Bɔ Ni Wɔbaafee Wɔsumɔ Wɔnyɛmi Gbɔmɔ

Akɛni wɔji Adam, ni ji klɛŋklɛŋ gbɔmɔ lɛ, seshibii hewɔ lɛ, weku kome mli bii ji wɔ fɛɛ. Eyɛ mli akɛ akpaa gbɛ akɛ weku mli bii baasumɔsumɔɔ amɛhe, ni amɛjie bulɛ kpo amɛtsɔɔtsɔɔ amɛhe moŋ, shi gbii etɛ nɛɛ, mɛi fioo pɛ jieɔ suɔmɔ nɛɛ kpo. Jeee nakai wɔ-Nyɔŋmɔ ni yɔɔ suɔmɔ lɛ sumɔɔ ni wɔfee.

NƆ NI ŊMALƐ KRƆŊKRƆŊ LƐ WIEƆ YƐ SUƆMƆ HE

“Suɔmɔ onyɛmi gbɔmɔ tamɔ bo diɛŋtsɛ ohe.”​—3 MOSE 19:18.

“Nyɛyaa nɔ nyɛsumɔa nyɛhenyɛlɔi.”​—MATEO 5:44.

NƆ NI TSƆƆ AKƐ WƆSUMƆƆ WƆNYƐMI GBƆMƆ

Kadimɔ bɔ ni Nyɔŋmɔ tsɔɔ suɔmɔ mli yɛ e-Wiemɔ lɛ mli, yɛ 1 Korintobii 13:4-7 lɛ:

“Suɔmɔ toɔ etsui shi ni emli hi.”

Te osusuɔ tɛŋŋ? Kɛ́ mɛi to amɛtsui shi amɛhã bo, amɛmli hi yɛ onɔ, ni amɛmli fuuu bo yɛ otɔmɔi ahewɔ lɛ, te onuɔ he ohãa tɛŋŋ?

“Suɔmɔ yeee awuŋa.”

Te osusuɔ tɛŋŋ? Kɛ́ mɛi heee bo amɛyeee loo amɛhe tsɛ̃ɔ bo lɛ, te onuɔ he ohãa tɛŋŋ?

Suɔmɔ “epeleee ehãaa lɛ pɛ ehe.”

Te osusuɔ tɛŋŋ? Kɛ́ mɛi sumɔɔ ni amɛkpɛlɛ osusumɔi anɔ, ni amɛmaaa nɔ mi doo akɛ akɛ amɛsusumɔi atsu nii lɛ, te onuɔ he ohãa tɛŋŋ?

Suɔmɔ kɛ “efɔŋ etooo emli.”

Te osusuɔ tɛŋŋ? Nyɔŋmɔ sumɔɔ ni ekɛ mɛi ni etɔ̃ enɔ ni amɛtsake amɛtsui lɛ ahe ake amɛ. “Etaooo wɔhe tɔmɔi daa, ni ebɛɛɛ mɔ ewooo emli kɛyaaa naanɔ.” (Lala 103:9) Kɛ́ wɔtɔ̃ mɔ ko nɔ ni ekɛke wɔ lɛ, wɔhiɛ sɔɔ lɛ. No hewɔ lɛ, wɔ hu kɛ́ mɛi tɔ̃ wɔnɔ lɛ, esa akɛ wɔsumɔ waa akɛ wɔkɛbaake amɛ.​—Lala 86:5.

Suɔmɔ náaa “miishɛɛ yɛ nii ni ejaaa he.”

Te osusuɔ tɛŋŋ? Kɛ́ nɔ ko fɔŋ ba wɔnɔ lɛ, wɔsumɔŋ ni mɛi anya yɛ piŋmɔ ni wɔpiŋɔ lɛ hewɔ. No hewɔ lɛ, kɛ́ sane fɔŋ ba mɛi anɔ lɛ wɔnyaaa, kɛ́ ekolɛ amɛkɛ wɔ yeko jogbaŋŋ po.

Ja wɔsumɔ mɛi yɛ nɛkɛ gbɛi anɔ​—ekɔɔɔ he eko mɛi ni amɛji​—dani Nyɔŋmɔ baajɔɔ wɔ. Gbɛ kome ni wɔbaanyɛ wɔtsɔ nɔ wɔjie suɔmɔ nɛɛ kpo ji, ni wɔbaaye wɔbua mɛi ni ehia amɛ lɛ.