“Bianɛ Lɛ, Misumɔɔ Shiɛmɔ Nitsumɔ Lɛ Diɛŋtsɛ!”

MIMIISHƐƐ FƐƐ TÃ

Dɔlɛ sane ji akɛ, be ni miye aaafee afii 13 lɛ, suɔmɔ ni miyɔɔ kɛhã Yehowa lɛ he bɔi jɔɔ. Minu he akɛ mɛi ni mikɛyaa skul lɛ nyɛɔ amɛfeɔ nɔ fɛɛ nɔ ni amɛsumɔɔ, ni mishwe akɛ mi hu mafee nakai. Miyasusu akɛ mifɔlɔi yɛ kpɛŋŋ tsɔ, ni akɛ, gbɛtsɔɔmɔi ni akɛhãa wɔ yɛ asafo lɛ mli lɛ anɔyeli wa. Anɔkwa, Yehowa sɔɔmɔ batsɔ jatsu kɛhã mi. Mile akɛ Yehowa yɛ moŋ, shi minaaa lɛ akɛ mi-Naanyo kpaakpa.

Mikpaaa shiɛmɔ yaa kwraa moŋ, shi mitsuuu kɛ mitsui muu fɛɛ. Mitsɔɔɔ hiɛ misaaa mihe dani miyaa shiɛmɔ. No hewɔ lɛ, ewa kɛhã mi akɛ maje sanegbaa shishi ni matsa nɔ. Enɛ hewɔ lɛ, minyɛɛɛ mafee sɛɛkuukɛsaramɔi, ni mináaa Biblia mli nikaselɔi hu, ni enɛ hã shiɛmɔ yaa je mihiɛ kwraa. Minu he akɛ shiɛmɔ nitsumɔ lɛ eŋɔɔɔ kwraa. No hewɔ lɛ, mibiɔ mihe akɛ, ‘Te feɔ tɛŋŋ ni mɛi nyɛɔ amɛyaa shiɛmɔ otsi fɛɛ otsi kɛ nyɔɔŋ fɛɛ nyɔɔŋ yɛ bɔ ni eŋɔɔɔ nɛɛ fɛɛ sɛɛ?’

Be ni miye afii 17 lɛ, shwelɛ ni miyɔɔ akɛ mifee nɔ ni mi diɛŋtsɛ misumɔɔ lɛ mli bawa waa. No hewɔ lɛ, mito minibii ni mishi shĩa, ni mifã miyahi Australia. Be ni eba lɛ nakai lɛ, edɔ mifɔlɔi waa, ni amɛye amɛtsui. Shi amɛhe amɛye akɛ maya nɔ masɔmɔ Yehowa.

Be ni miyahi Australia lɛ, ekãa ni mikɛsɔmɔɔ Yehowa lɛ ba shi kwraa fe tsutsu lɛ po. Mibɔi asafoŋ kpeei amli folɔmɔ. Mikɛ mihe yabɔ oblahii kɛ oblayei komɛi yɛ asafo lɛ mli ni baa asafoŋ kpee ni enɔ jetsɛremɔ nɔŋŋ lɛ, amɛyaa disko amɛyajoɔ ni amɛnuɔ dãa lɛ ahe. Manyɛ makɛɛ akɛ nakai beiaŋ lɛ, minane kome ma anɔkwale lɛ mli, ni ekome ma je lɛ mli. Ni kɛ̃lɛ, anɔkwale lɛ jio, je lɛ jio, mibɛ eko eko he miishɛɛ.

MIKASE NƆ KO NI HE HIAA WAA YƐ MƆ KO DƐŊ NI LƐ DIƐŊTSƐ PO ELEEE

Be ni miyahi Australia lɛ sɛɛ aaafee afii enyɔ lɛ, mikɛ nyɛmi yoo ko shãra be kukuoo ko, ni ehã misusu bɔ ni mihiɔ shi mihãa lɛ he waa ni lɛ diɛŋtsɛ po eleee. No mli lɛ, mikɛ nyɛmimɛi yei oshijafoi ejwɛ ni yɔɔ shĩa kome mli, ni wɔfɔ̃ kpokpaa nɔkwɛlɔ lɛ kɛ eŋa nine ni amɛbahi wɔshĩa lɛ otsi. Atsɛɔ kpokpaa nɔkwɛlɔ lɛ ŋa lɛ Tamara. Be ni Tamara wu miitsu asafo lɛ saji ahe nii lɛ, Tamara kɛ wɔ gba sane ni wɔŋmɔ ni wɔná miishɛɛ. Minya enɛ he waa. Tamara baa ehe shi, ni ekɛ sanegbaa ŋɔɔ. Miyasusuuu kwraa akɛ mɔ ko ni hiɛ dɔɔ mumɔŋ nibii ahe nɛkɛ lɛ he baanyɛ afee miishɛɛ nakai.

