Kasemɔ Tsɔɔlɔ Kpele lɛ Beni Okɛ Biblia lɛ Tsɔɔ Wolo lɛ Tsuɔ Nii Lɛ
1. Mɛɛ gbɛ Yesu tsɔ etsɔɔ nii?
1 Yesu ni ji Tsɔɔlɔ Kpele lɛ gbála saji amli yɛ gbɛ ni mli kã shi faŋŋ ni waaa nɔ be fɛɛ be. Bɔni afee ni eha etoibolɔi lɛ asusu nii ahe lɛ, bei komɛi lɛ ebiɔ amɛsusumɔ klɛŋklɛŋ. (Mat. 17:24-27) Egbala jwɛŋmɔ kɛtee Nyɔŋmɔ Wiemɔ lɛ nɔ. (Mat. 26:31; Mar. 7:6) Ekwɛ jogbaŋŋ ní ekɛ saji pii akaha amɛ yɛ be kukuoo mli, ejaakɛ ele akɛ amɛbaaya nɔ amɛkase nii. (Yoh. 16:12) Yesu ná he miishɛɛ hu akɛ eeele kɛji akɛ ekaselɔi lɛ heɔ nɔ ni etsɔɔ amɛ lɛ amɛyeɔ ni amɛnuɔ shishi. (Mat. 13:51) Afee Biblia lɛ Tsɔɔ wolo lɛ koni eye ebua wɔ ni wɔtsɔɔ nii yɛ nakai gbɛ nɔ.
2. Mɛɛ gbɛ̀i anɔ wɔbaanyɛ wɔtsɔ wɔkɛ sanebimɔi ni akɛkpaa saneyitsei lɛ ahiɛ lɛ atsu nii?
2 Sanebimɔi ni Akɛkpaa Hiɛ: Kɛ́ okɛ mɔ ko je wolo lɛ yitso ko shishi lɛ, ebaafee nɔ ni hi akɛ ooogbala ejwɛŋmɔ kɛba sanebimɔi ni akɛkpaa hiɛ ni yɔɔ saneyitso lɛ shishi lɛ nɔ. Bi saji lɛ bɔ ni okpaaa hetoohamɔ gbɛ ni okɛtee nikaselɔ lɛ miishɛɛ shi. Aloo obaanyɛ obi lɛ ni etsɔɔ ejwɛŋmɔ yɛ sanebimɔi nɛɛ ahe kuku. Ehe ehiaaa ni owie hetooi ni ebaaha lɛ ahe babaoo loo ní ojaje saji fɛɛ ni ewieɔ ni ejaaa lɛ. Obaanyɛ oda lɛ shishi kɛkɛ yɛ ejwɛŋmɔ ni etsɔɔ lɛ hewɔ, ni no sɛɛ lɛ nyɛje nikasemɔ lɛ shishi. Bɔ ni ebaaha sanebimɔi ni akɛkpaa sane lɛ hiɛ lɛ hetoo eha lɛ baaye ebua bo ni ole nikasemɔ lɛ mli hei ni ehe baahia ni omamɔ saji anɔ mi waa yɛ.
3. Mɛɛ gbɛ nɔ wɔɔtsɔ wɔha nikasemɔ lɛ afee nɔ ni waaa?
3 Ŋmalɛi: Esa akɛ nikasemɔ lɛ adamɔ Ŋmalɛi lɛ anɔ. (Heb. 4:12) Shi kɛlɛ, ehe ehiaaa ni akane ŋmalɛi ni atsɛ yisɛɛ lɛ fɛɛ. Gbalamɔ jwɛŋmɔ kɛya ŋmalɛi ni tsɔɔ akɛ wɔhemɔkɛyeli lɛ damɔ Biblia lɛ nɔ lɛ nɔ. Ekolɛ ehe ebahiaŋ ni nyɛkane ŋmalɛi ni emaaa saji otii lɛ anɔ mi tsɔ lɛ. Biblia lɛ Tsɔɔ wolo lɛ gbálaa anɔkwale lɛ mli yɛ gbɛ ni waaa nɔ. Ha nikasemɔ lɛ afee nɔ ni waaa. Gbalamɔ jwɛŋmɔ kɛya saji otii lɛ anɔ, okɛ saji babaoo akagbála otii lɛ amli, ni okɛ saji ni kɔɔɔ nikasemɔ lɛ he akawo mli bɔ ni esaaa.
4. Kɛ́ wɔkɛ mɔ ko miikase saneyitso pɔtɛɛ ko lɛ, mɛni baatsɔɔ kɛji esa akɛ wɔŋɔ be ni wɔkɛ mɔ lɛ asusu saji krokomɛi ni fata he lɛ he?
