HII SHI AKƐ KRISTOFONYO
Mɛɛ Be Manyɛ Masɔmɔ Akɛ Gbɛgbalɔi Awalɔ Ekoŋŋ?
Ezekiel ninaa ni kɔɔ sɔlemɔtsu lɛ he lɛ hãa wɔnaa akɛ, Yehowa webii lɛ baajɛ amɛsuɔmɔ mli amɛkɛ nibii ashã afɔle. Mɛɛ gbɛ nɔ wɔbaanyɛ wɔshã yijiemɔ afɔlei akɛ aŋkroaŋkroi?—Heb 13:15, 16.
Gbɛ kome ni hi waa ni wɔbaanyɛ wɔfee nakai ji, ni wɔkɛ wɔhe baawo gbɛgbalɔi awamɔ nitsumɔ lɛ mli. Yɛ afi 2018 sɔɔmɔ afi lɛ mli lɛ, nyɔji babaoo hiɛ Hɔɔ enumɔ loo Hɔgbaa enumɔ. Enɛ hi waa kɛhã mɛi ni kɛ amɛbe fɛɛ tsuɔ nii, ni otsii lɛ anaagbee titri ji bei ni amɛkɛ amɛhe woɔ shiɛmɔ nitsumɔ lɛ mli lɛ. Kɛfata he lɛ, shiɛlɔi baanyɛ ahã ŋmɛlɛtswai 30 loo 50 yɛ March kɛ April mli, ni amɛbaanyɛ amɛfee nakai hu yɛ nyɔji ni kpokpaa nɔkwɛlɔ lɛ basaraa amɛsafo lɛ mli.
Shi kɛ́ wɔshihilɛ eŋmɛɛɛ wɔ gbɛ ni wɔkɛ wɔhe awo gbɛgbalɔi awamɔ nitsumɔ lɛ mli hu? Wɔbaanyɛ wɔbɔ mɔdɛŋ wɔhã wɔshiɛmɔ nitsumɔ lɛ amɔ shi, ni wɔkɛ be babaoo atsu. Ekɔɔɔ he eko bɔ ni wɔshihilɛ ji lɛ, nyɛhãa suɔmɔ ni wɔyɔɔ kɛhã Yehowa lɛ atsirɛ wɔ ni wɔtsu bɔ ni wɔbaanyɛ yɛ afi 2018 sɔɔmɔ afi lɛ mli!—Hos 14:3.
Mɛɛ gbɛ nɔ manyɛ makase Sabina Hernández ekãa lɛ?
KWƐMƆ VIDIO NI JI, MINYƐƆ NII FƐƐ MIFEƆ YƐ YEHOWA DROMƆ NAA LƐ, KONI NO SƐƐ LƐ OHÃ SANEBIMƆI NI NYIƐ SƐƐ LƐ AHETOO:
Mɛni tsirɛ Sabina ni efee babaoo yɛ Yehowa sɔɔmɔ lɛ mli?
Mɛɛ gbɛ nɔ Sabina nɔkwɛmɔnɔ lɛ woɔ bo hewalɛ?
Yɛ afi 2018 sɔɔmɔ afi lɛ mli lɛ, mɛɛ nyɔɔŋ loo nyɔji ohala akɛ obaasɔmɔ akɛ gbɛgbalɔi awalɔ?