HII SHI AKƐ KRISTOFONYO
Hii Shi Yɛ Yehowa Jeŋba He Mlai Lɛ Anaa
Yehowa Nyɔŋmɔ ji mɔ ni kɛ jeŋba he mlai hãa adesai. Akɛ nɔkwɛmɔnɔ lɛ, eto akɛ nuu kome kɛ yoo kome abote gbalashihilɛ mli, ni amɛhi shi daa. (Mat 19:4-6, 9) Eguɔ bɔlɛnamɔ jeŋba sha nifeemɔi fɛɛ. (1Ko 6:9, 10) Ekɛ shishitoo mlai ni kɔɔ atadewoo kɛ hesaamɔ he po hã ewebii lɛ, ni no hã esoro amɛ.—5Mo 22:5; 1Ti 2:9, 10.
Ŋmɛnɛ lɛ, mɛi babaoo kɛ Yehowa mlai tsuuu nii. (Ro 1:18-32) Amɛhãa nɔ ni mɛi babaoo susuɔ yɛ atadewoo, hesaamɔ, kɛ jeŋba he lɛ náa amɛnɔ hewalɛ. Mɛi babaoo kɛ amɛjeŋba gbonyo lɛ shiɔ amɛtsitsi, ni amɛwieɔ amɛshiɔ mɛi ni hiɔ shi yɛ shishitoo mla kroko naa lɛ.—1Pe 4:3, 4.
Akɛ Yehowa Odasefoi lɛ, esa akɛ wɔbɔ mɔdɛŋ wɔhi shi yɛ Nyɔŋmɔ jeŋba he mlai lɛ anaa. (Ro 12:9) Te wɔbaafee tɛŋŋ wɔfee nakai? Esa akɛ wɔtsɔ ŋaa gbɛ nɔ wɔhã mɛi ale nɔ ni Yehowa kpɛlɛɔ nɔ. Shi esa akɛ wɔ diɛŋtsɛ hu lɛ, wɔba wɔjeŋ jogbaŋŋ be fɛɛ be. Akɛ nɔkwɛmɔnɔ lɛ, kɛ́ wɔmiikpɛ wɔyiŋ yɛ atadei ni wɔbaawo kɛ bɔ ni wɔbaasaa wɔhe wɔhã he lɛ, wɔbaanyɛ wɔbi wɔhe akɛ: ‘Ani miyiŋkpɛɛ lɛ tsɔɔ akɛ miihi shi yɛ Yehowa jeŋba he mlai anaa aloo je lɛ nɔ lɛ naa? Ani mitadewoo kɛ mihesaamɔ hãa anaa mi akɛ Kristofonyo ni sheɔ Nyɔŋmɔ gbeyei?’ Ni kɛ́ wɔmiikpɛ wɔyiŋ yɛ sini ko ni wɔmiitao wɔkwɛ he lɛ, wɔbaanyɛ wɔbi wɔhe akɛ: ‘Ani Yehowa baakpɛlɛ sini nɛɛ nɔ? Namɔ jeŋba he mlai fĩɔ sɛɛ? Ani nibii ni mihalaa kɛjieɔ mihiɛtserɛ lɛ baanyɛ afite mijeŋba? (La 101:3) Ani ebaanyɛ etɔ̃tɔ̃ miweku lɛ kɛ mɛi krokomɛi anane?’—1Ko 10:31-33.
Mɛni hewɔ ehe miihia waa akɛ wɔbaahi shi yɛ Yehowa jeŋba he mlai lɛ anaa lɛ? Ejaakɛ etsɛŋ, Kristo Yesu baakpãtã jeŋmaji lɛ kɛ efɔŋfeelɔi fɛɛ ahiɛ. (Eze 9:4-7) Mɛi ni feɔ Nyɔŋmɔ suɔmɔnaa nii lɛ pɛ baashwɛ. (1Yo 2:15-17) Belɛ, nyɛhãa wɔbɔa mɔdɛŋ ni wɔhi shi yɛ Yehowa jeŋba he mlai lɛ anaa, koni mɛi ni naa wɔjeŋba kpakpa lɛ awo Nyɔŋmɔ hiɛ nyam.—1Pe 2:11, 12.
Mɛɛ gbɛ nɔ mitadewoo kɛ mihesaamɔ hãa anaa jeŋba he mlai ni mihiɔ shi yɛ naa?
KWƐMƆ VIDIO NI JI, OKƐ YEHOWA ABƆ NAANYO—NUU KOME, YOO KOME LƐ, KONI NO SƐƐ LƐ OHÃ SANEBIMƆI NI NYIƐ SƐƐ LƐ AHETOO:
Mɛni hewɔ nilee yɔɔ mli akɛ wɔbaahi shi yɛ Yehowa jeŋba he mlai lɛ anaa lɛ?
Mɛni hewɔ esa akɛ fɔlɔi abɔi amɛbii lɛ Yehowa jeŋba he mlai lɛ tsɔɔmɔ kɛjɛ amɛgbekɛbiiashi tɔ̃ɔ lɛ?
Te onukpai kɛ gbekɛbii fɛɛ baafee tɛŋŋ aye abua mɛi koni amɛná Nyɔŋmɔ mlihilɛ lɛ he sɛɛ lɛ?