4 Saji Krokomɛi ni Fata He: Saji krokomɛi ni fata he lɛ gbálaa saji 14 ni atsɔko mli tsɔ yɛ nikasemɔi lɛ diɛŋtsɛ amli lɛ mli. Ejeee doo ákɛ akɛ nikaselɔ lɛ asusu saji nɛɛ ahe beni akɛ lɛ kaseɔ nii lɛ. Obaanyɛ owo nikaselɔ lɛ hewalɛ ni lɛ diɛŋtsɛ ekane saji nɛɛ ekomɛi, titri lɛ kɛji akɛ enu saji ni yɔɔ nikasemɔ lɛ diɛŋtsɛ mli lɛ shishi ni ekpɛlɛ nɔ. Ákɛ nɔkwɛmɔnɔ lɛ, kɛ́ nyɛmiikase “Namɔ Ji Yesu Kristo” ni yɔɔ yitso 4 lɛ, ehe ebahiaŋ ni okɛ lɛ asusu sane kroko ni fata he ni ji “Yesu Kristo—Mesia ni Awo Shi yɛ Ehe Lɛ” he kɛ́ nikaselɔ lɛ heɔ yeɔ akɛ Yesu ji Mesia lɛ. Yɛ nikasemɔi krokomɛi amli lɛ, ekolɛ ebaafee nɔ ni sɛɛnamɔ yɔɔ he akɛ nyɛaaŋɔ be kɛsusu saji krokomɛi ni fata he lɛ fɛɛ loo efã ko he.
5. Kɛ wɔkpɛ wɔyiŋ akɛ wɔkɛ nikaselɔ ko baasusu saji krokomɛi ni fata he lɛ he lɛ, mɛɛ gbɛ nɔ wɔbaanyɛ wɔtsɔ wɔfee nakai?
5 Kɛ okpɛ oyiŋ akɛ okɛ nikaselɔ lɛ baasusu saji krokomɛi ni fata he lɛ he lɛ, obaanyɛ otsɔ hiɛ oto saji ni obaabi lɛ ahe gbɛjianɔ ni okɛ lɛ akase emli kukuji lɛ tamɔ bɔ ni nyɛkaseɔ kukuji ni yɔɔ nikasemɔi lɛ diɛŋtsɛ amli lɛ. Aloo obaanyɛ odamɔ yelikɛbuamɔ ni he hiaa nikaselɔ lɛ nɔ okpɛ oyiŋ akɛ obaaŋɔ be fioo beni nyɛkaseɔ nii lɛ ni okɛ lɛ atĩ saji krokomɛi ni fata he ni etsɔ hiɛ ekane lɛ mli. Enɛ baaye abua bo koni ona kɛji akɛ enu nɔ ni lɛ diɛŋtsɛ ekane lɛ shishi.
6. Abaanyɛ akɛ akrabatsa ni yɔɔ nikasemɔi lɛ fɛɛ anaagbee lɛ atsu nii yɛ mɛɛ gbɛ nɔ?
6 Akrabatsa ni Akɛtĩɔ Nikasemɔ lɛ Mli: Bei pii lɛ, saji ni yɔɔ akrabatsa ni yɔɔ nikasemɔi lɛ fɛɛ anaagbee lɛ haa sanebimɔi ni kpaa yitsei lɛ hiɛ lɛ ahetoo. Obaanyɛ okɛ saji nɛɛ atĩ otii titrii ni je kpo yɛ nikasemɔ lɛ mli lɛ mli. Shiɛlɔi komɛi ena akɛ kɛ́ akɛ nikaselɔ lɛ kane saji nɛɛ eko fɛɛ eko kɛ ekolɛ ŋmalɛi ni fata he lɛ, eyeɔ ebuaa. No sɛɛ lɛ amɛbiɔ nikaselɔ lɛ koni etsɔɔ bɔ ni ŋmalɛi lɛ fiɔ saji nɛɛ asɛɛ. Enɛ haa shiɛlɔ lɛ naa kɛji akɛ nikaselɔ lɛ enu saji otii lɛ kɛ bɔ ni Biblia lɛ fiɔ enɛɛmɛi asɛɛ lɛ ashishi jogbaŋŋ lo, ni ehaa enaa kɛji nikaselɔ lɛ kpɛlɛɔ enɛɛmɛi anɔ. Ehaa nikaselɔ lɛ leɔ bɔ ni akɛ Biblia lɛ tsuɔ nii hu kɛgbalaa anɔkwale lɛ mli ahaa mɛi krokomɛi.
7. Mɛɛ gbɛ nɔ wɔbaanyɛ wɔtsɔ wɔkɛ Biblia lɛ Tsɔɔ wolo lɛ atsu nitsumɔ ni akɛwo wɔdɛŋ lɛ he nii?
7 Gbɛ ni mɔɔ shi fe fɛɛ ni wɔɔtsɔ nɔ wɔtsu nitsumɔ ni akɛwo wɔdɛŋ akɛ wɔtsɔɔ mɛi anii ni wɔfee mɛi kaselɔi lɛ ji ni wɔkase bɔ ni Yesu tsɔɔ nii eha lɛ. (Mat. 28:19, 20) Biblia lɛ Tsɔɔ wolo lɛ baanyɛ aye abua wɔ ni wɔfee nakai. Okɛtsu nii jogbaŋŋ kɛtsɔɔ mɛi anɔkwale lɛ yɛ gbɛ ni waaa, ni mli kã shi faŋŋ ni yɔɔ miishɛɛ nɔ.