Kaasusu akɛ Onyɛŋ Ofee—Bɔni Obaafee Oto Obe He Gbɛjianɔ
1. Mɛni hewɔ mɛi komɛi shashaoɔ shi akɛ amɛbaaje Biblia mli nikasemɔ shishi lɛ?
1 Mɛi komɛi shashaoɔ shi akɛ amɛbaaje Biblia mli nikasemɔ shishi yɛ dekã ni amɛnáaa hewɔ. Ebiɔ ni oná dekã oha Biblia mli nikaselɔ lɛ. Ebiɔ ni oná be kɛsaa ohe kɛha nikasemɔ lɛ, oná be ni okɛ mɔ lɛ akase nii, ni oná be hu kɛye obua nikaselɔ lɛ koni eye naagbai ni ekɛkpeɔ lɛ anɔ. Bɔfo Paulo kɛɛ akɛ, ekɛ ewala tete fɔ̃ shi ehã Tesalonikabii lɛ koni ekɛye ebua amɛ ni amɛbale Yehowa. (1 Tes. 2:7, 8) Te wɔbaafee tɛŋŋ wɔfee Biblia mli nikasemɔ kɛ́ wɔbɛ dekã kwraa po lɛ?
2. Te suɔmɔ ni wɔyɔɔ kɛha Yehowa lɛ saa bɔni wɔkɛ wɔbe tsuɔ nii wɔhaa lɛ he tɛŋŋ?
2 Yehowa Sɔɔmɔ Biɔ ni Oná Dekã: Anɔkwale lɛ kɛkɛ ji akɛ, Yehowa sɔɔmɔ biɔ ni oná be. Ákɛ nɔkwɛmɔnɔ lɛ, wɔheɔ be kɛfeɔ nibii ni nyiɛ sɛɛ nɛɛ daa; wɔyaa Kristofoi akpee, wɔyaa shiɛmɔ, wɔkaseɔ Biblia lɛ, ni wɔheɔ be hu kɛsɔleɔ. Gbalashihilɛ mli hefatalɔ ni bɛ dekã kwraa po lɛ baasumɔ ni ekɛ miishɛɛ ato gbɛjianɔ koni ená be eha ehefatalɔ lɛ. Enyiɛ nɔŋŋ esaaa akɛ wɔhaa suɔmɔ ni wɔyɔɔ kɛha Yehowa lɛ tsirɛɔ wɔ koni wɔjɛ wɔtsuiŋ wɔhé be kɛjá lɛ. (Efe. 5:15-17; 1 Yoh. 5:3) Yesu tsɔɔ akɛ kaselɔfeemɔ nitsumɔ lɛ ji wɔsɔɔmɔ lɛ fã ko ni he hiaa waa. (Mat. 28:19, 20) Enɛ nɔ ni wɔbaajwɛŋ lɛ baaye abua wɔ koni wɔkashashao shi akɛ wɔbaakpɛlɛ sɔ̃ ni kã wɔnɔ akɛ wɔfee Biblia mli nikasemɔ lɛ nɔ.
3. Kɛ́ wɔshihilɛ eŋmɛɛɛ wɔ gbɛ ni wɔkɛ wɔ-Biblia kaselɔ lɛ ayafee nikasemɔ po lɛ, mɛni wɔbaanyɛ wɔfee?
3 Ní kɛ́ wɔnitsumɔ, hela ni yaa nɔ egbaa wɔnaa waa loo etsamɔ jaraa, loo teokrase sɔ̃i ni wɔtsuɔ he nii lɛ heɔ wɔbe hu? Shiɛlɔi komɛi ni ehe bahiaa akɛ amɛfã gbɛ yɛ be kɛ beaŋ lɛ tsɔɔ tɛlifoŋ loo Intanɛt nɔ nifeemɔ komɛi anɔ amɛkɛ amɛ-Biblia mli nikaselɔi lɛ kaseɔ nii. Mɛi komɛi ni helai ni fɔɔ amɛnaa gbamɔ hewɔ lɛ amɛnyɛɛɛ amɛyafee Biblia mli nikasemɔ lɛ toɔ gbɛjianɔ koni Biblia kaselɔ lɛ aba amɛshĩa kɛha nikasemɔ. Mɛi komɛi eto gbɛjianɔ bɔni afee ni kɛ́ amɛbɛ lɛ, shiɛlɔ kroko ni anyɛɔ akɛ he fɔ̃ɔ enɔ lɛ ayafee amɛ-Biblia mli nikasemɔ lɛ aha amɛ.
4. Mɛɛ jɔɔmɔi jɛɔ Biblia mli nikasemɔi ni wɔfeɔ lɛ amli kɛbaa?
4 Paulo ná miishɛɛ babaoo beni ekɛ ebe kɛ ehewalɛ ye ebua mɛi krokomɛi koni amɛkase anɔkwale lɛ. (Bɔf. 20:35) Beni Paulo susu mɛi fɛɛ ni enyɛ eye ebua amɛ yɛ Tesalonika lɛ ahe lɛ, etsirɛ lɛ ni eda Yehowa shi. (1 Tes. 1:2) Kɛ́ wɔnyɛ wɔto wɔbe he gbɛjianɔ bɔni afee ni wɔná dekã wɔkɛ wɔhe awo Biblia mli nikasemɔi afeemɔi amli lɛ, wɔtsui baanyɔ wɔmli diɛŋtsɛ, ni wɔbaaná miishɛɛ babaoo yɛ wɔsɔɔmɔ lɛ mli.