Bɔ Ni Obaafee Osaa Okɛ Yehowa Teŋ Ekoŋŋ

DAA afi lɛ, aheɔ mɛi babaoo kɛbaa Yehowa asafo lɛ mli ekoŋŋ. ‘Miishɛɛ babaoo baa ŋwɛi’ yɛ amɛteŋ mɔ fɛɛ mɔ hewɔ. (Luka 15:7, 10) Kɛ́ ahe bo kɛba asafo lɛ mli ekoŋŋ lɛ, ná nɔmimaa akɛ, eŋɔɔ Yesu, ŋwɛibɔfoi lɛ, kɛ Yehowa naa waa akɛ oku osɛɛ kɛba anɔkwale lɛ mli. Shi be ni obɔɔ mɔdɛŋ koni osaa okɛ Yehowa teŋ ekoŋŋ lɛ, ekolɛ okɛ naagbai komɛi baakpe. Mɛni ji naagbai nɛɛ ekomɛi? Ni te obaafee tɛŋŋ otsu amɛhe nii?

NAAGBAI NI EKOLƐ OKƐBAAKPE

Mɛi pii yɛ ni be ni ahe amɛ kɛba asafo lɛ mli lɛ sɛɛ po lɛ, amɛhenilee yaa nɔ ebuɔ amɛ fɔ. Ekolɛ onuɔ he tamɔ bɔ ni Maŋtsɛ David nu he lɛ. Be ni akɛ ehe eshai lɛ eke lɛ lɛ sɛɛ po lɛ, ewie akɛ: “Mitɔmɔi lɛ fa babaoo.” (Lala 40:12; 65:3) Mɛi komɛi yɛ ni be ni ahe amɛ lɛ sɛɛ afii pii po lɛ, amɛnuɔ he akɛ Yehowa kɛ amɛhe eshai lɛ ekeko amɛ, ni no hãa amɛhaoɔ waa. Naa nɔ ni nyɛmi yoo ko ni atsɛɔ lɛ Isabelle, ni ashwie lɛ ni eyaye fe afii 20 dani eku esɛɛ eba lɛ wie.a Ewie akɛ: “No mli lɛ, ewa kɛhã mi waa akɛ mahe maye akɛ Yehowa kɛ mihe eshai lɛ eke mi.” Kɛ́ onu he akɛ Yehowa kɛ ohe eshai lɛ ekeko bo lɛ, no baanyɛ ahã okɛ lɛ teŋ wekukpaa lɛ mli agbɔjɔ ekoŋŋ. (Abɛi 24:10) Kaahã eba lɛ nakai.

Mɛi komɛi hu yɛ ni amɛnuɔ he akɛ ekolɛ amɛnyɛŋ amɛtsu nibii fɛɛ ni esa akɛ amɛtsu koni amɛ kɛ Yehowa teŋ wekukpaa lɛ mli awa lɛ ahe nii. Be ni ahe nyɛmi nuu ko ni atsɛɔ lɛ Antoine lɛ kɛba asafo lɛ mli ekoŋŋ lɛ, ewie akɛ, “Mina akɛ mihiɛ ekpa nibii pii ni mikase loo mifee be ni miji Yehowa Odasefonyo lɛ anɔ.” Kɛ́ mɔ ko nu he nɛkɛ lɛ, ebaanyɛ ewa kɛhã lɛ akɛ ekɛ enyɛmɔ fɛɛ baasɔmɔ Yehowa.

Akɛ nɔkwɛmɔnɔ lɛ, kɛ́ kɔɔyɔɔ ko ni naa wa waa fite mɔ ko shĩa lɛ, kɛ́ mɔ lɛ jwɛŋ nibii sɔŋŋ ni esa akɛ efee dani eshĩa lɛ abatsɔ tamɔ bɔ ni eji tsutsu lɛ he lɛ, enijiaŋ baaje wui. Nakai nɔŋŋ kɛ́ oyafee esha ko ni yɔɔ hiɛdɔɔ ni no fite okɛ Yehowa teŋ lɛ, kɛ́ ojwɛŋ nibii sɔŋŋ ni esa akɛ ofee koni okɛ Yehowa teŋ wekukpaa lɛ mli awa ekoŋŋ lɛ he lɛ, ekolɛ onijiaŋ baaje wui. Shi Yehowa kɛ onyɛmimɛi lɛ baaye amɛbua bo.

Yehowa kɛɛ: “Nyɛbaa ni wɔsaa wɔteŋ.” (Yes. 1:18) Omia ohiɛ ofee nibii pii kɛsaa okɛ Yehowa teŋ bianɛ. Nɔ ni ofee nɛɛ ehã Yehowa ená ohe miishɛɛ waa. Ani ole nɔ hewɔ? Ejaakɛ ohã ená nɔ ko kpakpa ni ebaanyɛ ekɛɛ Satan mɔ ni wieɔ eshiɔ lɛ lɛ.—Abɛi 27:11.