Tamara yɛ ekãa waa, ni esumɔɔ anɔkwale lɛ kɛ shiɛmɔ nitsumɔ lɛ. Ni kɛ́ okɛ lɛ bɔ lɛ, ewaaa akɛ bo hu obaafee nakai. Esɔmɔɔ Yehowa kɛ etsui muu fɛɛ, ni enɛ hãa enáa miishɛɛ. Shi mi lɛ, misɔmɔɔɔ lɛ kɛ mitsui muu fɛɛ, ni mináaa miishɛɛ. Bɔ ni Tamara feɔ enii ehãa lɛ kɛ miishɛɛ ni eyɔɔ lɛ, ná minɔ hewalɛ waa. Ehã misusu sane ni he hiaa waa ni Ŋmalɛ lɛ wieɔ lɛ he, akɛ Yehowa miisumɔ ni ‘wɔsɔmɔ lɛ kɛ miishɛɛ’ kɛ “nyamɔ lala.”​—Lala 100:2.

BƆ NI FEE NI MIBASUMƆ SHIƐMƆ NITSUMƆ LƐ EKOŊŊ

Mishwe akɛ maná miishɛɛ tamɔ Tamara. Shi enɛ bi ni mifee tsakemɔi wuji komɛi yɛ mishihilɛ mli. Tsakemɔi lɛ fɛɛ baaa amrɔ nɔŋŋ. Shi mibɔi he nitsumɔ fiofio, ni ehe mi be saŋŋ. Nɔ ni mikɛje shishi ji, daa gbi kɛ́ maya shiɛmɔ lɛ, misaa mihe dani miyaa. Ni yɛ be kɛ beiaŋ lɛ, misɔmɔɔ akɛ gbɛgbalɔi awalɔ. Enɛ ye ebua mi ni misheee gbeyei akɛ mashiɛ. Mikɛ Biblia lɛ bɔi nitsumɔ waa yɛ shiɛmɔ nitsumɔ lɛ mli, ni enɛ hã shiɛmɔ baŋɔɔ minaa waa. Eyeee be ko ni mibɔi sɔɔmɔ akɛ gbɛgbalɔi awalɔ daa nyɔɔŋ nɔ.

Mikɛ nyɛmimɛi ni ye mi onukpa, mitipɛŋfoi, kɛ mɛi ni miye amɛ onukpa ni miibɔ mɔdɛŋ yɛ asafo lɛ mli ni miisɔmɔ Yehowa kɛ miishɛɛ lɛ bɔi bɔɔ. Amɛnɔkwɛmɔnɔ kpakpa lɛ ye ebua mi ni mihã Yehowa sɔɔmɔ lɛ he hia mi fe nibii krokomɛi fɛɛ yɛ shihilɛ mli, ni mibɔi Biblia lɛ hu kanemɔ daa gbi. Mibanya shiɛmɔ nitsumɔ lɛ he waa fe tsutsu lɛ po, ni sɛɛ mli lɛ, mibɔi sɔɔmɔ akɛ daa gbɛgbalɔ. Be ko ni eho lɛ, mibɛ miishɛɛ yɛ asafo lɛ mli. Shi agbɛnɛ lɛ, mibaná miishɛɛ, ni mitsui nyɔ mimli yɛ asafo lɛ mli.

