BƆ NI WƆƆFEE WƆYE HETSƐ̃ NƆ

3 | Jiemɔ Hetsɛ̃ Kɛje Ojwɛŋmɔ Mli

Biblia Mli Tsɔɔmɔ:

‘Tsakemɔ ohe kɛtsɔ ojwɛŋmɔ ni obaaya nɔ otsake lɛ nɔ, koni bo diɛŋtsɛ onyɛ oka okwɛ ni oyɔse nɔ ni ji Nyɔŋmɔ suɔmɔnaa nii kpakpa ni enáa he miishɛɛ ni hi kɛwula shi lɛ.’—ROMABII 12:2.

Nɔ Ni Etsɔɔ:

Nibii ni wɔsusuɔ he lɛ ahe hiaa Nyɔŋmɔ. (Yeremia 17:10) Esaaa akɛ wɔwieɔ loo wɔfeɔ nɔ ko ni tsɔɔ akɛ wɔhe tsɛ̃ɔ mɛi, shi no pɛ kɛkɛ faaa. Hetsɛ̃ jeɔ shishi kɛjɛɔ wɔjwɛŋmɔ kɛ wɔtsui mli. Hewɔ lɛ, kɛ́ susumɔi ni baahã wɔhe atsɛ̃ mɛi ba wɔjwɛŋmɔ kɛ wɔtsui mli lɛ, esa akɛ wɔjie oya nɔŋŋ. Ja nakai dani wɔbaanyɛ ‘wɔtsake,’ ni wɔye hetsɛ̃ nɔ.

Nɔ Ni Obaanyɛ Ofee:

Bo diɛŋtsɛ kwɛmɔ akɛ mɛɛ susumɔ ohiɛ yɛ mɛi ni esoro amɛhewolonɔ su loo amɛjɛ maŋ kroko nɔ lɛ ahe. Bi ohe akɛ: ‘Te minaa amɛ tɛŋŋ? Ani nɔ ni mile yɛ amɛhe lɛ hewɔ minaa amɛ nakai lɛ? Aloo amɛsane ni misumɔɔɔ lɛ hewɔ?’ Kaakwɛ vidioi ni woɔ mɛi hewalɛ ni amɛhe atsɛ̃ mɛi loo amɛfee yiwalɛ nii, ni kaakane nibii ni tamɔ nakai hu—yɛ Intanɛt lɛ nɔ jio, he kroko jio.

Nyɔŋmɔ Wiemɔ lɛ baanyɛ awa wɔ ni wɔjie hetsɛ̃ kɛje wɔtsui kɛ wɔjwɛŋmɔ mli

Wɔbaanyɛ wɔsusu akɛ wɔhiɛ mɛi fɛɛ ahe jwɛŋmɔ kpakpa, shi ekolɛ jeee nakai eji. Shi Nyɔŋmɔ Wiemɔ lɛ baanyɛ awa wɔ ni ‘wɔkɔ wɔtsui lɛ mli susumɔi kɛ yiŋtoi asɛɛ.’ (Hebribii 4:12) No hewɔ lɛ, yaa nɔ okase Biblia lɛ jogbaŋŋ. Okɛ Biblia lɛ mli tsɔɔmɔi lɛ ato susumɔi ni ohiɛ lɛ he, ni obɔ mɔdɛŋ waa ni osusu nii ahe bɔ ni baasa Nyɔŋmɔ hiɛ. Nyɔŋmɔ Wiemɔ lɛ baanyɛ awa wɔ ni wɔjie hetsɛ̃ ni ‘shishifãi emɔmɔ shi waa’ lɛ kɛje wɔjwɛŋmɔ kɛ wɔtsui mli.—2 Korintobii 10:4, 5.

Mɔ Ko Shihilɛ Mli Sane—STEPHEN

Etsake Bɔ Ni Esusuɔ Nii Ahe Ehãa

Blɔfomɛi fee nibii ni tsɔɔ akɛ amɛhe tsɛ̃ɔ Stephen kɛ eweku lɛ mli bii lɛ. Enɛ hewɔ lɛ, ekɛ ehe yadɔmɔ kuu ko ni miibɔ mɔdɛŋ amɛhã mɛi aná heyeli. Sɛɛ mli lɛ, lɛ hu ebɔi mɛi nibii fɔji feemɔ yɛ hetsɛ̃ hewɔ. Stephen wie akɛ: “Be ko lɛ mikɛ minanemɛi lɛ yakwɛ sini ko ni kɔɔ niseniianii ni afee nyɔji ni ahe kɛjɛ Afrika kɛba United States lɛ he. Nɔ ni afee mɛidiji lɛ dɔ wɔ waa, no hewɔ lɛ wɔdɔ ma wɔshwie blɔfo gbekɛbii ni yɔɔ he ni ajieɔ sini lɛ yɛ lɛ anɔ, ni wɔtsoo amɛ jogbaŋŋ. Kɛkɛ ni wɔtee akutsei ni blɔfomɛi yɔɔ mli lɛ amli koni wɔyatao mɛi babaoo wɔyi.”

Be ni Yehowa Odasefoi kɛ Stephen bɔi Biblia lɛ kasemɔ lɛ, etsake susumɔ ni ehiɛ lɛ kwraa. Ewie akɛ: “Akɛni hewolonɔ su mlijiemɔ ehe mitsui waa hewɔ lɛ, nibii komɛi ni mina yɛ Odasefoi lɛ ahe lɛ fee mi naakpɛɛ waa. Akɛ nɔkwɛmɔnɔ lɛ, be ni Odasefonyo ko ni ji blɔfonyo lɛ miifã gbɛ lɛ, eshi ebii lɛ ehã mɛidiji aweku ko. Agbɛnɛ hu lɛ, blɔfomɛi aweku ko ŋɔ oblanyo ko ni ji mɔdiŋ ní miitao he ko ahi lɛ kɛba amɛshĩa.” Stephen yiŋ tsɔ akɛ, suɔmɔ ni yɔɔ Yehowa Odasefoi lɛ ateŋ lɛ ji suɔmɔ ni Yesu gba akɛ esɛɛnyiɛlɔi lɛ, ni ji anɔkwa Kristofoi lɛ baajie lɛ kpo lɛ.—Yohane 13:35.

Mɛni ye ebua Stephen ni eye hetsɛ̃ kɛ yiwalɛ nifeemɔ nɔ? Romabii 12:2 lɛ ji nɔ ni wa lɛ. Ewie akɛ: “Mibana akɛ ehe miihia ni matsake misusumɔi. Ehe bahia ni matsake mijwɛŋmɔ jeee koni mikɛ mɛi ahi shi yɛ toiŋjɔlɛ mli pɛ kɛkɛ, shi moŋ lɛ, koni ale mi akɛ mɔ ni tiuɔ toiŋjɔlɛ sɛɛ.” Stephen enyɛ ehi shi nɔ ni fe afii 40 ni ehe tsɛ̃ɛɛ mɔ ko.