Osɛɛ ni oku kɛba Yehowa ŋɔɔ lɛ tsɔɔ akɛ obɛŋkɛ lɛ, ni lɛ hu ewo shi akɛ ebaabɛŋkɛ bo. (Yak. 4:8) Amrɔ nɛɛ, nyɛmimɛi lɛ ena akɛ oku osɛɛ kɛba asafo lɛ mli, ni enɛ hi waa. Shi nibii krokomɛi yɛ ni esa akɛ ofee. Esa akɛ oya nɔ ofee nibii ni baahã osumɔ o-Tsɛ Yehowa ni eji onaanyo lɛ waa. Te obaafee tɛŋŋ ofee enɛ?

OKƐ OTII NI OBAANYƐ OSHƐ HE AMAMƆ OHIƐ

Okɛ otii ni obaanyɛ oshɛ he amamɔ ohiɛ. Ŋwanejee ko bɛ he akɛ, ohiɛ kpako nibii ni okase yɛ Yehowa he kɛ shi ni ewo akɛ paradeiso baaba lɛ nɔ. Ni tsɔɔ akɛ ofaneshi lɛ fiteko. Amrɔ nɛɛ, nɔ ni shwɛɔ ji, ni obaama otsũ lɛ oma nɔ ekoŋŋ. No ji, ni obaafɔ shiɛmɔ yaa, oya asafoŋ kpeei daa, okɛ nyɛmimɛi lɛ abɔ, ni ofee nibii krokomɛi ni tamɔ nakai. Naa otii komɛi ni baaye abua bo ni otswa ohe oma shi.

Fɔɔ sɔlemɔ. Yehowa le akɛ, bɔ ni onuɔ he akɛ ekɛ ohe eshai lɛ ekeko bo lɛ baanyɛ ahã ewa kɛhã bo akɛ obaasɔle. (Rom. 8:26) Shi fɛɛ sɛɛ lɛ, ‘hiɛmɔ sɔlemɔ mli daa,’ ni okɛɛ Yehowa akɛ ootao otsɔ enaanyo ekoŋŋ. (Rom. 12:12) Nyɛmi nuu ko ni atsɛɔ lɛ Andrej lɛ wie akɛ: “No mli lɛ, minuɔ he akɛ mihã Yehowa nine enyɛ shi waa. Shi be fɛɛ be ni masɔle lɛ, mihe jɔɔ mi, ni nakai susumɔ lɛ haooo mi tsɔ.” Kɛ́ oleee nɔ ni obaawie yɛ osɔlemɔi lɛ amli lɛ, kanemɔ sɔlemɔ ni Maŋtsɛ David sɔle be ni etsake etsui lɛ ni yɔɔ Lala 51 kɛ Lala 65 lɛ.

Kasemɔ Biblia lɛ daa. Kɛ́ ofee nakai lɛ ohemɔkɛyeli lɛ mli baawa, ni obaasumɔ Yehowa waa. (Lala 19:7-11) Nyɛmi nuu ko ni atsɛɔ lɛ Felipe lɛ wie akɛ: “No mli lɛ, mikaneee Biblia lɛ daa, ni mikaseee nii ni no hã miyafee nɔ ko ni Yehowa sumɔɔɔ lɛ. No hewɔ lɛ, mitswa mifai shi akɛ makase nii daa koni ekaba lɛ nakai dɔŋŋ.” Bo hu obaanyɛ ofee nakai. Kɛ́ oleee saji ni obaanyɛ okase lɛ, obaanyɛ obi onaanyo ko ni bɔɔ mɔdɛŋ waa yɛ Yehowa sɔɔmɔ lɛ mli lɛ ŋaawoo.

Okɛ onyɛmimɛi Kristofoi lɛ abɔ naanyo. Mɛi komɛi ni ahe amɛ kɛba asafo lɛ mli ekoŋŋ lɛ nuɔ he akɛ nyɛmimɛi lɛ taooo amɛ. Nyɛmi yoo ko ni atsɛɔ lɛ Larissa lɛ wie akɛ: “Mihiɛ gbo waa. Minu he akɛ nɔ ni mifee lɛ egba nyɛmimɛi lɛ anaa waa, ni mishwie amɛhiɛ shi. Etsɛ waa dani minyɛ mijie nakai susumɔ lɛ kɛje mijwɛŋmɔ mli.” Shi ná nɔmimaa akɛ asafoŋ onukpai lɛ kɛ nyɛmimɛi krokomɛi lɛ miitao amɛye amɛbua bo ni otswa ohe oma shi ekoŋŋ. (Kwɛmɔ akrabatsa ni ji, “Mɛni Asafoŋ Onukpai Lɛ Baanyɛ Afee?”) Eŋɔɔ amɛnaa waa akɛ oku osɛɛ kɛba asafo lɛ mli, ni amɛmiisumɔ ni oná miishɛɛ.—Abɛi 17:17.

