Okɛ Biblia lɛ Tsɔɔ Wolo lɛ Fãi Srɔtoi lɛ Atsu Nii Jogbaŋŋ

Kɛ́ Biblia mli nikaselɔ ko kase nɔ ni Biblia lɛ tsɔɔ diɛŋtsɛ ní ekɛ nɔ ni ekase lɛ tsu nii lɛ, ebaada yɛ mumɔŋ ni ebaawo yibii. (Lala 1:1-3) Wɔbaanyɛ wɔkɛ Biblia lɛ Tsɔɔ wolo lɛ fãi komɛi atsu nii kɛye wɔbua mɛi ni wɔkɛkaseɔ nii lɛ koni amɛya amɛhiɛ.

Sanebimɔi ni Akɛkpa Saneyitso lɛ Hiɛ: Abi saji komɛi yɛ yitso fɛɛ yitso shishijee ní hetoo lɛ jeɔ kpo yɛ nikasemɔ lɛ mli. Obaanyɛ obi saji nɛɛ kɛtee nikaselɔ lɛ miishɛɛ shi kɛhã nɔ ni nyɛbaakase lɛ, shi ehe ehiaaa ni ehã bo hetoo. Aloo obaanyɛ obi lɛ ni ehã eko fɛɛ eko hetoo kuku. Kɛ́ ehetoo lɛ ejaaa lɛ, ehe ehiaaa ni otsɔɔ lɛ hetoo dã. Hetoo ni ebaahã lɛ baaye abua bo koni ona hei ni esa akɛ ogbala mli jogbaŋŋ yɛ nikasemɔ lɛ mli.​—Abɛi 16:23; 18:13.

Saji Krokomɛi ni Fata He: Kɛ́ nikaselɔ lɛ nu nɔ ni nyɛkaseɔ lɛ shishi ni ekpɛlɛ nɔ lɛ, obaanyɛ owo lɛ hewalɛ ni lɛ diɛŋtsɛ ekase saji krokomɛi ni fata he ni kɔɔ nikasemɔ lɛ he lɛ. Be kroko kɛ́ nyɛbaakase nii lɛ, obaanyɛ okɛ be fioo akwɛ akɛ enu nɔ ni ekase lɛ shishi lo. Shi kɛ́ ebaahi lɛ, obaanyɛ okɛ lɛ asusu saji krokomɛi ni fata he lɛ loo efã ko he kɛtsɔ kukuji lɛ amli ni nyɛbaakane kɛ agbɛnɛ lɛ, sanebimɔi komɛi ni otsɔ hiɛ okɛsaa ohe ní obaabi lɛ koni ehã hetoo lɛ nɔ.

Akrabatsa ni Akɛtĩɔ Nikasemɔ lɛ Mli: Saji ni yɔɔ akrabatsa ni akɛtĩɔ nikasemɔ lɛ mli ni yɔɔ yitso fɛɛ yitso naagbee lɛ hãa sanebimɔi ni akɛkpaa saneyitso lɛ hiɛ lɛ hetoo. Obaanyɛ okɛ fã nɛɛ atsu nii kɛna kɛji mɔ ni okɛkaseɔ nii lɛ enu otii ni yɔɔ nikasemɔ lɛ mli lɛ shishi ni ebaanyɛ egbala mli. Nyɛkanea nɔ ni aŋma lɛ kɛ ŋmalɛi ni atsɛ lɛ fɛɛ. No sɛɛ lɛ, hã mɔ ni okɛkaseɔ nii lɛ kɛ ŋmalɛ loo ŋmalɛi ni yɔɔ mli lɛ atsu nii kɛtsɔɔ nɔ hewɔ ni nakai sane lɛ ji anɔkwale lɛ mli.​—Bɔf. 17:2, 3.