Ohiɛ Akakpa Mɛi ni Ekpa Shiɛmɔyaa kɛ Kpeeiyaa lɛ Anɔ
1. Mɛni hewɔ esa akɛ wɔwo mɛi ni ekpa shiɛmɔyaa kɛ kpeeiyaa lɛ hewalɛ lɛ?
1 Ani ole mɔ ko ni ekpa shiɛmɔyaa kɛ kpeeiyaa? Ekolɛ ekɛ asafo lɛ ekpa bɔɔ ni ekpalaŋ. Ekolɛ okɛ mɔ nɛɛ kpe beni otsuɔ shĩa kɛ shĩa shiɛmɔ nitsumɔ lɛ. Esa akɛ wɔha ehi wɔjwɛŋmɔ mli akɛ aŋkro nɛɛ kã he eji wɔnyɛmi Kristofonyo. Ehe miihia ni wɔjie suɔmɔ ni wɔyɔɔ kɛha lɛ lɛ kpo ni wɔye wɔbua lɛ ni eku esɛɛ kɛba asafo lɛ mli kɛ ‘wɔsusumai alɛlɔ kɛ nɔkwɛlɔ lɛ’ ŋɔɔ ekoŋŋ.—1 Pet. 2:25.
2. Mɛɛ gbɛ nɔ wɔbaanyɛ wɔtsɔ wɔwo mɔ ko ni ekpa shiɛmɔyaa kɛ kpeeiyaa lɛ hewalɛ?
2 Tsɔɔmɔ akɛ Osusuɔ Amɛhe: Wiemɔ kuku ni wɔkɛ mɔ ni ekpa shiɛmɔyaa kɛ kpeeiyaa lɛ aaawie yɛ tɛlifon nɔ loo saramɔ ni wɔɔsara lɛ lɛ baanyɛ eha ena akɛ wɔhiɛ ejeko enɔ. Mɛni wɔbaanyɛ wɔkɛɛ lɛ? Kɛɛmɔ kɛkɛ ni wɔɔkɛɛ lɛ akɛ wɔsusuɔ ehe lɛ baanyɛ awo lɛ hewalɛ. Ha okɛ lɛ sanegbaa lɛ afee nɔ ni ŋɔɔ ni tswaa mɔ emaa shi. (Fil. 4:8) Wɔbaanyɛ wɔwie sane ko ni wɔná he miishɛɛ waa yɛ kpee ko ni afee etsɛko lɛ mli. Wɔbaanyɛ wɔfɔ̃ lɛ nine hu kɛba asafoŋ kpee loo kpokpaa nɔ kpee ni abaafee lɛ shishi, ni wɔkɛɛ lɛ akɛ wɔbaamɔ gbɛ wɔha lɛ loo wɔbaato tsɔne he gbɛjianɔ wɔha lɛ.
3. Mɛni ha nyɛmi yoo ko bɔi shiɛmɔyaa kɛ kpeeiyaa ekoŋŋ?
3 Nyɛmi ko yana nyɛmi yoo ko ni ekpa shiɛmɔyaa kɛ kpeeiyaa nɔ ni fe afii 20 nɛ yɛ amɛshikpɔŋkuku lɛ mli. Eyɛ mli akɛ esumɔɔɔ ni akɛ lɛ feɔ Biblia mli nikasemɔ moŋ, shi nyɛmi yoo ni yana lɛ lɛ tee eŋɔɔ shii abɔ, ni ehaa lɛ woji tɛtrɛbii heei ni baa lɛ eko. Beni shiɛlɔ lɛ tee kpokpaa wulu nɔ kpee eba lɛ, eyagba nyɛmi yoo ni ekpa shiɛmɔyaa kɛ kpeeiyaa lɛ kpee lɛ mli saji otii lɛ ekomɛi, ni naagbee lɛ nyɛmi yoo lɛ bɔi shiɛmɔyaa kɛ kpeeiyaa ekoŋŋ.
4. Te esa akɛ wɔkɛ mɔ ko ni kɛ asafo lɛ ebɔi bɔɔ ekoŋŋ kɛtsɔ kpee baa nɔ lɛ aye aha tɛŋŋ?
4 Kɛ́ Mɔ ko Ku Esɛɛ Eba: Kɛ́ nyɛmi ko ni ekpa shiɛmɔyaa kɛ kpeeiyaa bɔi kpeei baa ekoŋŋ lɛ, te esa akɛ wɔkɛ lɛ aye aha tɛŋŋ? Ojogbaŋŋ, te Yesu kɛ ekaselɔi lɛ ye eha tɛŋŋ beni amɛkwa lɛ yɛ be kukuoo ko mli lɛ? Ekɛ hedɔɔ tsɛ amɛ akɛ ‘enyɛmimɛi’, ni eha amɛna akɛ eyɛ hekɛnɔfɔɔ yɛ amɛmli. Ekɛ nitsumɔ ko po ni he hiaa waa wo amɛdɛŋ. (Mat. 28:10, 18, 19) No sɛɛ etsɛɛɛ lɛ, amɛkɛ ekãa jaje sanekpakpa lɛ “ni amɛfɔ̃ɔɔ.”—Bɔf. 5:42.
5. Tsɔɔmɔ shihilɛi amli ni esa akɛ wɔwo onukpai lɛ atoi nɔ yɛ mɔ ko ni ekpa shiɛmɔyaa kɛ kpeeiyaa lɛ he.
5 Dani wɔɔkɛɛ mɔ ko ni ekpa shiɛmɔyaa kɛ kpeeiyaa akɛ wɔbaasumɔ ni wɔkɛ lɛ abɔi Biblia lɛ kasemɔ loo dani wɔbaafɔ̃ nyɛmi ko ni ekpa shiɛmɔyaa kɛ kpeeiyaa be babaoo nɛ lɛ nine ni efata wɔhe kɛya shiɛmɔ lɛ, esa akɛ wɔbi gbɛtsɔɔmɔ kɛjɛ onukpai lɛ adɛŋ. Kɛ́ wɔkɛ mɔ ko ni ekpa shiɛmɔyaa kɛ kpeeiyaa kpe yɛ wɔshikpɔŋkuku lɛ mli lɛ, esa akɛ wɔwo onukpai lɛ atoi nɔ ni amɛkɛ yelikɛbuamɔ ni sa aha.
6. Kɛ́ wɔye wɔbua mɛi ni ekpa shiɛmɔyaa kɛ kpeeiyaa lɛ, mɛɛ miishɛɛ wɔbaanyɛ wɔná?
6 Taakɛ Biblia lɛ tsɔɔ mli faŋŋ lɛ, mɛi ni daa foi lɛ kɛgbeɔ naa lɛ pɛ anine aaashɛ yiwalaheremɔ lɛ nɔ. (Mat. 24:13) No hewɔ lɛ, ha ohiɛ ahi mɛi ni amɛnane etɔ̃tɔ̃ loo amɛkpalaŋ lɛ anɔ. Kɛ́ wɔto wɔtsui shi kɛjie suɔmɔ ni Yehowa yɔɔ lɛ eko kpo, kɛtsɔ mɛi nɛɛ ahe miishɛɛ diɛŋtsɛ ni wɔɔná lɛ nɔ lɛ, wɔbaaná miishɛɛ beni amɛkɛ wɔ bafeɔ ekome ekoŋŋ yɛ jamɔ krɔŋŋ mli lɛ.—Luka 15:4-10.