Otii Ni Baahã Wɔná Kpee Kɛhã Shiɛmɔyaa He Sɛɛ

Kpee kɛhã shiɛmɔyaa kɛ asafoŋ kpeei krokomɛi lɛ ji gbɛjianɔ ni Yehowa eto koni ekɛwa wɔ ni wɔkanya wɔhe koni wɔjie suɔmɔ kpo ni wɔtsu nitsumɔi kpakpai. (Heb 10:24, 25) Esa akɛ kpee nɛɛ ahe minitii enumɔ kɛmiimɔ kpawo​—shiɛlɔi lɛ jaa, shikpɔŋkuku lɛ jaa, kɛ sɔlemɔ fata he. (Shi kɛ́ abaafee be ni akpa asafoŋ kpee sɛɛ lɛ, no lɛ esa akɛ efee kuku fe nakai.) Esa akɛ mɔ ni baakwɛ kpee lɛ nɔ lɛ atsɔ hiɛ esusu nibii ni nyɛmimɛi lɛ baanyɛ amɛkɛtsu nii nakai gbi lɛ ahe. Akɛ nɔkwɛmɔnɔ lɛ, shiɛlɔi ni yaa shiɛmɔ Hɔɔ lɛ ateŋ mɛi pii eyaaa shiɛmɔ yɛ otsi lɛ mli, no hewɔ lɛ, ekolɛ ebaafee nɔ ni hi akɛ abaasusu nɔ ni abaanyɛ awie yɛ shiɛmɔ mli lɛ he kɛkɛ. Mɛɛ saji krokomɛi ni sa abaanyɛ asusu he?

• Otii kɛhã sanegbaa ni yɔɔ Wɔshiɛmɔ Kɛ Wɔshihilɛ Akɛ Kristofoi​—Kpee Nifeemɔ Wolo lɛ mli lɛ

• Bɔ ni abaafee akɛ sane ko ni eba loo adafitswaa ko aje sanegbaa shishi

• Bɔ ni abaafee ahã mɔ ko ni ewie nɔ ko ni tsɔɔ akɛ esumɔɔɔ ni eboɔ sane lɛ toi lɛ hetoo

• Bɔ ni abaafee ashiɛ ahã mɔ ko ni kɛɛ Nyɔŋmɔ bɛ, mɔ ko ni heɔ sutsakemɔ tsɔɔmɔ lɛ eyeɔ, mɔ ko ni wieɔ wiemɔ kroko, loo mɔ ko ni yɔɔ jamɔ ko ni nyɛshikpɔŋkuku lɛ mli bii lɛ fioo pɛ le he sane lɛ mli

• Bɔ ni abaafee akɛ jw.org wɛbsaiti lɛ, JW Library^® app lɛ, loo Biblia lɛ mli nɔ ko atsu nii

• Bɔ ni abaafee akɛ Nitsɔɔmɔ Dɛŋdadei Titrii lɛ eko atsu nii

• Bɔ ni abaafee atsu shiɛmɔ nitsumɔ lɛ fã pɔtɛɛ ko, tamɔ tɛlifoŋ nɔ odaseyeli, lɛtaŋmaa, maŋ odaseyeli, sɛɛkuukɛsaramɔ, loo Biblia mli nikasemɔ

• Bɔ ni wɔɔfee wɔfee shweshweeshwe, wɔtsake wɔhe wɔwo mɛi ashihilɛ mli, wɔba wɔjeŋ jogbaŋŋ yɛ shiɛmɔ mli, wɔná mɛi ahe jwɛŋmɔ kpakpa, loo nɔ ko ni tamɔ nakai

• Okɛ Ojwɛŋmɔ Ama Nikanemɔ Kɛ Nitsɔɔmɔ Nɔ broshuɔ lɛ mli nikasemɔ loo vidio ko

• Bɔ ni wɔɔfee wɔwo mɔ ni wɔkɛnyiɛ shiɛmɔ nɔ lɛ hewalɛ ni wɔye wɔbua lɛ

• Ŋmalɛ ko ni kɔɔ shiɛmɔ he, loo shiɛmɔ he niiashikpamɔ ko ni woɔ mɔ hewalɛ