Nibii ni Arikɔdi—Bɔ ni Ooofee Okɛtsu Nii
1. Yɛ nibii ni aŋmala lɛ sɛɛ, mɛɛ nɔ kroko hu wɔ yɔɔ ni baanyɛ eye ebua wɔ?
1 Mɛi babaoo tsɔɔ jw.org lɛ nɔ amɛkaneɔ wiemɔi ni ŋɔɔ ni ja hu. (Jaj. 12:10) Shi ani okɛ nibii ni arikɔdi lɛ etsu nii dã? Nibii nɛɛ hãa wɔnyɛɔ wɔboɔ nibii ni yɔɔ wɛbsaiti lɛ nɔ lɛ babaoo toi. Mɛɛ gbɛ nɔ wɔbaanyɛ wɔkɛ nibii ni arikɔdi lɛ atsu nii koni wɔná he sɛɛ?
2. Mɛɛ gbɛ nɔ wɔbaanyɛ wɔkɛ nibii ni arikɔdi lɛ atsu nii kɛ́ wɔmiifee aŋkro loo weku nikasemɔ?
2 Kɛhã Aŋkro loo Weku Nikasemɔ: Kɛ́ wɔbo Biblia lɛ, magazin srɔtoi lɛ, loo nibii krokomɛi ni arikɔdi lɛ toi be ni wɔta tsɔne mli kɛmiiya he ko loo be ni wɔmiifee nibii krokomɛi lɛ, eyeɔ ebuaa wɔ ni wɔkɛ wɔbe tsuɔ nii jogbaŋŋ. (Efe. 5:15, 16) Bei komɛi kɛ́ wɔmiifee wɔweku jamɔ lɛ, wɔbaanyɛ wɔtswa nibii ni arikɔdi lɛ ni wɔnyiɛ sɛɛ yɛ wolo lɛ mli. Kɛ́ wɔkɛ nibii ni arikɔdi lɛ tsu nii be ni wɔfeɔ aŋkro nikasemɔ lɛ, eyeɔ ebuaa wɔ waa, titri lɛ kɛ́ wɔmiisumɔ ni wɔle nikanemɔ jogbaŋŋ loo kɛ́ wɔmiikase wiemɔ ko.
3. Namɛi yɔɔ wɔshikpɔŋkuku lɛ mli ni baaná nibii ni arikɔdi lɛ he sɛɛ?
3 Kɛhã Shiɛmɔ Nitsumɔ Lɛ: Ekolɛ mɛi ni yɔɔ wɔshikpɔŋkuku lɛ mli ni bɛ dekã tsɔ kɛhã nikanemɔ lɛ baasumɔ ni amɛbo nibii ni arikɔdi lɛ toi. Aloo ekolɛ wɔkɛ mɔ ko ni wieɔ wiemɔ kroko baakpe ní kɛ́ ebo Maŋtsɛyeli sane lɛ toi yɛ “lɛ diɛŋtsɛ emaŋ wiemɔ” mli lɛ, ebaakpɛlɛ nɔ. (Bɔf. 2:6-8) Yɛ hei komɛi lɛ, mɛi sumɔɔ sane toi boo waa. Akɛ nɔkwɛmɔnɔ lɛ, yɛ mɛi ni atsɛɔ amɛ Hmong lɛ akusum naa lɛ, mɛi gbaa yinɔbii ni baa yɛ amɛsɛɛ lɛ amɛyinɔsane, ni yinɔbii ni agbaa amɛ sane lɛ bɔɔ mɔdɛŋ amɛkɛ nɔ ni amɛnuɔ lɛ toɔ jogbaŋŋ. Yɛ Afrika lɛ, mɛi babaoo nyaa nii ni akaseɔ kɛtsɔ adesãtamɔ nɔ lɛ he.
4. Kɛ́ wɔmiitao wɔye wɔbua mɛi yɛ wɔshikpɔŋkuku lɛ mli lɛ, mɛɛ saji wɔbaanyɛ wɔbi wɔhe?
4 Yɛ oshikpɔŋkuku lɛ mli lɛ, ani obaanyɛ otswa nibii ni arikɔdi lɛ eko ohã shiatsɛmɛi lɛ yɛ amɛ diɛŋtsɛ amɛwiemɔ mli? Ani wɔbaanyɛ wɔkɛ nibii ni arikɔdi lɛ eko amaje mɔ ko kɛtsɔ e-mail nɔ koni ená he sɛɛ? Ani wɔbaanyɛ wɔkɛ nibii ni arikɔdi lɛ eko awo CD nɔ wɔhã shiatsɛ ko ni yɔɔ wiemɔ lɛ he miishɛɛ, ni wɔkɛ wolo lɛ diɛŋtsɛ afata he wɔhã lɛ? Kɛ́ wɔkɛ woji, broshuɔ, magazin, loo trati srɔtoi ni arikɔdi lɛ eko hã mɔ ko yɛ shiɛmɔ nitsumɔ lɛ mli lɛ, wɔbaanyɛ wɔbu he akɔntaa. Ato nibii ni arikɔdi lɛ he gbɛjianɔ kɛhã wɔ-aŋkro nikasemɔ kɛ agbɛnɛ hu, ni wɔkɛgbɛ Maŋtsɛyeli dumɔwui lɛ wɔshwã.—1 Kor. 3:6.