Buu Ojwɛŋmɔ He
1. Mɛni ji afi 2013 sɔɔmɔ afi lɛ kpokpaa nɔ kpee lɛ saneyitso, ni mɛɛ yiŋtoo yɔɔ kpee lɛ sɛɛ?
1 Yesu tsɔɔ ekaselɔi lɛ akɛ amɛsumɔ Yehowa kɛ amɛtsui fɛɛ, kɛ amɛsusuma fɛɛ, kɛ amɛjwɛŋmɔ fɛɛ. (Mat. 22:37, 38) Ato kpokpaa wulu nɔ kpeei ni kã wɔhiɛ lɛ, kɛ kpokpaa nɔ kpeei, kɛ gbi kome kpeei krɛdɛi ni abaafee yɛ afi 2013 sɔɔmɔ afi lɛ mli lɛ ahe gbɛjianɔ koni eye ebua wɔ ni wɔwaje wɔmli gbɛ gbɔmɔ lɛ. Taakɛ ole lɛ, wɔkpokpaa wulu nɔ kpee lɛ saneyitso ji “Ohiɛ Akã Otsui He!” Afi 2013 sɔɔmɔ afi lɛ gbi kome kpee krɛdɛɛ lɛ saneyitso ji, “Buu Ohenilee He.” Ni kpokpaa nɔ kpeei ni abaabɔi feemɔ kɛjɛ afi 2013 shishijee gbɛ lɛ saneyitso ji “Buu Ojwɛŋmɔ He,” ni edamɔ Mateo 22:37 lɛ nɔ. Ato kpee nɛɛ he gbɛjianɔ koni eye ebua wɔteŋ mɔ fɛɛ mɔ koni epɛi esusumɔi amli bɔni afee ni Yehowa aná wɔsusumɔi ahe miishɛɛ jogbaŋŋ.
2. Kɛ́ wɔtee kpee lɛ, mɛɛ sanebimɔi esa akɛ wɔtao amɛhetoo?
2 Nɔ ni Abaasusu he yɛ Kpee lɛ Shishi: Kɛ́ wɔtee kpokpaa nɔ kpee lɛ, esa akɛ wɔbo toi, ni wɔkwɛ akɛ wɔbaaná sanebimɔi ni jieɔ otii titrii lɛ akpo lɛ ahetoo lo, ni sanebimɔi lɛ nɛ:
• Te wɔɔfee tɛŋŋ wɔkwa ‘gbɔmɛi ajwɛŋmɔi’ lɛ?
• Te wɔɔfee tɛŋŋ wɔye wɔbua kɛjie hiɛhaanɔ ni shwilaa mɛi ni heee yeee lɛ ajwɛŋmɔi lɛ?
• Mɛɛ jwɛŋmɔ wɔsumɔɔ ni wɔná?
• Mɛɛ sɛɛnamɔi jɛɔ sanenɔjwɛŋmɔ ni sa mli kɛbaa?
• Te wɔɔfee tɛŋŋ wɔha Yehowa ashɔ̃ wɔsusumɔi?
• Te wumɛi, ŋamɛi, fɔlɔi, kɛ bii aaafee tɛŋŋ amɛha miishɛɛ ahi weku lɛ mli?
• Te wɔɔfee tɛŋŋ wɔfee klalo kɛha Yehowa gbi lɛ?
• Kɛ́ akɛɛ wɔfimɔ wɔjwɛŋmɔ hɛ lɛ, te eshishi lɛ?
• Mɛɛ sɛɛ mɛi ni kɛ nɔ ni amɛkaseɔ lɛ tsuɔ nii lɛ náa?
3. Mɛni hewɔ ehe miihia ni wɔya kpee lɛ gbii enyɔ lɛ fɛɛ, wɔbo wiemɔi lɛ atoi jogbaŋŋ, ni wɔkɛ nɔ ni wɔbaanu lɛ atsu nii lɛ?
3 Satan miibɔ mɔdɛŋ ni efite wɔjwɛŋmɔ. (2 Kor. 11:3) No hewɔ lɛ, esa akɛ wɔbu wɔjwɛŋmɔ he, ni wɔha wɔsusumɔi lɛ asa Yehowa hiɛ. Esa akɛ wɔya nɔ wɔhiɛ Kristo jwɛŋmɔ lɛ, ni wɔbɔ mɔdɛŋ koni jeŋ fɔŋ nɛɛ akaná wɔnɔ hewalɛ. (1 Kor. 2:16) No hewɔ lɛ, tsɔ hiɛ oto gbɛjianɔ koni onyɛ oya kpokpaa nɔ kpee lɛ gbii enyɔ lɛ fɛɛ. Bo kpee lɛ shishi nifeemɔi lɛ atoi jogbaŋŋ. Kɛ́ wɔkɛ saji ni he hiaa ni wɔbaanu lɛ tsu nii lɛ, ebaaye ebua wɔ ni wɔfimɔ wɔjwɛŋmɔ hɛ koni wɔkɛ hiɛdɔɔ atsu Maŋtsɛyeli sɔɔmɔ nitsumɔ lɛ.—1 Pet. 1:13.