MIBOTE GBALASHIHILƐ MLI

Afi sɛɛ lɛ, mikɛ nyɛmi nuu ko ni mli hi, ni sumɔɔ Yehowa kɛ shiɛmɔ nitsumɔ lɛ fɛɛ waa lɛ kpe. Atsɛɔ lɛ Alex. No mli lɛ, eesɔmɔ akɛ asafoŋ sɔɔlɔ, ni etsu gbɛgbamɔ nitsumɔ lɛ afii ekpaa sɔŋŋ. Kɛfata he lɛ, ekɛ nyɔji komɛi esɔmɔ yɛ he ni hiamɔ lɛ da yɛ, yɛ Malawi. Be ni eyɔɔ Malawi lɛ, ekɛ maŋsɛɛ sɔɔlɔi komɛi shãra, ni amɛná enɔ hewalɛ waa. Amɛwo lɛ hewalɛ ni eya nɔ ehã Yehowa sɔɔmɔ lɛ he ahia lɛ waa yɛ shihilɛ mli.

Yɛ afi 2003 lɛ, Alex kɛ mi bote gbalashihilɛ mli, ni kɛjɛ nakai beiaŋ kɛbashi ŋmɛnɛ lɛ, wɔtsu be fɛɛ sɔɔmɔ nitsumɔ lɛ. Wɔkase nibii kpakpai pii, ni Yehowa ejɔɔ wɔ waa yɛ gbɛi srɔtoi anɔ.

YEHOWA JƆƆ WƆ BABAOO

Yɛ afi 2009 lɛ, ahã wɔyasɔmɔ akɛ maŋsɛɛ sɔɔlɔi yɛ Timor-Leste, ni ji maŋ bibioo ko ni yɔɔ Indonesia gɔji lɛ anɔ lɛ. Wɔnaa kpɛ wɔhe, wɔná miishɛɛ waa, ni wɔtsui hu fã. Nyɔji enumɔ sɛɛ lɛ, wɔfã gbɛ kɛtee maŋ lɛ maŋtiase ni ji Dili lɛ.

Biɛ shihilɛ tamɔɔɔ he ni wɔjɛ lɛ. Esoro bɔ ni amɛhiɔ shi amɛhãa, wiemɔ ni amɛwieɔ, niyenii ni amɛyeɔ, kɛ bɔ ni shihilɛ yɔɔ yɛ biɛ. Ni ehe bahia ni wɔkase amɛ. Bei pii kɛ́ wɔtee shiɛmɔ lɛ, wɔnaa mɛi ni miiye ohia, mɛi ni etee skul fioo pɛ loo amɛyako eko kwraa, kɛ mɛi ni aawa amɛ yi. Wɔnaa mɛi pii hu ni ta ni awu yɛ biɛ kɛ awui ni ayeɔ yɛ biɛ lɛ hewɔ lɛ, amɛje kpa loo amɛshihilɛ efee basaa.a

Shiɛmɔ ŋɔɔ waa yɛ biɛ. Akɛ nɔkwɛmɔnɔ lɛ, be ko lɛ mikɛ oblayoo ko ni eye afii 13 ni atsɛɔ lɛ Maria lɛ kpe.b Be ni mina lɛ lɛ, enii fee mi mɔbɔ waa, ejaakɛ no mli lɛ, emami egbo afii fioo komɛi ni eho, ni eyɛ mli aahu dani enaa epapa. Maria leee nɔ ni ebaafee yɛ shihilɛ mli, tamɔ bɔ ni eji yɛ etipɛŋfoi pii agbɛfaŋ lɛ. Mikaiɔ akɛ gbi ko be ni eegba mi bɔ ni enuɔ he ehãa lɛ, efó aahu. Shi minuuu nɔ ni ewieɔ lɛ shishi, ejaakɛ no mli lɛ, minuuu amɛwiemɔ lɛ jogbaŋŋ. Misɔle mibi Yehowa ni ewa mi ni mawo lɛ hewalɛ, ni no sɛɛ lɛ, mikane ŋmalɛi komɛi ni woɔ mɔ hewalɛ mihã lɛ. Afii fioo komɛi asɛɛ lɛ, mina akɛ nibii ni Maria ekase lɛ etsake eshihilɛ, ni eyɛ miishɛɛ waa. Bianɛ lɛ, abaptisi lɛ, ni lɛ hu ekɛ mɛi miikase Biblia lɛ. Ŋmɛnɛ lɛ, Maria ebaná weku hee, ni ji Yehowa webii ni yɔɔ jeŋ fɛɛ lɛ, ni enaa akɛ amɛsumɔɔ lɛ waa.

