Okɛ jw.org lɛ Atsu Nii yɛ Shiɛmɔ Nitsumɔ lɛ Mli—“Okɛ Yehowa Abɔ Naanyo”

Kɛ́ otee jw.org lɛ nɔ fã ni ji “Biblia Tsɔɔmɔi,” ni okliki “Gbekɛbii” lɛ, obaana “Okɛ Yehowa Abɔ Naanyo,” ni lalai, vidioi, kɛ nifeemɔi yɛ jɛmɛ kɛhã gbekɛbii. Ani okɛ fã nɛɛ miitsu nii yɛ shiɛmɔ nitsumɔ lɛ mli? Kɛ́ okɛ fɔlɔ ko ni hiɛ bii bibii miikase Biblia lɛ, mɛni hewɔ ojieee otsɔɔɔ lɛ? Ekolɛ no baawo lɛ hewalɛ ni etao nibii krokomɛi ni yɔɔ wɔ-Wɛb saiti lɛ nɔ.

Be ni nyɛmi nuu ko jaa Maŋtsɛyeli Sane ni Ji 38 lɛ, ekɛ yoo ko kpe ni ehã lɛ dɛhiɛmɔ wolo lɛ eko, nɔŋŋ kɛkɛ ni yoo lɛ bɔi kanemɔ. Yoo lɛ yɛ bii bibii pii ní miisumɔ ni amɛle nɔ ni yɔɔ dɛhiɛmɔ wolo lɛ mli. Nyɛmi nuu lɛ kɛ be fioo ko gba amɛ nibii ni yɔɔ dɛhiɛmɔ wolo lɛ mli, ni ekɛ wɔ-Wɛb saiti lɛ adrɛs ni yɔɔ sɛɛ lɛ tsɔɔ amɛ. Akɛni yoo lɛ nya he hewɔ lɛ, nyɛmi nuu lɛ kɛ emobail foŋ lɛ jie Caleb vidioi lɛ ekome etsɔɔ lɛ kɛ ebii lɛ.

Nyɛmi yoo ko jie wɔ-Wɛb saiti lɛ kɛ saji ni yɔɔ nɔ kɛhã wekui lɛ yi ehã enaanyo nitsulɔ ko ni yɔɔ bii. Yoo lɛ kɛ ebii lɛ tee jw.org lɛ nɔ. Sɛɛ mli lɛ, ekɛɛ wɔnyɛmi yoo lɛ akɛ, ebii lɛ láa “Okɛ Yehowa Abɔ Naanyo” lalai lɛ ateŋ ekome ni yitso ji “Shiɛmɔ Wiemɔ Lɛ” kɛnyiɛɔ amɛshĩa lɛ mli.

Bɔɔ mɔdɛŋ ni ole nibii ni yɔɔ jw.org lɛ fã nɛɛ nɔ lɛ kɛnitsumɔ, ni oŋɔ vidioi, lalai, loo nifeemɔi ni yɔɔ nɔ lɛ eko owo omobail foŋ lɛ nɔ. Kɛkɛ lɛ, obaanyɛ okɛ jw.org lɛ fã nɛɛ atsu nii yɛ shiɛmɔ nitsumɔ lɛ mli. Mɛɛ dɛŋdade ni he yɔɔ sɛɛnamɔ waa ni baaye abua wɔ koni wɔsɔmɔ Nuŋtsɔ lɛ akɛ nyɔji po nɛ!​—Bɔf. 20:19.