BƆ NI WƆƆFEE WƆYE HETSƐ̃ NƆ

1 | Kaakwɛ Hiɛiaŋ

Biblia Mli Tsɔɔmɔ:

“Nyɔŋmɔ kwɛɛɛ mɛi ahiɛiaŋ, shi moŋ, yɛ jeŋmaŋ fɛɛ jeŋmaŋ mli lɛ, [mɔ fɛɛ mɔ] ni sheɔ lɛ gbeyei ni efeɔ nɔ ni ja lɛ, lɛ ji mɔ ni enáa ehe miishɛɛ.”—BƆFOI 10:34, 35.

Nɔ Ni Etsɔɔ:

Jeee maŋ nɔ ni wɔjɛ, wɔhewolonɔ su, loo wɔkusum nɔ Yehowaa Nyɔŋmɔ damɔɔ ekɛ wɔ yeɔ. Ekɛ ejwɛŋmɔ maa nɔ ni yɔɔ wɔtsui mli, ni ji wɔsusumɔi kɛ nibii ni wɔshweɔ lɛ moŋ anɔ. Anɔkwa, “gbɔmɔ kwɛɔ nɔ ni anaa, shi Yehowa lɛ, enaa tsui lɛ mli.”—1 Samuel 16:7.

Nɔ Ni Obaanyɛ Ofee:

Eyɛ mli akɛ wɔnyɛŋ wɔna mɛi atsui mli moŋ, shi wɔbaanyɛ wɔkase Nyɔŋmɔ ni wɔkakwɛ hiɛiaŋ. Bɔɔ mɔdɛŋ ni okɛ mɔ ko he nu akaju mɛi krokomɛi ahe. Kɛ́ ona akɛ ohiɛ mɛi komɛi ahe jwɛŋmɔ fɔŋ—ekolɛ yɛ amɛhewolonɔ su loo maŋ nɔ ni amɛjɛ lɛ hewɔ lɛ—sɔlemɔ obi Nyɔŋmɔ ni ewa bo ni ojie kɛje omli. (Lala 139:23, 24) Kɛ́ ojɛ otsuiŋ obi Yehowa ni ewa bo koni okakwɛ hiɛiaŋ lɛ, bɔ fɛɛ bɔ ni fee lɛ, ebaabo bo toi ni ebaawa bo.—1 Petro 3:12.

a Yehowa ji Nyɔŋmɔ gbɛ́i diɛŋtsɛ.—Lala 83:18.

“Mikɛ blɔfonyo ko tako shi yɛ toiŋjɔlɛ mli pɛŋ . . . Bianɛ lɛ, mibafata asafo ko ni yɔɔ jeŋ fɛɛ, ni mli bii lɛ naa amɛhe akɛ nyɛmimɛi diɛŋtsɛ lɛ he.”—TITUS

Mɔ Ko Shihilɛ Mli Sane—TITUS

Eye Hetsɛ̃ Nɔ

Titus mli fu waa yɛ mlai ni awo ni hãaa blɔfomɛi kɛ mɛidiji aye jogbaŋŋ lɛ hewɔ. Enɛ hã ekɛ ehe yadɔmɔ kuu ko ni mli bii lɛ nuɔ he tamɔ lɛ nɔŋŋ lɛ. Ewie akɛ: “Wɔjeɔ gbɛ wɔyaa maŋ lɛ mli hei ni aŋmɛɛɛ gbɛ ni mɛidiji aya lɛ, tamɔ gbɔiatoohei kɛ dãanumɔhei nɛkɛ, koni wɔyatsɔ béi kɛkɛ.” Titus wie akɛ, hetsɛ̃ ji nɔ ni hã efee nibii fɔji lɛ, ni ekɛfata he akɛ: “Kɛ́ naataamɔ ba mikɛ mɔ ko teŋ lɛ, nuu jio, yoo jio lɛ, mi klɛŋklɛŋ mimaa lɛ atswɛrɛ.”

Be ni Yehowa Odasefoi kɛ Titus bɔi nikasemɔ lɛ ni ebɔi tsakemɔ. Be ni ekane Biblia lɛ, ená enɔ hewalɛ waa. Shi ni Nyɔŋmɔ ewo akɛ be ko baaba ni “gbele bɛ dɔŋŋ, ni mɔ ko yeŋ awerɛho dɔŋŋ, ni mɔ ko hu fóŋ dɔŋŋ, ni mɔ ko hu piŋŋ dɔŋŋ” lɛ, ji nɔ ni ta etsuiŋ waa.—Kpojiemɔ 21:3, 4.

Shishijee lɛ, ewa hã Titus akɛ ebaaye hetsɛ̃ ni yɔɔ etsui mli lɛ nɔ. Ewie akɛ: “No mli lɛ, ewa waa hã mi akɛ matsake bɔ ni misusuɔ nii ahe kɛ bɔ ni mifeɔ minii mihãa lɛ.” Biblia lɛ wie Nyɔŋmɔ he yɛ Bɔfoi 10:34, 35 lɛ akɛ, ekwɛɛɛ mɛi ahiɛiaŋ, ni no ji nɔ ni wa Titus.

Mɛni jɛ mli kɛba? Titus tsɔɔ mli akɛ: “Be ni mina suɔmɔ ni yɔɔ Yehowa Odasefoi lɛ ateŋ lɛ—ekɔɔɔ he eko maŋ nɔ ni amɛjɛ loo amɛhewolonɔ su—miyiŋ tsɔ akɛ amɛjamɔ lɛ ji anɔkwa jamɔ lɛ. Dani abaabaptisi mi akɛ Odasefonyo po lɛ, blɔfonyo ko ni yɔɔ asafo lɛ mli lɛ fɔ̃ mi nine kɛtee eshĩa, ni wɔfee ekome kɛye nii. Efee mi akɛ miila. Mikɛ blɔfonyo ko tako shi yɛ toiŋjɔlɛ mli pɛŋ, aahu ni maya eshĩa ni mayaye nii. Bianɛ lɛ, mibafata asafo ko ni yɔɔ jeŋ fɛɛ, ni mli bii lɛ naa amɛhe akɛ nyɛmimɛi diɛŋtsɛ lɛ he.”