Obaanyɛ Owo Kristofonyo Ko Ni Ekpa Shiɛmɔyaa Lɛ Hewalɛ

Daa afi lɛ, Kristofoi ni ekpa shiɛmɔyaa lɛ ateŋ mɛi babaoo baa Kaimɔ lɛ. Amɛje wala he foidamɔ lɛ shishi, shi yɛ yiŋtoi komɛi ahewɔ lɛ, amɛgbɔjɔ amɛfoidamɔ lɛ mli; atsɔɔ yiŋtoi nɛɛ ekomɛi yɛ Kuu Osɛɛ Kɛba Yehowa Ŋɔɔ wolo lɛ mli. (Heb 12:1) Kɛ̃lɛ, mɛi ni ekpa shiɛmɔyaa lɛ ajara wa hã Yehowa, mɔ ni kɛ e-Bi lɛ lá lɛ hé amɛ lɛ lolo. (Bɔf 20:28; 1Pe 1:18, 19) Te wɔɔfee tɛŋŋ wɔye wɔbua amɛ ni amɛku amɛsɛɛ kɛba asafo lɛ mli lɛ?

Asafoŋ onukpai bɔɔ mɔdɛŋ amɛtaoɔ Kristofoi ni ekpa shiɛmɔyaa lɛ koni amɛye amɛbua amɛ, tamɔ bɔ ni tookwɛlɔ taoɔ toi ni edu gbɛ kɛjɛ tooku lɛ mli lɛ feɔ lɛ. (Luk 15:4-7) Enɛ tsɔɔ akɛ, Yehowa jɛɔ suɔmɔ mli esusuɔ wɔ he. (Yer 23:3, 4) Jeee asafoŋ onukpai lɛ pɛ esa akɛ amɛwo mɛi ni tamɔ nɛkɛ lɛ hewalɛ, moŋ lɛ wɔ fɛɛ wɔbaanyɛ wɔfee nakai. Mɔdɛŋ ni wɔbɔɔ kɛjieɔ mlihilɛ kɛ mɔhesusumɔ kpo lɛ saa Yehowa hiɛ, ni jɔɔmɔi babaoo baanyɛ ajɛ mli kɛba. (Abɛ 19:17; Bɔf 20:35) No hewɔ lɛ, kwɛmɔ mɛi ni obaanyɛ owo amɛ hewalɛ, ni ofee nakai amrɔ nɔŋŋ!

KWƐMƆ VIDIO NI JI, YE OBUA MƐI NI EKPA SHIƐMƆYAA LƐ, KONI NO SƐƐ LƐ OHÃ SANEBIMƆI NI NYIƐ SƐƐ NƐƐ AHETOO:

• Be ni Abbey na Odasefonyo ko ni elé lɛ lɛ, mɛni efee?

• Mɛni hewɔ kɛ́ wɔna mɔ ko ni ekpa shiɛmɔyaa ni wɔmiitao wɔye wɔbua lɛ lɛ, esa akɛ wɔyana asafoŋ onukpai lɛ dã lɛ?

• Mɛni Abbey fee kɛsaa ehe dani eyasara Laura nɔ ni ji shii enyɔ nɔ?

• Mɛɛ gbɛ nɔ Abbey to etsui shi, ejie suɔmɔ kpo, ni enijiaŋ ejeee wui be ni ebɔɔ mɔdɛŋ ni eye ebua Laura lɛ?

• Mɛni wɔbaanyɛ wɔkase kɛjɛ nɔkwɛmɔnɔ ni Yesu kɛhã yɛ Luka 15:8-10 lɛ mli?

• Be ni nyɛmimɛi srɔtoi lɛ bɔ mɔdɛŋ amɛye amɛbua Laura lɛ, mɛɛ jɔɔmɔi jɛ mli kɛba?