Ani Okɛ Hegbɛ Kɛha Biblia Kasemɔ Miiha?

¹ Mɛi pii miiye omanye yɛ Biblia kasemɔ shishijee mli kɛtsɔ hegbɛ ni akɛhaa gbɔmɛi lɛ fɛɛ koni akɛ amɛ akase Biblia lɛ nɔ. Nuu ko ni ekpoo Biblia kasemɔ he woji aahu lɛ kpɛlɛ nɔ amrɔ nɔŋŋ beni akɛɛ akɛ lɛ baakase Biblia lɛ. Eha hetoo akɛ: “Misumɔɔ be fɛɛ be akɛ makase Biblia lɛ.” Aje Biblia lɛ kasemɔ shishi, ni eweku muu lɛ fɛɛ tee hiɛ fɛfɛo yɛ enɛ mli.

² Esa akɛ wɔ fɛɛ wɔhiɛ ahi Biblia kasemɔ shishijee nɔ. Kɛji aŋkroaŋkroi baaya amɛhiɛ ni amɛtsɔmɔ Kristo kaselɔi lɛ, belɛ esa akɛ atsɔɔ amɛ nii. (Mat. 28:​19, 20) Kɛ aaanyɛ atsɔɔ amɛ nii lɛ, belɛ ebaabi ni akɛ amɛ akase Biblia lɛ. Yɛ bei babaoo mli lɛ abaanyɛ aje nikasemɔ lɛ shishi kɛtsɔ wolo lɛ kɛhamɔ kɛ ekasemɔ he nɔkwɛmɔ nɔ ni aaabi shiatsɛ lɛ ni afee atsɔɔ lɛ koni enyɛ ele babaoo yɛ Biblia lɛ kɛ Nyɔŋmɔ shiwoi ahe lɛ nɔ. Nyɛmi nuu ko nyɛ ekɛ dɛhiɛmɔ wolo, Shihilɛ yɛ Toiŋjɔlɛ Jeŋ Hee ko Mli je nikasemɔi enumɔ shishi. Akɛni enyɛɛɛ efee Biblia mli nikasemɔi ni fa nakai lɛ fɛɛ hewɔ lɛ, ekɛ Biblia mli nikasemɔi lɛ ekomɛi ha shiɛlɔi krokomɛi

³ Kɛ wɔna akɛ eyɛ mlɛo kɛha wɔ akɛ wɔɔje nikasemɔi ashishi lɛ, wɔbaanyɛ ni wɔkɛ shiɛlɔi krokomɛi afata wɔhe kɛya ni wɔye wɔbua amɛ ni amɛ hu amɛna nikasemɔi nɛɛ eko. Aloo, ekolɛ wɔbaanyɛ ni wɔkɛ nikasemɔi ni wɔje shishi lɛ aha mɛi krokomɛi ni yɔɔ asafo lɛ mli lɛ. Kɛ obaasumɔ ni ofee Biblia mli nikasemɔ lɛ, mɛni hewɔ obɔɔɔ mɔdɛŋ akɛ oooha mɛi ni okɛ amɛ kpeɔ yɛ shia kɛ shia sɔɔmɔ lɛ mli lɛ ale akɛ obaasumɔ ni okɛ amɛ akase Biblia lɛ? Shiɛlɔ ko ku esɛɛ eyasara obalayoo fioo ko ni ejieee miishɛɛ tsɔ ko kpo. Ni kɛlɛ, shiɛlɔ lɛ kɛɛ lɛ akɛ ebaasumɔ ni ekɛ lɛ akase Biblia lɛ, kɛkɛ ni gbekɛyoo lɛ kpɛlɛ nɔ. Amrɔ nɛɛ abaptisi lɛ, ni enyɛmi yoo kɛ enyɛmi yoo lɛ wu fɛɛ miiba kpeei.​—Gal. 6:⁠6.

⁴ Jeee mɔ fɛɛ mɔ ni wɔkɛ lɛ jeɔ nikasemɔ shishi lɛ baaya nɔ atsa nikasemɔ lɛ nɔ. Ní jeee mɛi fɛɛ ni kaseɔ nii lɛ baaba anɔkwale lɛ mli. Shi mɛi komɛi baaba kɛ̃. Kɛ wɔje Biblia mli nikasemɔi babaoo shishi lɛ, babaoo hu eeenyɛ eba akɛ wɔbaanyɛ wɔye wɔbua mɛi krokomɛi ni amɛtsɔmɔ Yehowa yijielɔi.