Okɛ Nyɔŋmɔ Wiemɔ lɛ Mlibotemɔ Wolo Bibioo lɛ Atsu Nii Kɛje Sanegbaa Shishi
1. Mɛɛ wolo hee wɔbaanyɛ wɔkɛtsu nii yɛ shiɛmɔ mli?
1 Wolo hee ni ji Nyɔŋmɔ Wiemɔ lɛ Mlibotemɔ lɛ baanyɛ aye abua wɔ yɛ shiɛmɔ nitsumɔ lɛ mli. Kɛ́ wɔmiisaa wɔhe kɛ shiɛmɔ wiemɔi lɛ, mɛɛ gbɛ nɔ wɔɔtsɔ wɔkɛ wolo hee nɛɛ atsu nii? Akɛni abua ŋmalɛi anaa awo saneyitsei srɔtoi amli yɛ wolo nɛɛ mli taakɛ eji yɛ Reasoning wolo lɛ mli lɛ hewɔ lɛ, abaanyɛ akɛtsu nii kɛje sanegbaa shishi.
2. Te wɔɔfee tɛŋŋ wɔkɛ Nyɔŋmɔ Wiemɔ lɛ Mlibotemɔ wolo lɛ atsu nii?
2 Obaanyɛ okɛ sanebimɔ ni ji 8 lɛ atsu nii, ni okɛɛ akɛ: “Wɔkɛ be kukuoo miisara mɛi ni yɔɔ akutso nɛɛ mli lɛ, ejaakɛ mɛi babaoo biɔ akɛ, ‘Ani esa akɛ ashwa Nyɔŋmɔ yɛ amanehului ní adesai naa lɛ ahe?’ [Yɛ shikpɔŋkukuji komɛi amli lɛ, ehi akɛ okɛ sanebimɔ lɛ atsɔɔ lɛ.] Te osusuɔ tɛŋŋ? [Ŋmɛɛ gbɛ ni ehã hetoo.] Biblia lɛ hãa sanebimɔ nɛɛ hetoo jogbaŋŋ.” Kanemɔ ŋmalɛi ni atsɛ yisɛɛ lɛ ekome loo nɔ kɛjɛ Biblia lɛ mli tɛ̃ɛ ni nyɛsusu he. Kɛ́ mɔ lɛ nya sane lɛ he lɛ, obaanyɛ okɛ sanebimɔi 20 ni yɔɔ wolo lɛ baafa 1 lɛ atsɔɔ lɛ, ni obi lɛ amɛteŋ nɔ ni ebaasumɔ ni nyɛsusu he be kroko. Aloo obaanyɛ ohã lɛ woji ni wɔkɛ mɛi kaseɔ ni wieɔ sane ni nyɛsusu he lɛ he babaoo lɛ eko.
3. Kɛ́ wɔmiishiɛ yɛ hei ni mɛi ni jeee Kristofoi yɔɔ jɛmɛ lɛ, te wɔɔfee tɛŋŋ wɔkɛ Nyɔŋmɔ Wiemɔ lɛ Mlibotemɔ wolo lɛ aje sanegbaa shishi?
3 Kɛ́ wɔmiishiɛ yɛ hei ni mɛi ni jeee Kristofoi yɔɔ jɛmɛ lɛ, wɔbaanyɛ wɔkɛ sanebimɔ ni ji 4 loo 13 kɛyashi 17 lɛ atsu nii. Akɛ nɔkwɛmɔnɔ lɛ, obaanyɛ okɛ sanebimɔ ni ji 17 lɛ atsu nii ni okɛɛ akɛ: “Wɔkɛ be kukuoo miisara wekui koni wɔye wɔbua amɛ. Ani osusuɔ akɛ wekui kɛ naagbai pii miikpe yɛ wɔbei nɛɛ amli? [Ŋmɛɛ gbɛ ni ehã hetoo.] Gbalashihilɛ mli hefatalɔi pii ená wiemɔ ni nilee yɔɔ mli nɛɛ he sɛɛ, no ji: “Esa akɛ ŋa lɛ aná bulɛ ni mli kwɔ ehã ewu.” [Ehe ehiaaa ni owie akɛ sane ni owieɔ he lɛ yɛ Efesobii 5:33 lɛ. Kɛ́ yoo okɛ wieɔ lɛ, obaanyɛ owie wiemɔi ni yɔɔ Efesobii 5:28 lɛ yɛ no najiaŋ.] Kɛ́ gbalashihilɛ mli hefatalɔi kɛ ŋaawoo nɛɛ tsu nii lɛ, ani amɛbaaná he sɛɛ?”
4. Kɛ́ okɛ mɔ ko ni jeee Kristofonyo gbe sanegbaa naa lɛ, mɛni obaanyɛ ofee?
4 Kɛ́ nyɛgbe naa lɛ, okɛ lɛ ato gbɛjianɔ koni nyɛbatsa nɔ be kroko. Ekolɛ obaanyɛ okɛ lɛ ayasusu ŋmalɛi krokomɛi ni yɔɔ sanebimɔ ni nyɛsusu he lɛ shishi lɛ ateŋ ekome he. Yɛ be ni sa mli lɛ, hã mɔ lɛ ale akɛ nilee wiemɔi ni okɛ lɛ susuɔ he lɛ jɛ Biblia lɛ mli. Obaanyɛ odamɔ saji ni okɛ lɛ egba kɛ bɔ ni enaa Biblia lɛ ehãa lɛ nɔ ohã lɛ wolo ni ebaanya he.—Kwɛmɔ nɔ ni aŋma ahɔ December 2013 Wɔ Maŋtsɛyeli Sɔɔmɔ lɛ mli lɛ.