Mɔ Fɛɛ Mɔ Miisumɔ Ni Nibii Ahi Ahã Lɛ Wɔsɛɛ
Mɛɛ shihilɛ osumɔɔ ni oná wɔsɛɛ? Ŋwanejee ko bɛ he akɛ, oosumɔ ni wɔsɛɛ lɛ, bo kɛ oweku lɛ aná miishɛɛ, gbɔmɔtsoŋ hewalɛ kpakpa, toiŋjɔlɛ, kɛ shika, ni nakai mɛi pii shweɔ.
Shi mɛi pii heee amɛyeee akɛ nibii baahi ahã amɛ wɔsɛɛ. Nibii tamɔ COVID-19 tsɛŋemɔ hela lɛ eba trukaa, ni etsake mɛi ashihilɛ kwraa, ehã mɛi miiye ohia, ni egbe mɛi pii po. Enɛ hewɔ lɛ, amɛnuɔ he akɛ nibii ehiŋ hãŋ amɛ wɔsɛɛ.
Akɛni mɔ ko mɔ ko leee nɔ ni baaba wɔ́ hewɔ lɛ, mɛi pii miitao nɔ ni baawa amɛ koni nibii ahi ahã amɛ wɔsɛɛ. Mɛi komɛi heɔ nibii ni anaaa, tamɔ shade kpakpa loo shɛɛ mli sane amɛyeɔ. Mɛi pii kɛ amɛjwɛŋmɔ maa skulyaa kɛ ninámɔ nɔ, ejaakɛ amɛsusuɔ akɛ nomɛi baahã nibii ahi ahã amɛ wɔsɛɛ. Mɛi komɛi hu susuɔ akɛ kɛ́ amɛba amɛjeŋ jogbaŋŋ lɛ, no baahã nibii ahi ahã amɛ.
Ani nibii ni wɔwie he nɛɛ ateŋ eko baanyɛ ahã oshihilɛ ahi wɔsɛɛ? Sanebimɔi ni nyiɛ sɛɛ nɛɛ baawa bo ni ona hetoo lɛ:
Mɛni kwraa kudɔɔ oshihilɛ?
Ani skulyaa kɛ shika baanyɛ ahã nibii ahi ahã bo?
Kɛ́ oba ojeŋ jogbaŋŋ lɛ, ani nibii baahi ahã bo wɔsɛɛ?
Nɛgbɛ obaanyɛ oná ŋaawoi kpakpai ni baahã nibii ahi ahã bo wɔsɛɛ lɛ yɛ?
Buu-Mɔɔ nɛɛ baanyɛ awa bo ni ona hetoi lɛ.