Okɛ jw.org lɛ Atsu Nii Be ni Oshiɛɔ Lɛ

Wɔ-Wɛb saiti lɛ ji dɛŋdade ko ni nɔ bɛ ni baaye abua wɔ ni wɔnyɛ wɔshiɛ sane kpakpa lɛ “kɛyashi shikpɔŋ lɛ naagbeehei lɛ.” (Bɔf. 1:8) Shĩatsɛmɛi pii lé jw.org lɛ he nɔ ko. Kɛ̃lɛ, amɛbaleɔ Wɛb saiti nɛɛ he sane klɛŋklɛŋ kwraa kɛ́ shiɛlɔ ko wie he etsɔɔ amɛ.

Nɔkwɛlɔ gbɛfalɔ ko egbala vidio ni ji, Mɛni Hewɔ Esa akɛ Okase Biblia Lɛ? ewo efoŋ nɔ, ni be fɛɛ be ni hegbɛ lɛ baagbele lɛ, ejieɔ ehãa mɛi. Akɛ nɔkwɛmɔnɔ, kɛ́ eetsu shĩa fɛɛ shĩa shiɛmɔ nitsumɔ lɛ, ekɛɔ akɛ: “Miisara mɛi koni mikɛ be kukuoo ko aye abua amɛ ni amɛná sanebimɔi etɛ komɛi ni he hiaa waa lɛ ahetoo, nomɛi ji: Mɛni hewɔ naagbai efa yɛ je lɛ mli nakai? Te Nyɔŋmɔ baafee tɛŋŋ etsu naagbai nɛɛ ahe nii? Ni te wɔbaafee tɛŋŋ wɔkpee naagbai nɛɛ anaa amrɔ nɛɛ kɛyashi Nyɔŋmɔ baatsu amɛhe nii? Vidio ni sɛɛ jɛkɛɛɛ nɛɛ hãa sanebimɔi nɛɛ ahetoo.” Nɔŋŋ kɛkɛ lɛ ebɔi vidio lɛ jiemɔ, kɛkɛ lɛ ekwɛ bɔ ni shiatsɛ lɛ baafee enii ehã. Vidio lɛ náa mɔ nɔ hewalɛ aahu akɛ mɛi babaoo ni kwɛɔ lɛ kwɛɔ fɛɛ kɛyashiɔ naagbee. No sɛɛ lɛ, nɔkwɛlɔ gbɛfalɔ lɛ kɛɔ akɛ: “Onu yɛ vidio mli akɛ obaanyɛ otsɔ Intanɛt lɛ nɔ obi ni akɛ bo abakase Biblia lɛ. Shi akɛni miyɛ biɛ lɛ, manyɛ matsɔɔ bo bɔ ni afeɔ lɛ.” Kɛ́ shiatsɛ lɛ kpɛlɛ lɛ, ekɛ Sanekpakpa wolo bibioo lɛ tsuɔ nii kɛtsɔɔ lɛ bɔ ni afeɔ lɛ. Kɛ́ shiatsɛ lɛ bɛ dekã lɛ, ekɛ lɛ toɔ gbɛjianɔ koni eyafee nakai be kroko. Kɛ́ etee niyelihe ni eyajɔɔ ehe fioo, ni mɔ ko ta emasɛi lɛ, ekɛ lɛ bɔiɔ sanegbaa kɛ miishɛɛ, kɛkɛ lɛ ekɛ shiɛmɔ wiemɔ ni tamɔ nakai nɔŋŋ etsu nii. Ani okɛ jw.org lɛ miitsu nii yɛ shiɛmɔ nitsumɔ lɛ mli?