Mɛni baaye abua bo ni onyɛ okɛ nyɛmimɛi lɛ abɔ naanyo ekoŋŋ? No ji ni obaafee nibii ni nyɛmimɛi lɛ feɔ lɛ eko. Yaa asafoŋ kpeei lɛ fɛɛ, ni okɛ amɛ afee ekome kɛya shiɛmɔ. Mɛɛ gbɛ nɔ enɛ baaye ebua bo? Nyɛmi nuu ko ni atsɛɔ lɛ Felix lɛ wie akɛ: “Eŋɔɔ nyɛmimɛi lɛ anaa akɛ miku misɛɛ miba. Mina akɛ amɛsumɔɔ mi waa. Amɛ fɛɛ amɛye amɛbua mi ni mina akɛ Yehowa kɛ mihe eshai lɛ eke mi, miba eweku lɛ mli ekoŋŋ, ni amɛwa mi ni mitee mihiɛ.”—Kwɛmɔ akrabatsa ni ji, “Mɛni Obaanyɛ Ofee?”

KAAHÃ ONIJIAŊ JE WUI!

Satan baaya nɔ ehã kɔɔyɔi ni naa wala ashi otsũ lɛ. Ni tsɔɔ akɛ, ebaaya nɔ efee nibii ni baanyɛ ahã ofite okɛ Yehowa teŋ. (Luka 4:13) Shi kaahã eye omanye. Feemɔ nibii ni baahã okɛ Yehowa teŋ naanyobɔɔ lɛ mli awa.

Yehowa kɛ ehe to tookwɛlɔ he, ni ewie yɛ ewebii lɛ ahe akɛ: “Nɔ ni elaaje lɛ, mayatao, ni nɔ ni edu gbɛ lɛ, mayamɔ lɛ kɛba, nɔ ni epila lɛ, mafi epilamɔ lɛ nɔ, ni nɔ ni egbɔjɔ lɛ, mawaje lɛ.” (Eze. 34:16) Yehowa eye ebua mɛi babaoo ni amɛsaa amɛ kɛ lɛ teŋ ekoŋŋ. No hewɔ lɛ, ná nɔmimaa akɛ ebaaye ebua bo ni oya nɔ ofee nibii ni baahã okɛ lɛ teŋ naanyobɔɔ lɛ mli awa daa.

Mɛni Asafoŋ Onukpai Lɛ Baanyɛ Afee?

Asafoŋ onukpai, nibii pii yɛ ni nyɛbaanyɛ nyɛfee kɛye nyɛbua mɛi ni ahe amɛ kɛba asafo lɛ mli ekoŋŋ lɛ koni wekukpaa ni yɔɔ amɛ kɛ Yehowa teŋ lɛ mli awa. Naa nibii nɛɛ ekomɛi.

Nyɛwoa amɛ hewalɛ ni nyɛshɛjea amɛmii. Sane ko ni bɔfo Paulo wie lɛ hãa wɔnaa akɛ “awerɛhoyeli babaoo” baanyɛ aye mɔ ko ni etsake etsui lɛ nɔ. (2 Kor. 2:7) Mɔ lɛ baanyɛ anu he akɛ eshwie ehiɛ shi, ni no baanyɛ aje enijiaŋ wui. Paulo wo asafo lɛ ŋaa akɛ, kɛ́ mɔ ko ni efee esha lɛ tsake etsui lɛ, amɛkɛke lɛ ni amɛshɛje emii. Esa akɛ aye abua mɛi ni ahe amɛ ekoŋŋ lɛ ni amɛna akɛ, Yehowa kɛ amɛnyɛmimɛi lɛ sumɔɔ amɛ waa. Kɛ́ asafoŋ onukpai lɛ fɔɔ amɛyi jiemɔ ni amɛyeɔ amɛbuaa amɛ lɛ, no baaye abua amɛ ni amɛnijiaŋ akaje wui.

