Wɔ-Bɔlɔ Lɛ Baanyɛ Ajɔɔ Bo Kɛya Naanɔ

Nyɔŋmɔ wo gbalɔ Abraham shi akɛ, eseshibii lɛ ateŋ mɔ kome baahã ajɔɔ “shikpɔŋ lɛ nɔ jeŋmaji fɛɛ.” (1 Mose 22:18) Namɔ baafee seshi nɛɛ?

Aaafee afii 2,000 ni eho nɛ lɛ, Nyɔŋmɔ hã Yesu, ni eji Abraham seshinyo lɛ, hewalɛ kɛfee naakpɛɛ nibii wuji. Nakai naakpɛɛ nii lɛ hã ana akɛ, Yesu nɔ Nyɔŋmɔ baatsɔ eye shi ni ewo Abraham akɛ ebaajɔɔ jeŋmaji lɛ nɔ.​—Galatiabii 3:14.

Naakpɛɛ nii ni Yesu fee lɛ hã mɛi na akɛ, lɛ ji mɔ ni Nyɔŋmɔ ehala akɛ ebaatsɔ enɔ ejɔɔ adesai, ni amɛhã ana gbɛ hu ni Nyɔŋmɔ baatsɔ nɔ ekɛ Yesu atsu nii kɛjɔɔ adesai kɛya naanɔ. Naa bɔ ni naakpɛɛ nii ni efee lɛ hãa anaa esui kpakpai lɛ ekomɛi.

Enuɔ he ehãa mɔ​—Yesu tsa helatsɛmɛi.

Gbi ko lɛ, kpitiyelɔ ko kpa Yesu fai ni etsa lɛ. Yesu ta ehe, ni ekɛɛ lɛ akɛ: “Miisumɔ!” Amrɔ lɛ, kpiti lɛ tã yɛ ehe.​—Marko 1:40-42.

Emli hi​—Yesu lɛ mɛi ni hɔmɔ yeɔ amɛ lɛ.

Yesu sumɔɔɔ ni hɔmɔ yeɔ mɛi. Etsɔ naakpɛɛ gbɛ nɔ ehã blodoi fioo kɛ loi bibii fioo fee pii, ni ekɛlɛ mɛi akpei abɔ, jeee shi kome pɛ. (Mateo 14:17-21; 15:32-38) Mɛi fɛɛ ni ye lɛ tɔrɔ, ni niyenii lɛ babaoo shwɛ.

Emusuŋ tsɔɔ lɛ​—Yesu tee gbohii ashi.

“[Yesu musuŋ] tsɔ lɛ,” ni etee yoo okulafo ko ni miiye awerɛho, ni bɛ mɔ ko ni baakwɛ lɛ lɛ binuu kome pɛ ni egbo lɛ shi.​—Luka 7:12-15.