Ná Hesai Pii Yɛ Shiɛmɔ Nitsumɔ Lɛ Mli​—Bɔɔ Mɔdɛŋ Ni Okɛ Mɔ Fɛɛ Mɔ Ni Yɔɔ Shikpɔŋkuku Lɛ Mli Lɛ Awie

NƆ HEWƆ NI EHE HIAA: Zakaria gba akɛ mɛi ni jɛ jeŋmaji lɛ anɔ wiemɔi lɛ fɛɛ amli lɛ baabo sane kpakpa lɛ toi. (Zak 8:23) Shi namɔ baatsɔɔ mɛi nɛɛ nii? (Ro 10:13-15) Eji hegbɛ ni wɔná kɛ sɔ̃ ni kã wɔnɔ akɛ wɔbaashiɛ sane kpakpa lɛ wɔhã wɔshikpɔŋkuku lɛ mli bii lɛ fɛɛ.​—od 84 kk. 10-11.

BƆ NI OBAAFEE LƐ OHÃ:

• Saamɔ ohe. Ani okɛ mɛi ni wieɔ wiemɔ kroko kpeɔ yɛ shikpɔŋkuku lɛ mli? Obaanyɛ okase shiɛmɔ wiemɔ kuku ko yɛ amɛwiemɔ lɛ mli yɛ JW Language lɛ nɔ. Ni kɛ́ ohiɛ tablɛt kɛ ehenɔi lɛ eko hu lɛ, obaanyɛ otsɔɔ amɛ bɔ ni amɛbaafee amɛná saji babaoo yɛ amɛwiemɔ lɛ mli yɛ jw.org lɛ nɔ

• Okɛ ohiɛ afɔ̃ shi. Kɛ́ ooshiɛ yɛ shĩa fɛɛ shĩa lɛ, bɔɔ mɔdɛŋ ni okɛ hegbɛ fɛɛ hegbɛ ni baaba lɛ aye mɛi ni miiho loo mɛi ni miimɛ yɛ tsɔji amli lɛ odase. Kɛ́ ootsu maŋ odaseyeli lɛ, hã ohiɛ ahi oti ni ma ohiɛ akɛ obaaye odase lɛ nɔ

• Hã emɔ shi. Yaa nɔ otao mɛi ni oyaninaaa amɛ yɛ shĩa be klɛŋklɛŋ ni otee jɛmɛ lɛ. Tswaa ofai shi akɛ okɛ mɔ ko kɛ̃ baawie yɛ shĩa fɛɛ shĩa. Obaanyɛ oya jɛmɛ be kroko yɛ gbi lɛ mli loo yɛ gbi kroko nɔ yɛ otsi lɛ mli. Ekolɛ onine baanyɛ ashɛ amɛteŋ mɛi komɛi anɔ kɛtsɔ woloŋmaa, tɛlifoŋ, loo gbɛjegbɛ he odaseyeli nɔ

• Yaa eŋɔɔ ekoŋŋ. Kɛ́ mɔ ko nya sane lɛ he lɛ, kuu osɛɛ oya eŋɔɔ oya nɔŋŋ. Kɛ́ mɔ lɛ wieɔ wiemɔ kroko lɛ, taomɔ mɔ ko ni nuɔ ewiemɔ lɛ koni eye ebua lɛ. Kã he oya mɔ lɛ ŋɔɔ kɛyashi shiɛlɔi ni wieɔ ewiemɔ lɛ kɛ lɛ baabɔi nikasemɔ.​—od 94 kk. 39-40

KWƐMƆ VIDIO NI JI, SHIƐMƆ YƐ “SHIKPƆŊ LƐ NƆ HEI NI YƆƆ SHƆŊŊSHƆŊŊ LƐ,” KONI NO SƐƐ LƐ OHÃ SANEBIMƆI NI NYIƐ SƐƐ LƐ AHETOO:

• 

  Mɛɛ gbɛjianɔ nyɛmimɛi lɛ to koni amɛnyɛ amɛyashiɛ amɛhã mɛi yɛ hei ni etse amɛhe banee lɛ? (1Ko 9:22, 23)

• 

  Mɛɛ naagbai komɛi ehe bahia ni amɛtsu he nii?

• 

  Mɛɛ jɔɔmɔi amɛná?

• Mɛni obaanyɛ ofee koni onine anyɛ ashɛ mɛi babaoo anɔ yɛ oshikpɔŋkuku lɛ mli?