obaanyɛ oya nɔ okase. Be kroko lɛ, wɔbaanyɛ wɔsusu klɛŋklɛŋ nikasemɔ lɛ he. Kadimɔ akɛ baafa kome pɛ ni.”
[Akrabatsa ni yɔɔ baafa 7]
Wiemɔ Wolo lɛ he kɛ́ Oofee Sɛɛkuu-kɛsaramɔ:
● Kɛ́ wɔmiiku wɔsɛɛ wɔyasara mɔ ko ni nya wiemɔ lɛ he lɛ, wɔbaanyɛ wɔkɛɛ akɛ: “Miná miishɛɛ waa akɛ mina bo ekoŋŋ. Mikɛ wolo nɛɛ ni kɛ Biblia mli hetoi haa sanebimɔi babaoo ni yɔɔ miishɛɛ lɛ ba ní mikɛbaha bo. [Okɛ wolo lɛ aha lɛ, ni okɛɛ lɛ ni ekwɛ nɔ ni yɔɔ sɛɛ lɛ.] Te saji nɛɛ ateŋ nɔ ni onyaa he waa lɛ? [Ŋmɛɛ gbɛ ni eha hetoo. No sɛɛ lɛ gbelemɔ kɛya nikasemɔ ni ehala lɛ.] Ha matsɔɔ bo gbɛ nɔ ni obaatsɔ okɛ wolo nɛɛ atsu nii kɛtao hetoo ni Biblia lɛ kɛhaa lɛ.” Okɛ lɛ asusu kuku kome loo enyɔ he yɛ nikasemɔ ni ehala lɛ mli, ní okɛ lɛ akane ŋmalɛi ni akadi akɛ “kanemɔ” lɛ ahe. Ona akɛ ewaaa kwraa akɛ obaaje Biblia mli nikasemɔ shishi! Shi wolo lɛ oha shiatsɛ lɛ ni oto gbɛjianɔ ni oku osɛɛ. Kɛ́ ogbe nikasemɔ lɛ naa lɛ, obaanyɛ oha ehala nikasemɔ kroko ni nyɛsusu he aloo obaanyɛ okɛ lɛ aje wolo lɛ shishi kwraa.