HII SHI AKƐ KRISTOFONYO

**Okɛ Oyi Aná Wala Kɛya Naanɔ! Lɛ Atsu Nii Yɛ Shiɛmɔ Nitsumɔ Lɛ Mli**

Wɔmii eshɛ wɔhe waa akɛ wɔná broshuɔ hee kɛ wolo hee ni wɔbaatsɔ nɔ wɔkɛ mɛi akase Biblia lɛ! Wɔsɔlemɔ ji, Yehowa baajɔɔ mɔdɛŋ ni wɔbɔɔ koni wɔfee mɛi babaoo kaselɔi lɛ nɔ. (Mat 28:18-20; 1Ko 3:6-9) Te wɔkɛ dɛŋdadei hei nɛɛ baatsu nii wɔhã tɛŋŋ?

Akɛni Oyi Aná Wala Kɛya Naanɔ! wolo lɛ baahã wɔkɛ wɔ-Biblia mli nikaselɔi agba sane titri hewɔ lɛ, wɔbaatsɔɔ nii yɛ gbɛ hee nɔ; no hewɔ lɛ, obaanyɛ okɛ gbɛi ni nyiɛ sɛɛ nɛɛ atsu nii be ni oosaa ohe kɛhã nikasemɔ lɛ, kɛ agbɛnɛ hu, be ni oofee nikasemɔ lɛ.a

Nyɛkanea mli, ni nyɛsusua sanebimɔi lɛ ahe
Nyɛkanea ŋmalɛi ni aŋma yɛ he akɛ “kanemɔ” loo “nyɛkanea” lɛ, ni owa nikaselɔ lɛ ni ena bɔ ni amɛkɔɔ sane lɛ he
Jiemɔ vidioi lɛ, ni nyɛkɛ sanebimɔi ni fata he lɛ asusua he
Nyɛbɔa mɔdɛŋ nyɛgbea nikasemɔi lɛ eko fɛɛ eko naa yɛ shitamɔ kome mli

Kɛ́ otee shiɛmɔ lɛ, okɛ broshuɔ lɛ ahã klɛŋklɛŋ kɛkwɛ akɛ mɔ lɛ baanya sane lɛ he lo. (Kwɛmɔ akrabatsa ni ji, “Bɔ Ni Ooofee Okɛ Oyi Aná Wala Kɛya Naanɔ! Broshuɔ Lɛ Ahã Yɛ Klɛŋklɛŋ Sanegbaa Mli.”) Kɛ́ nyɛkase broshuɔ lɛ nyɛgbe naa, ni nikaselɔ lɛ miisumɔ ni nyɛtsa nɔ lɛ, no lɛ, hã lɛ wolo lɛ eko, ni okɛ lɛ aje shishi yɛ nikasemɔ 04 lɛ mli. Kɛ́ okɛ mɔ ko miikase woji ni wɔkɛ mɛi kaseɔ lɛ eko momo lɛ, no lɛ, okɛ Oyi Aná Wala Kɛya Naanɔ! wolo lɛ aye najiaŋ, ni okwɛ he ni nyɛbaanyɛ nyɛje shishi kɛjɛ.

Nuu lɛ kɛ eŋa lɛ nɔŋŋ etee nuu lɛ shia lɛ, ni amɛkɛ lɛ miikase “Oyi Aná Wala Kɛya Naanɔ!” wolo lɛ.

KWƐMƆ VIDIO NI JI, OKƐ BIBLIA MLI NIKASEMƆ JURƆ LƐ, KONI NO SƐƐ LƐ OHÃ SANEBIMƆI NI NYIƐ SƐƐ NƐƐ HETOO:

Mɛni nikaselɔi baakase yɛ wolo hee lɛ mli?
Mɛni hewɔ esa akɛ ojie vidio nɛɛ ohã nikaselɔi hei lɛ?
Mɛɛ otii esa akɛ fiofio lɛ, owo nikaselɔ lɛ hewalɛ ni ekɛmamɔ ehiɛ ni etsu amɛhe nii?—Kwɛmɔ akrabatsa ni ji, “Nɔ Ni Abaakase Kɛ Otii Kɛhã Fã Fɛɛ Fã” lɛ

a KADIMƆ: Eyɛ mli akɛ, kɛ́ nikaselɔ lɛ miisumɔ lɛ ebaanyɛ ekane loo ekwɛ saji ni yɔɔ “Ehe Saji Krokomɛi” lɛ shishi lɛ moŋ, shi kɛ́ oosaa ohe kɛhã nikasemɔ lɛ, kanemɔ saji lɛ loo kwɛmɔ vidioi lɛ eko fɛɛ eko. No baahã ole nɔ ni ekolɛ nikaselɔ lɛ baanya he waa, ní baawa lɛ hu. Vidioi lɛ kɛ saji lɛ ahe link yɛ ilɛtrɔnik nɔ lɛ mli.

Nɔ Ni Abaakase Kɛ Otii Kɛhã Fã Fɛɛ Fã
	NIKASEMƆI	NƆ NI ABAAKASE	OTII KƐHÃ NIKASELƆ LƐ
1	01-12	Abaawie bɔ ni Biblia lɛ baanyɛ awa nikaselɔ lɛ he, kɛ agbɛnɛ hu, bɔ ni ebaafee ele mɔ ŋɔɔ ni Biblia lɛ jɛ lɛ jogbaŋŋ	Wo nikaselɔ lɛ hewalɛ ni ekane Biblia lɛ, esaa ehe kɛhã enikasemɔ lɛ, ni ebɔi asafoŋ kpeeibaa
2	13-33	Abaawie nɔ ni Nyɔŋmɔ efee ehã wɔ, kɛ gbɛ ni kɛ́ wɔtsɔ nɔ wɔjá lɛ lɛ ebaaná wɔhe miishɛɛ lɛ he	Wo nikaselɔ lɛ hewalɛ ni egba mɛi anɔkwale lɛ he saji, ni ebatsɔ shiɛlɔ hu
3	34-47	Abaawie nɔ ni Nyɔŋmɔ sumɔɔ ni ejálɔi afee lɛ he	Wo nikaselɔ lɛ hewalɛ ni ejɔɔ ewala nɔ ehã Yehowa ni abaptisi lɛ
4	48-60	Abaawie bɔ ni wɔɔfee wɔhi Nyɔŋmɔ suɔmɔ lɛ mli lɛ he	Tsɔɔmɔ nikaselɔ lɛ ni ele bɔ ni ebaafee ele ekpakpa kɛ efɔŋ kɛ bɔ ni ebaafee etsi ebɛŋkɛ Nyɔŋmɔ waa