Nyɛkɛ amɛ asɔlea. Biblia lɛ kɛɔ akɛ: “Sɔlemɔ ni jalɔ sɔleɔ kɛkpaa fai kɛ hiɛdɔɔ lɛ yɛ hewalɛ waa.” (Yak. 5:16) Larissa ni wɔtsĩ etã kɛtsɔ hiɛ lɛ wie akɛ: “Mihã asafoŋ onukpai lɛ le susumɔi ni haoɔ mi lɛ kɛ bɔ ni susumɔi nɛɛ hãa minuɔ he mihãa. Amɛkɛ mi sɔle, ni amɛsɔle amɛhã mi hu. Enɛ hã mina akɛ asafoŋ onukpai lɛ amli fuko mi. Moŋ lɛ, amɛmiisumɔ ni amɛye amɛbua mi ni masaa mi kɛ Yehowa teŋ.” Nyɛmi nuu ko ni atsɛɔ lɛ Theo lɛ hu wie akɛ: “Be ni asafoŋ onukpai lɛ kɛ mi sɔle lɛ, no hã mina akɛ Yehowa sumɔɔ mi lɛɛlɛŋ, ni akɛ jeee nibii gbohii pɛ enaa yɛ mihe, shi enaa nibii kpakpai ni mifeɔ lɛ hu.”

Nyɛkɛ amɛ abɔa naanyo. Kɛ́ ahe mɔ ko kɛba asafo lɛ mli ekoŋŋ lɛ, esa akɛ ená nanemɛi yɛ asafo lɛ mli. Asafoŋ onukpa ko ni atsɛɔ lɛ Justin lɛ wie akɛ: “Okɛ amɛ afɔ shiɛmɔ yaa, ni obɔ mɔdɛŋ waa ni oyasara amɛ yɛ shĩa. Ehe miihia waa ni amɛna bo akɛ amɛnaanyo.” Asafoŋ onukpa ko ni atsɛɔ lɛ Henry lɛ hu wie akɛ: “Kɛ́ asafoŋbii lɛ na akɛ asafoŋ onukpai lɛ kɛ mɔ ni ahe lɛ miibɔ naanyo lɛ, amɛ hu amɛbaafee nakai nɔŋŋ.”

Nyɛyea nyɛbuaa amɛ ni amɛkase nii. Kɛ́ mɔ ni ahe lɛ ná naanyo ko ni bɔɔ mɔdɛŋ yɛ asafo lɛ mli lɛ, naanyo nɛɛ baanyɛ aye abua lɛ ni eto gbɛjianɔ ni ekase nii. Asafoŋ onukpa ko ni atsɛɔ lɛ Darko lɛ wie akɛ: “Migbaa amɛ nibii ni mikase lɛ, ni mihãa amɛnaa akɛ misumɔɔ Biblia lɛ kasemɔ waa. Agbɛnɛ hu, mitoɔ gbɛjianɔ ni wɔfeɔ ekome kɛkaseɔ saji komɛi ni baawo amɛ hewalɛ.” Asafoŋ onukpa kroko ni atsɛɔ lɛ Clayton lɛ hu wie akɛ: “Miwoɔ amɛ hewalɛ ni amɛtao mɛi ni awie amɛhe yɛ Biblia lɛ mli ni kɛ shihilɛ ni tamɔ amɛnɔ lɛ pɛpɛɛpɛ lɛ kpe lɛ ahe saji ni amɛkwɛ nɔ ni amɛbaanyɛ amɛkase yɛ mli.”

Nyɛhãa amɛnaa akɛ nɔkwɛlɔi kpakpai ji nyɛ. Mɛi ni ahe amɛ ekoŋŋ lɛ ena asafoŋ onukpai lɛ ni amɛmiisɔmɔ akɛ kojolɔi. Shi bianɛ lɛ, ehe miihia waa ni amɛna amɛ ni amɛmiisɔmɔ akɛ nɔkwɛlɔi. (Yer. 23:4) No hewɔ lɛ, kɛ́ amɛmiiwie lɛ, nyɛboa amɛ toi jogbaŋŋ ni nyɛfɔa amɛyi jiemɔ. Nyɛkɛ amɛ afɔa sanegbaa. Naa nɔ ni asafoŋ onukpa ko ni atsɛɔ lɛ Marcus lɛ kɛɛ efeɔ kɛ́ eyasara mɛi ni ahe amɛ ekoŋŋ lɛ: “Wɔkɛ amɛ susuɔ ŋmalɛ ko he, wɔjieɔ amɛyi, ni wɔhãa amɛleɔ akɛ eŋɔɔ wɔnaa waa akɛ amɛmia amɛhiɛ amɛku amɛsɛɛ kɛba Yehowa ŋɔɔ, ni eŋɔɔ Yehowa hu naa waa. Dani wɔbaashi lɛ, wɔtsɔɔ amɛ be kroko ni wɔbaabasara amɛ ekoŋŋ.”

a Atsake gbɛ́i lɛ ekomɛi.