Yehowa miijɔɔ shiɛmɔ nitsumɔ lɛ nɔ waa yɛ Timor-Leste. Eyɛ mli akɛ afii nyɔŋma ni eho nɛɛ nɔŋŋ mli abaptisi shiɛlɔi ni yɔɔ biɛ lɛ ateŋ mɛi pii moŋ, shi amɛteŋ mɛi babaoo miisɔmɔ akɛ gbɛgbalɔi, asafoŋ sɔɔlɔi, loo asafoŋ onukpai. Amɛteŋ mɛi komɛi hu miitsu nii yɛ wiemɔ shishitsɔɔmɔ ɔfis ni yɔɔ biɛ lɛ, ni amɛtsɔɔ asafo lɛ nibii ashishi kɛyaa amɛmaŋ wiemɔi lɛ amli. Kɛ́ minu ni amɛmiilá yɛ asafoŋ kpeei ashishi, mina bɔ ni amɛhiɛ efee ŋmɔlɔŋmɔlɔ, kɛ bɔ ni amɛtee amɛhiɛ yɛ asafo lɛ mli lɛ, ehãa mináa miishɛɛ waa.

MINÁKO MIISHƐƐ NI TAMƆ NƐKƐ PƐŊ

Esoro Timor-Leste shihilɛ kwraa yɛ Australia nɔ he, shi miná miishɛɛ waa diɛŋtsɛ. Bei komɛi lɛ, wɔkwɔɔ tsɔji bibii ni mɛi eyi mli obɔ, ni ewo loo gbiŋ kɛ ameo kɛ shitɔ kɛ amɛhenɔi lɛ. Ni bei komɛi hu lɛ, hei ni wɔkɛ mɛi yakaseɔ nii yɛ lɛ edaaa, ni jɛmɛ dɔɔ waa, ni asɛmɛntiko shikpɔŋ lɛ hu, ni obaana ni wuɔi hiɛ foi kɛmiiya kɛmiiba yɛ jɛmɛ. Shi yɛ enɛ fɛɛ sɛɛ lɛ, jɛmɛ shihilɛ ŋɔɔ minaa waa!

Eŋɔɔ minaa waa akɛ mifɔlɔi tsɔɔ mi Yehowa he nii ni amɛye amɛbua mi be ni misɔmɔɔɔ Yehowa jogbaŋŋ lɛ po. Ŋmalɛ ni yɔɔ Abɛi 22:6 lɛ eba mli yɛ migbɛfaŋ. Mipapa kɛ mimami fɛɛ sumɔɔ mi kɛ Alex sane waa, ni eŋɔɔ amɛnaa akɛ Yehowa kɛ wɔ miitsu nii. Kɛjɛ afi 2016 lɛ, ahã wɔmiisɔmɔ akɛ kpokpaa nɔkwɛlɔ kɛ eŋa yɛ Australasia nitsumɔhe nine lɛ shikpɔŋkuku lɛ mli.

Kɛ́ mikai akɛ be ko ni eho lɛ, minyaaa shiɛmɔ nitsumɔ lɛ he kwraa lɛ, efeɔ mi naakpɛɛ waa! Bianɛ lɛ, misumɔɔ shiɛmɔ nitsumɔ lɛ diɛŋtsɛ! Mina akɛ, ekɔɔɔ he eko nɔ ni baaba yɛ wɔshihilɛ mli lɛ, kɛ́ wɔsɔmɔ Nyɔŋmɔ kɛ wɔtsui muu fɛɛ lɛ, no ji nɔ ni baahã wɔná miishɛɛ diɛŋtsɛ. Mi kɛ Alex bote gbalashihilɛ mli nɛɛ, afii 18 nɛ, ni anɔkwa, miná miishɛɛ waa akɛ wɔfee ekome kɛmiisɔmɔ Yehowa. Bianɛ lɛ, mibana akɛ nɔ ni lalatsɛ David kɛɛ Yehowa lɛ ji anɔkwale. Ekɛɛ lɛ akɛ: “Mɛi fɛɛ ni baa bo abo lɛ baanya; amɛbaanya kɛ miishɛɛ be fɛɛ be. . . . Ni mɛi ni sumɔɔ ogbɛ́i lɛ baanya yɛ omli.”​—Lala 5:11.