Gbɛi Enumɔ ni Abaanyɛ Atsɔ nɔ Aná Biblia Nikaselɔ
1. Kɛ́ ewa kɛha bo akɛ obaaná mɔ ko yɛ oshikpɔŋkuku lɛŋ kɛkase Biblia lɛ, mɛni esa akɛ ofee, ni mɛni hewɔ?
1 Ani ewa kɛha bo akɛ obaaná mɔ ko kɛkase Biblia lɛ? Onijiaŋ akaje wui. Yehowa jɔɔ mɛi ni feɔ esuɔmɔnaa nii ní amɛnijiaŋ ejeee wui lɛ. (Gal. 6:9) Náa gbɛi enumɔ komɛi ni baanyɛ aye abua bo.
2. Te wɔbaafee tɛŋŋ wɔtsɔ gbɛ ni yɔɔ tɛ̃ɛ nɔ wɔje Biblia mli nikasemɔ shishi?
2 Bi Mɔ lɛ Tɛ̃ɛ: Mɛi babaoo le akɛ wɔkɛ Buu-Mɔɔ kɛ Awake! lɛ haa, shi ekolɛ amɛleee akɛ wɔkɛ mɛi feɔ Biblia mli nikasemɔ. Mɛni hewɔ beni oshiɛɔ yɛ shĩa kɛ shĩa lɛ, obiii mɛi lɛ tɛ̃ɛ kɛji amɛbaasumɔ ni okɛ amɛ akase Biblia lɛ? Kɛ́ oyasara mɛi ni yɔɔ sane lɛ he miishɛɛ lɛ, obaanyɛ obi kɛji amɛbaasumɔ ni okɛ amɛ akase Biblia lɛ lo. Kɛ́ amɛŋɔɔɔ nɔ lɛ, obaanyɛ oya nɔ oshi woji oha amɛ koni amɛmiishɛɛ lɛ akagbo. Nyɛmi nuu ko tee nɔ ekɛ Buu-Mɔɔ kɛ Awake! ha gbalashihilɛ mli hefatalɔi ko afii abɔ. Be ko ni ekɛ woji nɛɛ ehee lɛ eko yaha amɛ lɛ, etsɔ ehe ni ebaashi, shi eba ejwɛŋmɔŋ ni ebi akɛ: “Ani nyɛbaasumɔ ni mikɛ nyɛ akase Biblia lɛ?” Kulɛ ebɔleee akɛ amɛbaakpɛlɛ nɔ, shi amɛkpɛlɛ. Amrɔ nɛɛ abaptisi amɛ.
3. Ani esa akɛ wɔmu sane naa akɛ mɛi fɛɛ ni baa asafoŋ kpeei lɛ yɛ mɛi ni kɛ amɛ kaseɔ Biblia lɛ? Tsɔɔmɔ mli.
3 Mɛi ni Baa Asafoŋ Kpeei: Kaamu sane naa akɛ mɛi fɛɛ ni yɔɔ sane lɛ he miishɛɛ ni baa asafoŋ kpeei lɛ yɛ mɛi ni kɛ amɛ kaseɔ Biblia lɛ. Nyɛmi nuu ko bɔ amaniɛ akɛ: “Miná mɛi kpotoo ni mikɛkaseɔ Biblia lɛ yɛ mɛi ni baa asafoŋ kpeei lɛ ni mikɛ amɛ gbaa sane lɛ ateŋ.” Nyɛmi yoo ko kpɛ mli akɛ, ebaatsi ebɛŋkɛ yoo ko ni hiɛ gboɔ, ni yɔɔ bii yei enyɔ yɛ asafo lɛ mli ni abaptisi amɛ lɛ koni ekɛ lɛ agba sane. Yoo lɛ kɛ nɔ ni miihe ashɛ afii 15 sɔŋŋ etee Maŋtsɛyeli Asa lɛ nɔ; eshɛɔ jɛmɛ beni kpee lɛ baaje shishi, ni kɛ́ akpa nɔŋŋ kɛkɛ lɛ eshi. Yoo nɛɛ kpɛlɛ ni akɛ lɛ kase Biblia lɛ, ni sɛɛ mli lɛ eba anɔkwale lɛ mli. Nyɛmi yoo lɛ ŋma akɛ: “Edɔ mi waa akɛ mimɛ ni afii 15 sɔŋŋ shwie mli dani mibi lɛ kɛji ebaasumɔ ni mikɛ lɛ akase Biblia lɛ lo!”
