Miishɛɛ Ni Wɔɔtee Lɛ Shi Yɛ Maŋtsɛyeli Sane lɛ He
1 Be saŋŋ nɛ—ekolɛ gbi kome loo gbii enyɔ, ekolɛ otsi—ni okɛ mɔ ko ni jie miishɛɛ kpo yɛ Maŋtsɛyeli sane lɛ he lɛ wie. Ehe Biblia kasemɔ he wolo jio, eheee eko jio, ehe miihia ni otee miishɛɛ fɛɛ miishɛɛ shi amrɔ nɔŋŋ.
2 Kwɛmɔ saji ni oŋmala yɛ mɔ lɛ he beni otee eŋɔɔ klɛŋklɛŋ kwraa lɛ mli ekoŋŋ. Kɛkɛ lɛ, beni oto owoji owo obaagi lɛ mli ogbe naa lɛ, kwɛmɔ ni okɛ wolo ni okɛha lɛ lɛ ekome afata he koni ogbala ejwɛŋmɔ kɛya nɔ yɛ osɛɛsaramɔ be lɛ mli.
Kɛ okɛ “Naa!” wolo bibioo lɛ ba lɛ, obaanyɛ okɛɛ akɛ:
◼ “Eŋɔɔ minaa akɛ mina bo ekoŋŋ. Nyɛsɛɛ beni mikɛo wie lɛ, mikɛ wolo bibioo nɛɛ sɛɛ tsɔɔ bo, ni wɔkane ŋmalɛ kɛjɛ Biblia lɛ mli ni wɔkɛtsɔɔ akɛ, Nyɔŋmɔ baatsɔ emaŋtsɛyeli lɛ nɔ eha mɔ fɛɛ mɔ ana shia kɛ nitsumɔ kpakpa. Shi Nyɔŋmɔ ewo shi hu akɛ ebaaha hela, gbɔlɛ, kɛ gbele po aba naagbee. Ani ewa kɛhao akɛ ooohe enɛ oye? [Ha shiatsɛ lɛ awie.] Kwɛmɔ sane titri ko ni yɔɔ wolo bibioo ni mishi mihao lɛ kuku 4 lɛ.” Kanemɔ kuku lɛ, ni nyɛsusua ŋmalɛ kome loo enyɔ ni ato naa yɛ baafa lɛ shishigbɛ lɛ he. Aaje Biblia kasemɔ shishi ji no!
3 Bɔni afee ni osaa gbɛ kɛha saramɔ yɛ be kroko mli lɛ, obaanyɛ ni okɛ sanegbaa lɛ aba naagbee yɛ nɛkɛ gbɛ nɔ:
◼ “Obaana akɛ, nɔ fɛɛ nɔ ni wɔsusu he lɛ jɛ Biblia lɛ mli, shi mɛi pii ayiŋ feɔ amɛ kɔshikɔshi yɛ nɔ ni Biblia lɛ kɛɔ, ni amɛaahe amɛye lɛ he. Kɛ miba be kroko lɛ, masumɔ ni mikɛo fɛɛ kɛ be fioo asusu nɛkɛ sane nɛɛ he.” Kɛ oku osɛɛ koni oyatee miishɛɛ lɛ shi lɛ, jee sanegbaa lɛ shishi kɛjɛ yitso bibioo “Wolo ni Tsɔɔ Paradeiso Mli,” ni jeɔ shishi kɛjɛɔ wolo bibioo lɛ kuku 6 lɛ nɔ.
4 Yɛ Shikpɔŋkukuji Ni Woji Fioo Pɛ Akahaa Yɛ Mli: Abaanyɛ atsɔ gbɛ ni tamɔ nɛkɛ nɔŋŋ nɔ beni asaraa gbɔmɛi ni jie miishɛɛ kpo shi amɛheee wolo ko lɛ. Obaanyɛ ogbala ejwɛŋmɔ kɛya wolo bibioo ni okɛtsɔɔ lɛ beni okɛ lɛ gba sane tsutsu lɛ nɔ. Ehe baahia ni oya jɛmɛ shii abɔ ni okɛ Biblia lɛ kɛ wolo bibioo lɛ ekome ni ji onɔ̃ atsu nii dani ekolɛ shiatsɛ lɛ anyɛ ahe eko. Kɛ okɛ July 1 loo July 15 Buu-Mɔɔ lɛ ha lɛ, gbalamɔ jwɛŋmɔ kɛya saji ni yɔɔ “Naa!” wolo bibioo lɛ mli ni kɔɔ he lɛ nɔ beni okuɔ osɛɛ ni oyatee miishɛɛ shi lɛ.
5 Abaanyɛ adamɔ sane ni yɔɔ Reasoning wolo lɛ baafai 154-6 nɔ asaa sɛɛsaramɔi kpakpai ni kɛ Biblia mli nikasemɔ yɛ Nɔyeli wolo bibioo lɛ mli lɛ baaba Aloo abaanyɛ aje Biblia kasemɔ shishi kɛtsɔ sane nɛɛ bimɔ nɔ: “Ani ole akɛ Biblia lɛ kɛ hiɛnɔkamɔi enyɔ haa? Ekome ji ni ahi shi kɛya naanɔ yɛ shikpɔŋ nɔ. Wolo bibioo nɛɛ tsɔɔ bɔ ni enɛ baaba mli aha lɛ mli” Gbelemɔ wolo bibioo lɛ baafa 15, ni okane ŋmalɛi etɛ ni atsɛ lɛ.
6 Kɛ okɛ woji tɛtrɛbii enyɔ eha, aloo wolo wulu, loo wolo bibioo ko, aloo okɛ mɔ ko gba Biblia lɛ he sane kɛkɛ yɛ miishɛɛ mli lɛ, gbɛnaa nii akɛ okanya nakai miishɛɛ lɛ ebaka onɔ. Wɔmiiwo nyɛ fɛɛ hewalɛ ni nyɛkɛ be ko ama shi yɛ August nyɔŋ lɛ mli ni nyɛkɛ nyɛhe awo nɛkɛ yiwalaheremɔ nitsumɔ nɛɛ mli.—1 Tim. 4:16.