Yaa Nɔ Osɔle Ni Ohiɛ Aba Nyam Yɛ Nyɔŋmɔ Hiɛ

Nyɔŋmɔ ehã adesai nikeenii ko ni nɔ bɛ, no ji hegbɛ ni amɛyɔɔ akɛ amɛkɛ lɛ baagba sane yɛ sɔlemɔ mli ni amɛhã ele bɔ ni amɛnuɔ he amɛhãa lɛ. Gbalɔ David sɔle akɛ: “Ao Sɔlemɔ Toibolɔ, bo oŋɔɔ gbɔmɛi srɔtoi fɛɛ baaba.” (Lala 65:2) Shi mɛɛ gbɛ nɔ wɔbaanyɛ wɔsɔle ni Nyɔŋmɔ abo wɔ toi ni ejɔɔ wɔ?

JƐƐ OTSUIŊ OSƆLE YƐ HESHIBAA MLI

Kɛ́ osɔle lɛ, onáa hegbɛ ofɔseɔ otsuiŋ oshwieɔ Nyɔŋmɔ hiɛ​—onyɛɔ ogbaa lɛ bɔ ni onuɔ he ohãa diɛŋtsɛ. (Lala 62:8) Nyɔŋmɔ Ofe lɛ sumɔɔ sɔlemɔi ni ajɛɔ tsui krɔŋŋ mli asɔleɔ lɛ.

OKƐ NYƆŊMƆ GBƐ́I DIƐŊTSƐ ATSƐ LƐ

Nyɔŋmɔ yɛ gbɛnaa gbɛ́ii babaoo moŋ, shi eyɛ gbɛ́i kome pɛ. Ewie akɛ: “Miji Yehowa. Migbɛ́i ji no.” (Yesaia 42:8) Gbɛ́i Yehowa lɛ jeɔ kpo aaafee shii 7,000 yɛ Ŋmalɛ Krɔŋkrɔŋ lɛ mli. Gbalɔi pii kɛ Nyɔŋmɔ gbɛ́i diɛŋtsɛ lɛ tsɛ lɛ. Abraham wie akɛ: “Yehowa, ofainɛ, . . . hã maya nɔ [mikɛ bo awie].” (1 Mose 18:30) Wɔ hu, kɛ́ wɔmiisɔle lɛ, esa akɛ wɔkɛ Nyɔŋmɔ gbɛ́i, ni ji Yehowa lɛ, atsu nii.

OBAANYƐ OSƆLE YƐ OWIEMƆ MLI

Ekɔɔɔ he eko wiemɔ mli ni obaasɔle yɛ lɛ, Nyɔŋmɔ baanu osusumɔi kɛ bɔ ni onuɔ he ohãa lɛ shishi. E-Wiemɔ lɛ kɛɔ wɔ akɛ: “Nyɔŋmɔ kwɛɛɛ mɛi ahiɛiaŋ, shi moŋ, yɛ jeŋmaŋ fɛɛ jeŋmaŋ mli lɛ, mɔ ni sheɔ lɛ gbeyei ni efeɔ nɔ ni ja lɛ, lɛ ji mɔ ni enáa ehe miishɛɛ.”​—Bɔfoi 10:34, 35.

Shi kɛ́ wɔmiitao Nyɔŋmɔ ajɔɔ wɔ lɛ, jeee sɔlemɔ pɛ kɛkɛ esa akɛ wɔsɔle. Yɛ saji ni nyiɛ sɛɛ lɛ amli lɛ, wɔbaakwɛ nibii krokomɛi ni esa akɛ wɔfee.