4. Mɛɛ gbɛ nɔ obaatsɔ oha mɛi ni akɛkaseɔ Biblia lɛ kɛ shiɛlɔi hu ale akɛ ootao mɛi okɛkase Biblia lɛ?
4 Bi Kɛji Mɔ ko yɛ ni Baasumɔ ni Okɛ lɛ Akase Biblia lɛ Lo: Nyɛmi yoo ko bɔɔ mɔdɛŋ eyawaa nyɛmimɛi kɛfeɔ Biblia mli nikasemɔi. Kɛ́ akase nii lɛ agbe naa lɛ, ebiɔ mɔ ni kwɛ nɔ lɛ gbɛ, ni ebiɔ nikaselɔ lɛ akɛ ‘Ani ole mɛi krokomɛi ni baasumɔ ni mikɛ amɛ akase Biblia lɛ lo?’ Kɛ́ okɛ Biblia lɛ Tsɔɔ wolo lɛ miiha mɔ ko ni oyaa eŋɔɔ lɛ, obaanyɛ obi lɛ akɛ: “Ani ole mɔ ko hu ni baasumɔ ni ená wolo nɛɛ eko?” Bei komɛi lɛ, shihilɛ lɛ eŋmɛɛɛ shiɛlɔi kɛ gbɛgbalɔi komɛi agbɛ koni amɛkɛ mɛi ni amɛkɛkpeɔ yɛ shikpɔŋkuku lɛŋ lɛ afee Biblia mli nikasemɔ. No hewɔ lɛ, ha shiɛlɔi krokomɛi lɛ ale akɛ ootao Biblia nikaselɔi.
5. Mɛni hewɔ wɔbaanyɛ wɔbi wɔnyɛmimɛi lɛ ahefatalɔi ni heee yeee lɛ kɛji amɛbaasumɔ ni wɔkɛ amɛ akase Biblia lɛ lo lɛ?
5 Hefatalɔi ni Heee Yeee: Ani shiɛlɔi komɛi yɛ osafo lɛ mli ni amɛhefatalɔi lɛ heee yeee? Hefatalɔi ni heee yeee lɛ ekomɛi sumɔɔɔ ni amɛhefatalɔi Kristofoi lɛ kɛ amɛ gbaa Biblia lɛ he sane, shi kɛ́ mɔ kroko kɛɛ ekɛ amɛ baakase Biblia lɛ, amɛkpɛlɛɔ nɔ. Bei babaoo lɛ, ehi jogbaŋŋ akɛ okɛ hefatalɔ ni ji nyɛmi lɛ asusu he daŋ koni ole gbɛ hi fe fɛɛ ni obaatsɔ nɔ ofee enɛ.
6. Mɛɛ gbɛ nɔ sɔlemɔ baanyɛ aye abua bo waa kɛ́ ootao Biblia nikaselɔ?
6 Sɔlemɔ: Ohiɛ akakpa nɔ akɛ sɔlemɔ nyɛɔ nii babaoo etsuɔ. (Yak. 5:16) Yehowa woɔ shi akɛ kɛ́ wɔba lɛ nɔ ko ni kɛ esuɔmɔnaa nii kpãa gbee lɛ, ebaabo wɔ toi. (1 Yoh. 5:14) Nyɛmi nuu ko ni bɛ ehewɔ dekã kwraa lɛ bɔi sɔlemɔ koni ená mɔ ko kɛkase Biblia lɛ. Eŋa nu he akɛ ewu lɛ naŋ dekã eha Biblia nikaselɔ lɛ, titri lɛ kɛ́ nikaselɔ lɛ naagbai fa. No hewɔ lɛ, beni ebiɔ Yehowa yɛ sɔlemɔ mli koni ewu aná Biblia nikaselɔ lɛ, etsĩ sane nɛɛ tã. Aaafee otsii enyɔ sɛɛ lɛ, aha amɛsɔlemɔi lɛ ahetoo; nyɛmi yoo gbɛgbalɔ ko ni yɔɔ amɛsafo lɛ mli lɛ yana nuu ko ni miisumɔ ni akɛ lɛ akase Biblia lɛ, ni ekɛ lɛ ha nyɛmi nuu lɛ. Nyɛmi nuu lɛ ŋa ŋma akɛ: “Miikɛɛ mɛi fɛɛ ni nuɔ he akɛ ewa kɛha amɛ akɛ amɛaaná Biblia nikaselɔi lɛ akɛ ‘Kɛ́ oosɔle lɛ, bi nɔ tuuntu ni otaoɔ lɛ, ni kaafɔ̃ɔ sɔlemɔ yɛ he.’ Wɔmii eshɛ wɔhe babaoo fe bɔ ni mikpa gbɛ.” Kɛ́ wɔhaaa wɔnijiaŋ aje wui, ni wɔtee nɔ wɔtao Biblia nikaselɔi lɛ, wɔ hu wɔbaaye wɔbua mɔ ko koni ebanyiɛ ‘gbɛ ni kɛ mɔ yaa wala mli lɛ’ nɔ, ni wɔbaaná miishɛɛ ni jɛɔ enɛ feemɔ mli kɛbaa lɛ eko.—Mat. 7:13, 14.